Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Korintobii 16:1-24

YITSEI LƐ AMLI SAJI

  • Onia ni atsu ahã Kristofoi ni yɔɔ Yerusalem lɛ (1-4)

  • Paulo tsɔ hiɛ eto egbɛfãa lɛ he gbɛjianɔ (5-9)

  • Ato gbɛjianɔ koni Timoteo kɛ Apolo ayasara Korintobii lɛ (10-12)

  • Hewalɛwoi kɛ ŋamɔi (13-24)

16  Agbɛnɛ nɔ ni kɔɔ onia ni atsuɔ ahãa mɛi krɔŋkrɔŋi lɛ he lɛ, nyɛbaanyɛ nyɛkɛ gbɛtsɔɔmɔi ni mikɛhã Galatia asafoi lɛ atsu nii.  Otsi fɛɛ otsi mli klɛŋklɛŋ gbi lɛ nɔ lɛ, esa akɛ nyɛteŋ mɔ fɛɛ mɔ ajɛ nɔ ni lɛ diɛŋtsɛ eyɔɔ lɛ mli eŋɔ nɔ ko eto, koni mikabashɛ shi dani atsu onia lɛ.  Shi kɛ́ mishɛ jɛmɛ lɛ, matsu hii ni nyɛbaaŋmala woji kɛkpɛlɛ amɛnɔ lɛ, koni amɛkɛ nyɛnikeenii ní nyɛjɛ mlihilɛ mli nyɛkɛhã lɛ aya Yerusalem.  Shi kɛ́ nilee yɛ mli akɛ mi hu maya jɛmɛ lɛ, no lɛ amɛbaafata mihe kɛya.  Shi kɛ́ miyatsɔ Makedonia lɛ, maba nyɛŋɔɔ, ejaakɛ mayatsɔ Makedonia;  ni ekolɛ mikɛ nyɛ baahi shi, loo maye fɛ̃i be lɛ po yɛ nyɛŋɔɔ, koni no sɛɛ lɛ, he ni maya lɛ, nyɛyajie mi gbɛ.  Ejaakɛ misumɔɔɔ akɛ minaa nyɛ amrɔ nɛɛ be ni minyiɛ gbɛfãa nɔ kɛkɛ, ejaakɛ mihiɛ kã nɔ akɛ kɛ́ Yehowa* aaaŋmɛ gbɛ lɛ, mabaye be ko yɛ nyɛŋɔɔ.  Shi mahi Efeso kɛyashi Pentekoste Gbi Jurɔ lɛ nɔ,  ejaakɛ agbele shinaa wulu ko naa ahã mi kɛhã nitsumɔ, shi shiteekɛwolɔi babaoo yɛ. 10  Agbɛnɛ, kɛji Timoteo bashɛ shi lɛ, nyɛkwɛa ni nɔ ko nɔ ko akawo ehe gbeyei be ni eyɔɔ nyɛteŋ lɛ, ejaakɛ eetsu Yehowa* nitsumɔ, tamɔ mi nɔŋŋ. 11  No hewɔ lɛ, mɔ ko akanyaŋe lɛ. Nyɛjiea lɛ gbɛ yɛ toiŋjɔlɛ mli, koni eba miŋɔɔ, ejaakɛ mi kɛ nyɛmimɛi lɛ miimɛ lɛ. 12  Agbɛnɛ, yɛ wɔnyɛmi Apolo gbɛfaŋ lɛ, miwo lɛ hewalɛ waa akɛ ekɛ nyɛmimɛi lɛ aba nyɛŋɔɔ. Etoko eyiŋ akɛ ebaaba amrɔ nɛɛ, shi kɛ́ ená hegbɛ lɛ, ebaaba. 13  Nyɛyaa nɔ nyɛshia kpe, nyɛdamɔa shi shiŋŋ yɛ hemɔkɛyeli lɛ mli, nyɛyaa nɔ nyɛfea nyɛnii tamɔ hii,* nyɛhe awaa. 14  Nyɛfea nyɛnii fɛɛ yɛ suɔmɔ mli. 15  Agbɛnɛ, nyɛmimɛi, miiwo nyɛ hewalɛ akɛ: Nyɛle Stefana shĩabii lɛ akɛ amɛji klɛŋklɛŋ yibii ni aná yɛ Akaia, ni amɛkɔ mɛi krɔŋkrɔŋi lɛ asɔɔmɔ amɛfɔ̃ amɛnɔ. 16  Nyɛ hu nyɛyaa nɔ nyɛbaa nyɛhe shi nyɛhãa mɛi ni tamɔ nakai, kɛ mɛi fɛɛ ní tsuɔ nii lɛ eko, ní amɛtsuɔ lɛ waa lɛ. 17  Shi miná miishɛɛ akɛ Stefana kɛ Fortunato kɛ Akaiko yɛ biɛ, ejaakɛ ní nyɛbɛ miŋɔɔ nɛɛ, amɛbaye nyɛnajiaŋ. 18  Ejaakɛ amɛbahã mimumɔ kɛ nyɛ hu nyɛnɔ lɛ he ejɔ lɛ. No hewɔ lɛ, nyɛhiɛ asɔa mɛi ni tamɔ nakai. 19  Asia asafoi lɛ miiŋa nyɛ. Akwila kɛ Priska kɛ asafo ni yɔɔ amɛshĩa lɛ mli lɛ miiŋa nyɛ jogbaŋŋ yɛ Nuŋtsɔ lɛ mli. 20  Nyɛmimɛi lɛ fɛɛ miiŋa nyɛ. Nyɛkɛ naashɔmɔ krɔŋkrɔŋ aŋaŋaa nyɛhe. 21  Mi Paulo, mi diɛŋtsɛ mininenaa ŋamɔ nɛ. 22  Kɛ́ mɔ ko edɔɔɔ Nuŋtsɔ lɛ he lɛ, hã etsɔ mɔ ni alomɔ lɛ. Oo wɔ-Nuŋtsɔ, ba! 23  Nuŋtsɔ Yesu duromɔ lɛ kɛ nyɛ ahi shi. 24  Misuɔmɔ lɛ kɛ nyɛ fɛɛ ahi shi yɛ Kristo Yesu mli.

Shishigbɛ Niŋmaa

Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “nyɛfea ekãa.”