Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Petro 3:1-22

EMLI SAJI

  • Ŋamɛi kɛ wumɛi (1-7)

  • Nyɛnua he nyɛhãhãa nyɛhe; nyɛtaoa toiŋjɔlɛ (8-12)

  • Nɔnaa yɛ jalɛ hewɔ (13-22)

    • Nyɛsaa nyɛhe nyɛtoa koni nyɛfã nyɛhiɛnɔkamɔ lɛ he (15)

    • Baptisimɔ kɛ henilee kpakpa (21)

3  Nakai nɔŋŋ nyɛ ŋamɛi lɛ hu, nyɛŋɔa nyɛhe nyɛwoa nyɛwumɛi ashishi, koni kɛ́ amɛteŋ mɛi komɛi booo wiemɔ lɛ toi lɛ, atsɔ nyɛjeŋba nɔ ní nine ashɛ amɛnɔ ní wiemɔ fataaa he,  ejaakɛ amɛ diɛŋtsɛ amɛnaa nyɛjeŋba ni he tse lɛ kɛ agbɛnɛ hu bulɛ ni mli kwɔ ní nyɛjieɔ lɛ kpo lɛ.  Nyɛkahãa nyɛhewulamɔ lɛ fea kponɔgbɛ nɔ—yigbɔɔ kɛ shika tsuru nibii ní akɛwulaa he loo atadei fɛfɛji ní awoɔ—  moŋ lɛ, nyɛhãa efea tsuiŋ gbɔmɔ ní aŋɔtee, yɛ mumɔ ni yɔɔ kpoo ni he jɔ lɛ hewulamɔ ní fiteee lɛ mli, nɔ ni jara wa yɛ Nyɔŋmɔ hiɛ lɛ.  Ejaakɛ tsutsu lɛ, nɛkɛ ji bɔ ni yei krɔŋkrɔŋi ni ná hiɛnɔkamɔ yɛ Nyɔŋmɔ mli lɛ wula amɛhe, ni amɛŋɔ amɛhe amɛwo amɛwumɛi ashishi,  tamɔ bɔ ni Sara bo Abraham toi, ní etsɛ lɛ nuŋtsɔ lɛ. Ni nyɛtsɔmɔ Sara bii, gbii abɔ ni nyɛyaa nɔ nyɛfeɔ ekpakpa, ní nyɛhãaa nɔ ko awo nyɛhe gbeyei lɛ.  Nakai nɔŋŋ nyɛ wumɛi lɛ hu, nyɛyaa nɔ nyɛkɛ nyɛŋamɛi lɛ ahia shi yɛ nilee naa.* Nyɛkɛ woo awoa yoo akɛ gbɛ́ ni waaa tamɔ nyɛ, ejaakɛ amɛ hu amɛkɛ nyɛ fɛɛ ji wala ní akɛduro nyɛ lɛ niyelɔi, koni akatsimɔ nyɛsɔlemɔi lɛ agbɛ.  Naagbee lɛ, nyɛ fɛɛ nyɛnáa jwɛŋmɔ kome,* nyɛnua he nyɛhãhãa nyɛhe, nyɛnáa nyɛmimɛi ahedɔɔ, musuŋtsɔlɛ, kɛ heshibaa.  Nyɛkɛ efɔŋ akatoa efɔŋ najiaŋ, aloo jɛmɔ yɛ jɛmɔ najiaŋ. Moŋ lɛ, nyɛjɔa kɛtoa najiaŋ, ejaakɛ enɛ hewɔ atsɛ nyɛ, koni nyɛná jɔɔmɔ.* 10  Ejaakɛ “mɔ fɛɛ mɔ ni sumɔɔ wala, ní eesumɔ ni ena gbii kpakpai lɛ, esa akɛ ebu elilɛi he kɛje nibii gbohii ahe, kɛ enaabu hu koni ekawie lakamɔ wiemɔi. 