Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Korintobii 5:1-13

5  Yɛ anɔkwale mli lɛ, ababɔ amaniɛ akɛ bɔlɛnamɔ jeŋba sha* miiya nɔ yɛ nyɛteŋ, jeŋba sha* ni bɛ jeŋmaji lɛ ateŋ tete—akɛ nuu ko kɛ etsɛ ŋa yɛ.*  Ni nyɛ lɛ, ani nyɛmiishi nyɛtsitsi yɛ enɛ he? Ani esaaa akɛ nyɛyeɔ awerɛho moŋ, ní nyɛjieɔ nuu ni fee nɛkɛ nii nɛɛ yɛ nyɛteŋ?  Eyɛ mli akɛ mibɛ nyɛŋɔɔ yɛ gbɔmɔtsoŋ moŋ, shi miyɛ nyɛŋɔɔ yɛ mumɔŋ, ni mikojo nuu ni fee nii nɛɛ momo, tamɔ nɔ ni miyɛ nyɛŋɔɔ diɛŋtsɛ.  Kɛ́ nyɛnaa bakpe shi yɛ wɔ-Nuŋtsɔ Yesu gbɛ́i mli, ní nyɛle akɛ mikɛ nyɛ yɛ jɛmɛ yɛ mumɔŋ, ní wɔ-Nuŋtsɔ Yesu hewalɛ lɛ fata he lɛ,  esa akɛ nyɛŋɔ nuu ni tamɔ nɛkɛ lɛ nyɛwo Satan dɛŋ kɛhã heloo lɛ hiɛkpatamɔ, koni ahere mumɔ lɛ yiwala yɛ Nuŋtsɔ lɛ gbi lɛ nɔ.  Nyɛshwãa lɛ jeee shwãa kpakpa. Ani nyɛleee akɛ masha bibioo shaa ma* muu lɛ fɛɛ?  Nyɛjiea masha momo lɛ nyɛshwiea, koni nyɛtsɔmɔ ma hee, tamɔ bɔ ni masha ko bɛ nyɛmli lɛ. Ejaakɛ, anɔkwa, aŋɔ Kristo ni ji wɔ-Hehoo gwantɛŋbi lɛ ahã akɛ afɔle.  No hewɔ lɛ, agbɛnɛ, nyɛhãa wɔyaa nɔ wɔyea gbi jurɔ lɛ, jeee kɛ masha momo, ni asaŋ jeee kɛ masha ni damɔ shi kɛhã nɔ gbonyo kɛ efɔŋfeemɔ lɛ, shi moŋ kɛ aboloo* ni akɛ ma ni eshako feɔ, ni damɔ shi kɛhã tsui krɔŋŋ kɛ anɔkwale lɛ.  Miŋma nyɛ yɛ miwolo lɛ mli akɛ nyɛkɛ mɛi ni kɛ amɛhe woɔ bɔlɛnamɔ jeŋba sha* mli lɛ akpaa bɔɔ, 10  mitsɔɔɔ akɛ nyɛkɛ je nɛɛ mli bii ní kɛ amɛhe woɔ bɔlɛnamɔ jeŋba sha* mli loo amimyelɔi loo ojotswalɔi loo amagajalɔi akabɔ kwraa. Nakai ni kulɛ, anɔkwa, ja nyɛje je lɛ mli. 11  Shi agbɛnɛ, miiŋma nyɛ koni nyɛkɛ mɔ fɛɛ mɔ ni atsɛɔ lɛ nyɛmi, ní kɛ ehe woɔ bɔlɛnamɔ jeŋba sha* mli loo eji amimyelɔ loo amagajalɔ loo mɔjɛlɔ* loo dãatɔlɔ loo ojotswalɔ lɛ akpaa bɔɔ, nyɛkɛ mɔ ni tamɔ nɛkɛ lɛ akayea nii tete. 12  Ejaakɛ mɛni mɛi ni yɔɔ sɛɛ lɛ* akojomɔ kɔɔ yɛ mihe? Nyɛ lɛ, ani jeee mɛi ni yɔɔ mli lɛ nyɛkojoɔ, 13  ni Nyɔŋmɔ hu kojoɔ mɛi ni yɔɔ sɛɛ lɛ? “Nyɛjiea efɔŋfeelɔ lɛ kɛjea nyɛteŋ.”

Shishigbɛ Niŋmaa

Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Sht. ŋm., “eŋɔ etsɛ ŋa.”
Ma ji nibii tamɔ abele, omɔ, ŋmaa, kɛ amɛhenɔi ni agbɛlɛ ni akɛ nu efutu.
Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
Kwɛmɔ Wiemɔi Titrii Amligbalamɔ lɛ, “Bɔlɛnamɔ jeŋba sha.”
Aloo “mɔ ni sopaa mɔ.”
Aloo “mɛi ni bɛ Kristofoi asafo lɛ mli lɛ.”