Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Korintobii 4:1-21

4  Gbɔmɛi abu wɔ akɛ wɔji Kristo sɔɔlɔi* kɛ shĩa nɔkwɛlɔi ni atu Nyɔŋmɔ teemɔŋ saji krɔŋkrɔŋi lɛ awo amɛdɛŋ.  Yɛ enɛ gbɛfaŋ lɛ, nɔ ni akpaa gbɛ yɛ shĩa nɔkwɛlɔi adɛŋ ji ní ana amɛ akɛ anɔkwafoi.  Agbɛnɛ, kɛji nyɛ loo gbɔmɛi asaneyelihe ko baapɛi mimli lɛ, mibuuu no akɛ sane ko ni he hiaa. Anɔkwa, mi diɛŋtsɛ tete mipɛiii mimli.  Ejaakɛ mileee nɔ ko fɔŋ ko yɛ mi diɛŋtsɛ mihe. Shi jeee no baatsɔɔ akɛ jalɔ ji mi; mɔ ni pɛiɔ mimli ji Yehowa.*  No hewɔ lɛ, nyɛkakojoa nɔ ko dani be lɛ ashɛ, kɛyashi Nuŋtsɔ lɛ baaba. Ekɛ duŋ mli teemɔŋ nibii lɛ baaba la hiɛ, ni ebaahã ale tsuiiaŋ yiŋtoi lɛ, kɛkɛ lɛ mɔ fɛɛ mɔ nine baashɛ eyijiemɔ nɔ kɛjɛ Nyɔŋmɔ ŋɔɔ.  Agbɛnɛ, nyɛmimɛi, mikɛ nibii nɛɛ to mi kɛ Apolo he* akɛ nɔkwɛmɔnɔ yɛ nyɛhilɛkɛhamɔ hewɔ, koni nyɛtsɔ wɔnɔ nyɛkase shishitoo mla nɛɛ, akɛ: “Nyɛkatekea nibii ni aŋmala lɛ,” koni nyɛkawó nyɛhe nɔ, ni nyɛbu mɔ ko akɛ ehi fe mɔ kroko.  Ejaakɛ namɔ hãa esoroɔ bo yɛ mɔ kroko he? Anɔkwa, mɛni oyɔɔ ni jeee hã ahã bo? Anɔkwa, kɛ́ hã ahã bo lɛ, mɛni hewɔ oshwãa tamɔ nɔ ni jeee hã ahã bo lɛ?  Ani nyɛtɔrɔ momo? Ani nyɛtsɔmɔ niiatsɛmɛi momo? Ani nyɛshi wɔsɛɛ ni nyɛbɔi nɔyeli akɛ maŋtsɛmɛi? Miná ni kulɛ nyɛbɔi nɔyeli akɛ maŋtsɛmɛi lɛɛlɛŋ, koni wɔ hu wɔfata nyɛhe kɛye nɔ akɛ maŋtsɛmɛi.  Ejaakɛ efeɔ mi akɛ Nyɔŋmɔ eŋɔ wɔ ni ji bɔfoi lɛ efee naagbee mɛi ni akɛbaatsɔɔ akɛ hii ni abu amɛ gbele fɔ, ejaakɛ wɔtsɔmɔ nifeelɔi yɛ nikwɛmɔhe wɔhã je lɛ kɛ ŋwɛibɔfoi kɛ gbɔmɛi. 10  Kristo hewɔ lɛ, kwashiai ji wɔ, shi nyɛ lɛ hiɛshikalɔi ji nyɛ yɛ Kristo mli; wɔgbede, shi nyɛ lɛ, nyɛhe wa; awoɔ nyɛhiɛ nyam, shi wɔ lɛ, wɔhiɛ bɛ nyam. 11  Kɛbashi ŋmɛlɛtswaa nɛɛ nɔ lɛ, hɔmɔ kɛ kumai yeɔ wɔ, ni wɔtadewoo yeee emuu,* ni ayiɔ wɔ,* ni wɔbɛ shihilɛhe ko, 12  ni wɔgboɔ deŋme, ni wɔkɛ wɔ diɛŋtsɛ wɔniji tsuɔ nii. Kɛ́ aajɛ wɔ lɛ, wɔjɔɔ; kɛ́ aawa wɔ yi lɛ, wɔfiɔ shi kɛ tsuishitoo; 13  kɛ́ aagbe wɔhe guɔ lɛ, wɔhãa hetoo kɛ mlijɔlɛ;* wɔtsɔmɔ tamɔ je lɛ tumo nɔ nii,* nibii fɛɛ amli jwɛii, kɛbashi amrɔ nɛɛ. 14  Miŋmaaa nibii nɛɛ ní mikɛwo nyɛ hiɛgbele, shi moŋ koni mikɛwie mitsɔɔ nyɛ akɛ mibii ni misumɔɔ. 15  Ejaakɛ kɛji nyɛyɛ gbɛtsɔɔlɔi* akpei nyɔŋma yɛ Kristo mli po lɛ, ekã shi faŋŋ akɛ nyɛbɛ tsɛmɛi babaoo; ejaakɛ mitsɔ sane kpakpa lɛ nɔ mitsɔ nyɛtsɛ yɛ Kristo Yesu mli. 16  No hewɔ lɛ, miiwo nyɛ hewalɛ ni nyɛkase mi. 17  No hewɔ ni miitsu Timoteo nyɛŋɔɔ nɛɛ, ejaakɛ eji mibi ni misumɔɔ kɛ anɔkwafo yɛ Nuŋtsɔ lɛ mli. Ebaakai nyɛ gbɛi ni mitsɔɔ nɔ mifeɔ nii* yɛ Kristo Yesu mli lɛ, tamɔ bɔ ni miyaa nɔ mitsɔɔ yɛ asafo fɛɛ asafo mli yɛ he fɛɛ he lɛ. 18  Akɛni nyɛteŋ mɛi komɛi susuɔ akɛ mibaŋ nyɛŋɔɔ hewɔ lɛ, amɛwó amɛhe nɔ. 19  Shi kɛ́ Yehowa* miisumɔ lɛ, etsɛŋ ni maba nyɛŋɔɔ, ni maná male mɛi ni wóɔ amɛhe nɔ lɛ ahewalɛ, shi jeee amɛwiemɔi. 20  Ejaakɛ, Nyɔŋmɔ Maŋtsɛyeli lɛ, jeee mɔ wiemɔ mli anaa yɛ, shi moŋ hewalɛ mli. 21  Te nɔ ni nyɛsumɔɔ? Ani mihiɛ tso kɛba nyɛŋɔɔ, aloo miba kɛ suɔmɔ kɛ mlijɔlɛ mumɔ?

Shishigbɛ Niŋmaa

Aloo “shishibii.”
Kwɛmɔ Wiemɔi Titrii Amligbalamɔ lɛ.
Aloo “mitsake nibii nɛɛ kɛto . . . he.”
Aloo “wɔnyiɛɔ yayai.”
Aloo “amamɔɔ wɔ atswɛrɛi.”
Sht. ŋm., “wɔkpaa fai.”
Aloo “bɔɔla.”
Aloo “kwɛlɔi.”
Sht. ŋm., “migbɛi lɛ.”
Kwɛmɔ Wiemɔi Titrii Amligbalamɔ lɛ.