11  Etsi ehe kɛje nibii gbohii ahe, ní efee ekpakpa; eya nɔ etao toiŋjɔlɛ ní etiu no sɛɛ. 12  Ejaakɛ Yehowa* hiŋmɛii yɛ jalɔi anɔ, ni ekɛ etoii boɔ fai ní amɛkɛ hiɛdɔɔ kpaa lɛ lɛ toi, shi mɛi ni feɔ nibii gbohii lɛ, Yehowa* jieɔ ehiɛ ekaa amɛ.” 13  Anɔkwa, kɛji nyɛhiɛ dɔɔ ekpakpafeemɔ he lɛ, namɔ baaye nyɛ awui? 14  Shi kɛ́ jalɛ hewɔ nyɛna nɔ po lɛ, nyɛyɛ miishɛɛ. Shi nyɛkashea nɔ ni woɔ amɛhe gbeyei lɛ gbeyei,* asaŋ nyɛkahaoa. 15  Shi moŋ, nyɛbua Kristo lɛ yɛ nyɛtsuiiaŋ akɛ Nuŋtsɔ ni yɔɔ krɔŋkrɔŋ, ni be fɛɛ be lɛ nyɛsaa nyɛhe nyɛtoa koni nyɛná hetoo nyɛhã mɔ fɛɛ mɔ ni biɔ nyɛ hiɛnɔkamɔ ni nyɛyɔɔ lɛ he sane lɛ, shi nyɛkɛ mlijɔlɛ kɛ bulɛ ni mli kwɔ afea nakai. 16  Nyɛyaa nɔ nyɛhiɛa henilee kpakpa mli, koni nɔ fɛɛ nɔ mli ní amɛwieɔ amɛshiɔ nyɛ yɛ lɛ, nyɛjeŋba kpakpa akɛ Kristo sɛɛnyiɛlɔi lɛ ahã mɛi ni wieɔ shiɔ nyɛ lɛ ahiɛ agboi. 17  Ejaakɛ ehi akɛ nyɛaana nɔ akɛni nyɛmiifee ekpakpa lɛ hewɔ, kɛ́ Nyɔŋmɔ miisumɔ akɛ eŋmɛ no gbɛ, moŋ fe nɔ ni nyɛbaana nɔ akɛni nyɛmiifee efɔŋ lɛ hewɔ. 18  Ejaakɛ Kristo gbo shi kome nyɔŋlo yɛ eshai ahewɔ, lɛ jalɔ lɛ yɛ mɛi ni ejaaa lɛ anajiaŋ, bɔ ni afee ni enyiɛ nyɛhiɛ kɛya Nyɔŋmɔ ŋɔɔ. Agbe lɛ yɛ heloo mli, shi ahã ehiɛ kã yɛ mumɔ mli. 19  Ni nɛkɛ shihilɛ nɛɛ mli ejɛ etee eyashiɛ etsɔɔ mumɔi ni awo amɛ tsuŋ lɛ, 20  mɛi ni tsutsu lɛ amɛgbo toi be ni Nyɔŋmɔ toɔ etsui shi kɛmɛɔ* yɛ Noa gbii lɛ amli, be mli ni akpɛɔ adeka lɛ, nɔ mli ni abaa mɛi fioo ko, ni ji susumai* kpaanyɔ ayi yɛ kɛtsɔ nu lɛ mli lɛ. 21  Amrɔ nɛɛ, nɔ ni nakai nifeemɔ lɛ feɔ he mfoniri, ni ji baptisimɔ lɛ hu miihere nyɛyiwala (jeee kɛtsɔ heloo lɛ nɔ muji jiemɔ nɔ, shi moŋ kɛtsɔ fai ni akpaa Nyɔŋmɔ kɛhã henilee kpakpa lɛ nɔ), kɛtsɔ Yesu Kristo shitee lɛ nɔ. 22  Etee ŋwɛi, ni eyɛ Nyɔŋmɔ ninejurɔ nɔ, ni aŋɔ ŋwɛibɔfoi kɛ hegbɛi kɛ hewalɛi awo eshishi.

Shishigbɛ Niŋmaa

Aloo “nyɛjiea mɔhesusumɔ kpo nyɛtsɔa nyɛŋamɛi; nyɛnua nyɛŋamɛi ashishi.”
Aloo “nyɛjwɛŋa jwɛŋmɔ kome.”
Sht. ŋm., “nyɛná jɔɔmɔ akɛ gboshinii.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo eeenyɛ efee akɛ, “nyɛkahãa ŋmiŋmi mɔa nyɛ yɛ nyɛhe gbeyei ni amɛwoɔ lɛ hewɔ.”
Sht. ŋm., “Nyɔŋmɔ tsuishitoo lɛ mɛɔ.”
Aloo “gbɔmɛi.”