Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Korintobii 3:1-23

3  No hewɔ lɛ, nyɛmimɛi, minyɛɛɛ mikɛ nyɛ awie tamɔ mumɔŋ gbɔmɛi,* shi moŋ tamɔ heloŋ gbɔmɛi,* tamɔ abifabii yɛ Kristo mli.  Fufɔ mihã nyɛ, jeee niyenii ni wa, ejaakɛ no mli lɛ, nyɛhe waaa. Anɔkwa, amrɔ nɛɛ po lɛ nyɛhe waaa,  ejaakɛ heloŋ gbɔmɛi ji nyɛ lolo. Gbii abɔ ni awuŋayeli kɛ béi yɔɔ nyɛteŋ nɛɛ, ani jeee heloŋ gbɔmɛi ji nyɛ, asaŋ ani nyɛnyiɛɛɛ tamɔ gbɔmɛi nyiɛɔ lɛ?  Ejaakɛ kɛ́ mɔ ko kɛɛ, “Paulo nɔ ji mi,” shi mɔ kroko kɛɛ, “Apolo nɔ ji mi” lɛ, belɛ nyɛmiifee nyɛnii tamɔ gbɔmɛi komɛi kɛkɛ, aloo jeee nakai?  Belɛ namɔ ji Apolo? Hɛɛ, namɔ ji Paulo? Amɛji sɔɔlɔi ni nyɛtsɔ amɛnɔ nyɛtsɔmɔ héyelilɔi, tamɔ bɔ ni Nuŋtsɔ lɛ ŋɔhã mɔ fɛɛ mɔ lɛ.  Mi lɛ, mitɛo, Apolo shwie nɔ nu, shi Nyɔŋmɔ hãa eyaa nɔ edaa,  belɛ jeee mɔ ni tɛoɔ lɛ ji nɔ ko, asaŋ jeee mɔ ni shwieɔ nɔ nu lɛ hu, shi moŋ mɔ ni hãa edaa, ni ji Nyɔŋmɔ lɛ.  Agbɛnɛ, mɔ ni tɛoɔ kɛ mɔ ni shwieɔ nɔ nu lɛ fɛɛ lɛ ekome ni,* shi mɔ fɛɛ mɔ baaná lɛ diɛŋtsɛ ejuromɔnɔ yɛ lɛ diɛŋtsɛ enitsumɔ naa.  Ejaakɛ Nyɔŋmɔ nanemɛi nitsulɔi ji wɔ. Nyɛ lɛ, Nyɔŋmɔ ŋmɔ ji nyɛ, Nyɔŋmɔ tsũ. 10  Yɛ Nyɔŋmɔ duromɔ ni aŋɔhã mi lɛ naa lɛ, mitswa faneshi akɛ tsũtswalɔ ŋaalɔ ko,* shi mɔ kroko miitswa nɔ. Shi mɔ fɛɛ mɔ ahã ehiɛ ahi bɔ ni etswaa emaa faneshi lɛ nɔ lɛ nɔ daa. 11  Ejaakɛ mɔ ko nyɛŋ etswa faneshi kroko fe nɔ ni atswa lɛ, ni ji Yesu Kristo lɛ. 12  Agbɛnɛ, kɛ́ mɔ ko kɛ shika tsuru, jwiɛtɛi, tɛi ni jara wa, tsei, ntoo, loo gbetselii tswa faneshi lɛ nɔ lɛ, 13  abaana bɔ ni mɔ fɛɛ mɔ nitsumɔ ji,* ejaakɛ gbi lɛ baajie lɛ kpo, ejaakɛ abaatsɔ la nɔ ajie lɛ kpo, ni la lɛ diɛŋtsɛ baatsɔɔ nɔ ni mɔ fɛɛ mɔ etswa. 14  Kɛ́ mɔ ko nitsumɔ ni etswa ema faneshi lɛ nɔ lɛ tee nɔ edamɔ shi lɛ, ebaaná juromɔnɔ; 15  kɛ́ mɔ ko nitsumɔ shã lɛ, nɔ ko baaŋmɛɛ lɛ, shi lɛ diɛŋtsɛ lɛ, abaahere eyiwala; kɛ̃lɛ, no baafee tamɔ etsɔ la mli. 16  Ani nyɛleee akɛ Nyɔŋmɔ sɔlemɔwe ji nyɛ, ni akɛ, Nyɔŋmɔ mumɔ lɛ hiɔ nyɛmli? 17  Kɛ́ mɔ ko kpãtã Nyɔŋmɔ sɔlemɔwe lɛ hiɛ lɛ, Nyɔŋmɔ baakpãtã ehiɛ; ejaakɛ Nyɔŋmɔ sɔlemɔwe lɛ yɛ krɔŋkrɔŋ, ni nyɛji nakai sɔlemɔwe lɛ. 18  Mɔ ko akalaka lɛ diɛŋtsɛ ehe: Kɛ́ nyɛteŋ mɔ ko susuɔ akɛ ehiɛ kã shi yɛ shihilɛ gbɛjianɔtoo nɛɛ* mli lɛ, etsɔ ehe kwashia, koni etsɔ hiɛshikalɔ. 19  Ejaakɛ je nɛɛ mli hiɛshikamɔ lɛ ji kwashiai asane yɛ Nyɔŋmɔ hiɛ, ejaakɛ aŋma akɛ: “Emɔɔ hiɛshikalɔi yɛ amɛ diɛŋtsɛ amɛŋaatsɔɔ mli.” 20  Ni agbɛnɛ hu: “Yehowa* le akɛ hiɛshikalɔi lɛ asusumɔi lɛ yaka ni.” 21  No hewɔ lɛ, mɔ ko akashwã efɔ̃ gbɔmɛi anɔ; ejaakɛ nii fɛɛ lɛ, nyɛnɔ ni, 22  Paulo jio, Apolo jio, Kefa* jio, je lɛ jio, wala jio, gbele jio, nibii ni yɔɔ amrɔ nɛɛ jio, nibii ni baaba lɛ jio, nii fɛɛ lɛ, nyɛnɔ ni; 23  nyɛ hu, Kristo nii ji nyɛ; Kristo hu, Nyɔŋmɔ nɔ ni.

Shishigbɛ Niŋmaa

Aloo “gbɔmɛi ni hãa Nyɔŋmɔ mumɔ lɛ kudɔɔ amɛ.”
Aloo “gbɔmɛi ni hãa nibii ni amɛshweɔ kudɔɔ amɛ.”
Aloo “hiɛ yiŋtoo kome.”
Aloo “nitsumɔi anɔkwɛlɔ ni hiɛ kã shi.”
Aloo “mɔ fɛɛ mɔ nitsumɔ baaje kpo faŋŋ.”
Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Atsɛɔ lɛ Petro hu.