Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Korintobii 2:1-16

2  No hewɔ lɛ, nyɛmimɛi, be ni miba nyɛŋɔɔ lɛ, jeee wiemɔi wuji loo hiɛshikamɔ ni eteke nɔ mikɛba ni mibajaje Nyɔŋmɔ teemɔŋ sane krɔŋkrɔŋ lɛ mitsɔɔ nyɛ.  Ejaakɛ mikpɛ mli akɛ mileŋ nɔ ko yɛ nyɛteŋ akɛ ja Yesu Kristo, kɛ gbe ni agbe lɛ yɛ tso jaŋŋ lɛ nɔ lɛ kɛkɛ.  Ni miba nyɛŋɔɔ kɛ gbedemɔ kɛ gbeyeishemɔ kɛ hekpokpomɔ babaoo;  ni miwiemɔi kɛ nɔ ni mishiɛ lɛ, jeee hiɛshikamɔ wiemɔi ni hãa mɔ yiŋ tsɔɔ mikɛtsu nii, shi moŋ wiemɔi ni jieɔ mumɔ kɛ hewalɛ kpo,  koni nyɛhemɔkɛyeli lɛ akadamɔ gbɔmɛi ahiɛshikamɔ nɔ, shi moŋ edamɔ Nyɔŋmɔ hewalɛ nɔ.  Agbɛnɛ, wɔwieɔ hiɛshikamɔ he yɛ mɛi ni edara yɛ mumɔŋ lɛ ateŋ, shi jeee shihilɛ gbɛjianɔtoo nɛɛ* mli hiɛshikamɔ loo shihilɛ gbɛjianɔtoo nɛɛ mli nɔyelɔi ni baaho aya lɛ ahiɛshikamɔ lɛ he wɔwieɔ.  Moŋ lɛ, wɔwieɔ Nyɔŋmɔ hiɛshikamɔ lɛ he yɛ teemɔŋ sane krɔŋkrɔŋ ni ji hiɛshikamɔ ni aŋɔtee lɛ mli, nɔ ni Nyɔŋmɔ kpɛ mli eto dani ato shihilɛi agbɛjianɔtoi lɛ shishi kɛhã wɔnunyam lɛ.  Hiɛshikamɔ nɛɛ ji nɔ ni shihilɛ gbɛjianɔtoo nɛɛ* mli nɔyelɔi lɛ ateŋ mɔ kome folo po náaa ale lɛ, ejaakɛ eji amɛná amɛle kulɛ, amɛgbeŋ anunyam Nuŋtsɔ lɛ.*  Shi taakɛ aŋma lɛ, akɛ: “Nibii ni Nyɔŋmɔ esaa eto mɛi ni sumɔɔ lɛ lɛ, hiŋmɛi enako ni toi hu nuko, asaŋ ebako gbɔmɔ ko tsui mli.” 10  Ejaakɛ wɔ ji mɛi ni Nyɔŋmɔ etsɔ emumɔ lɛ nɔ ejie kpo etsɔɔ wɔ, ejaakɛ mumɔ lɛ taoɔ nibii fɛɛ mli, Nyɔŋmɔ nibii ni mli kwɔlɔ lɛ po. 11  Shi gbɔmɛi ateŋ namɔ le gbɔmɔ ko he nibii akɛ ja gbɔmɔ lɛ mumɔ ni yɔɔ emli lɛ? Nakai nɔŋŋ hu, mɔ ko mɔ ko leee Nyɔŋmɔ nibii lɛ, akɛ ja Nyɔŋmɔ mumɔ lɛ. 12  Agbɛnɛ, jeee je lɛ mumɔ lɛ wɔná, shi moŋ mumɔ ni jɛ Nyɔŋmɔ ŋɔɔ lɛ, koni wɔle nibii ni Nyɔŋmɔ eŋɔduro wɔ lɛ. 13  Wɔwieɔ nibii nɛɛ hu ahe, jeee wiemɔi ni gbɔmɛi ahiɛshikamɔ tsɔɔ wɔ wɔkɛwieɔ, shi moŋ nɔ ni mumɔ lɛ tsɔɔ wɔ, be mli ni wɔkɛ mumɔŋ wiemɔi gbalaa mumɔŋ saji amli lɛ.* 14  Shi heloŋ gbɔmɔ* lɛ, ekpɛlɛɛɛ Nyɔŋmɔ mumɔ lɛ nibii lɛ anɔ,* ejaakɛ amɛji kwashiai asane kɛhã lɛ; ni enyɛŋ nomɛi ele, ejaakɛ mumɔ akɛtaoɔ nomɛi amli. 15  Shi mumɔŋ gbɔmɔ* lɛ, etaoɔ nibii fɛɛ mli, shi lɛ diɛŋtsɛ lɛ, gbɔmɔ ko gbɔmɔ ko taooo emli. 16  Ejaakɛ “namɔ ebale Yehowa* jwɛŋmɔ, ní eeetsɔɔ lɛ nii?” Shi wɔ lɛ, wɔyɛ Kristo jwɛŋmɔ lɛ.

Shishigbɛ Niŋmaa

Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
Aloo “amɛgbeŋ anunyam Nuŋtsɔ lɛ yɛ tso jaŋŋ lɛ nɔ.”
Aloo “be mli ni wɔkɛ mumɔŋ wiemɔi toɔ mumɔŋ saji ahe lɛ.”
Aloo “gbɔmɔ ni hãa nibii ni eshweɔ kudɔɔ lɛ.”
Aloo “eŋɔɔɔ Nyɔŋmɔ mumɔ lɛ nibii lɛ.”
Aloo “gbɔmɔ ni hãa Nyɔŋmɔ mumɔ lɛ kudɔɔ lɛ.”
Kwɛmɔ Wiemɔi Titrii Amligbalamɔ lɛ.