Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Petro 5:1-14

YITSEI LƐ AMLI SAJI

  • Nyɛkwɛa Nyɔŋmɔ tooku lɛ nɔ tamɔ tookwɛlɔi feɔ lɛ (1-4)

  • Nyɛbaa nyɛhe shi ni nyɛkwɛa nyɛhe nɔ jogbaŋŋ (5-11)

    • Nyɛshɛa nyɛyeyeeyefeemɔi lɛ fɛɛ nyɛfɔ̃a Nyɔŋmɔ nɔ (7)

    • Abonsam tamɔ jata ni miihũu (8)

  • Naamuu wiemɔi (12-14)

5  No hewɔ lɛ, asafoŋ onukpai ni yɔɔ nyɛteŋ lɛ, mi hu ni mi ji asafoŋ onukpa, Kristo nɔnai lɛ ahe odasefonyo kɛ mɔ ni baaná anunyam ni abaajie lɛ kpo lɛ mli gbɛfaŋnɔ lɛ, miikpa amɛ fai* akɛ:  Nyɛkwɛa Nyɔŋmɔ tooku ni yɔɔ nyɛshishi lɛ nɔ tamɔ tookwɛlɔi feɔ lɛ, ni nyɛsɔmɔa akɛ nɔkwɛlɔi,* jeee tamɔ nɔ ni aanyɛ nyɛnɔ, shi moŋ nyɛjɛa nyɛsuɔmɔ mli nyɛfea nakai yɛ Nyɔŋmɔ hiɛ; asaŋ jeee yɛ kutumpɔo sɛɛnamɔ hewɔ, shi moŋ tsuijurɔ naa;  jeee akɛ mɛi ni yeɔ Nyɔŋmɔ tooku, ni ji egboshinii lɛ anɔ akɛ nuŋtsɔmɛi, shi moŋ nyɛfea nɔkwɛmɔnɔ nyɛhãa tooku lɛ.  Ni kɛ́ ajie tookwɛlɔnukpa lɛ kpo lɛ, nyɛnine baashɛ anunyam akekere ni tsakeee lɛ nɔ.  Nakai nɔŋŋ nyɛ oblahii lɛ, nyɛŋɔa nyɛhe nyɛwoa hii onukpai lɛ* ashishi. Shi nyɛ fɛɛ lɛ, nyɛwoa heshibaa* yɛ nyɛkɛ nyɛhe shãramɔ mli, ejaakɛ Nyɔŋmɔ tsĩɔ henɔwolɔi anaa, shi eduroɔ heshibalɔi.  No hewɔ lɛ, nyɛbaa nyɛhe shi yɛ Nyɔŋmɔ nine ni wa lɛ shishi, koni ewó nyɛnɔ yɛ be ni sa mli,  be mli ni nyɛshɛrɛɔ nyɛyeyeeyefeemɔi* lɛ fɛɛ nyɛshwieɔ enɔ lɛ, ejaakɛ esusuɔ nyɛhe.  Nyɛhiɛ ahia nyɛhe nɔ be fɛɛ be, nyɛkwɛa nyɛhe nɔ jogbaŋŋ! Nyɛhenyɛlɔ, Abonsam lɛ, nyiɛ tamɔ jata ni miihũu, ni eetao mɔ ko emi.  Shi nyɛdamɔa shi shiŋŋ yɛ hemɔkɛyeli lɛ mli nyɛtsĩa lɛ gbɛ, ejaakɛ nyɛle akɛ nakai nɔnai lɛ nɔŋŋ nyɛnyɛmimɛi asafo muu lɛ fɛɛ* ni yɔɔ je lɛ mli lɛ hu kɛkpeɔ. 10  Shi kɛ́ nyɛna nɔ fioo sɛɛ lɛ, duromɔ fɛɛ Nyɔŋmɔ lɛ diɛŋtsɛ, mɔ ni tsɛ nyɛ kɛba enaanɔ anunyam lɛ mli yɛ ekome ni nyɛ kɛ Kristo efee lɛ hewɔ lɛ, baagbe nyɛtsɔsemɔ lɛ naa. Ebaahã nyɛhe awa, ebaawaje nyɛ, ebaahã nyɛnaji amɔmɔ shi jogbaŋŋ. 11  Lɛ enɔ ji hewalɛ lɛ kɛmiiya naanɔ. Amen. 12  Mitsɔ Silvano,* nyɛmi ni mibuɔ lɛ akɛ anɔkwafo lɛ nɔ miŋma nyɛ wiemɔi fioo nɛɛ bɔ ni afee ni mikɛwo nyɛ hewalɛ ni mikɛye odase kɛ hiɛdɔɔ akɛ enɛ ji Nyɔŋmɔ anɔkwa duromɔ lɛ. Nyɛdamɔa shi shiŋŋ yɛ mli. 13  Yoo* ni yɔɔ Babilon lɛ, mɔ ni ahala lɛ tamɔ nyɛ nɔŋŋ lɛ, miiŋa nyɛ, ni mibi Marko hu miiŋa nyɛ. 14  Nyɛŋaŋaa nyɛhe kɛ suɔmɔ naashɔmɔ. Toiŋjɔlɛ ahã nyɛ, nyɛ mɛi fɛɛ ni kɛ Kristo efee ekome lɛ.

Shishigbɛ Niŋmaa

Aloo “miiwie miitsɔɔ amɛ.”
Aloo “nyɛkwɛa tooku lɛ nɔ jogbaŋŋ.”
Aloo “asafoŋ onukpai lɛ.”
Aloo “nyɛwoa heshibaa jwɛŋmɔ; nyɛkɛ heshibaa (loo heshibaa jwɛŋmɔ) aŋmɔa nyɛhɛ.”
Aloo “nyɛgbeyeishemɔi; nyɛnaagbai.”
Sht. ŋm., “nyɛnyɛmifeemɔ.”
Atsɛɔ lɛ Sila hu.
Ebaanyɛ ekɔ asafo ko he.