Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Korintobii 12:1-31

12  Agbɛnɛ nyɛmimɛi, misumɔɔɔ akɛ nyɛfee mɛi ni leee mumɔŋ nikeenii lɛ ahe nɔ ko.  Nyɛle akɛ be ni nyɛji jeŋmajiaŋbii* lɛ, alaka nyɛ ni ahã nyɛdu gbɛ kɛtee nakai amagai ni ewieee lɛ aŋɔɔ, ni nyɛnyiɛɔ nomɛi asɛɛ kɛyaa he fɛɛ he ni amɛkpalaa nyɛ kɛyaa lɛ.  Agbɛnɛ, miisumɔ ni nyɛle akɛ mɔ ko mɔ ko bɛ ni wieɔ yɛ Nyɔŋmɔ mumɔ lɛ naa ni kɛɔ akɛ: “Yesu ji mɔ ni alomɔ lɛ!” ni mɔ ko mɔ ko nyɛŋ ekɛɛ akɛ: “Yesu ji Nuŋtsɔ!” ja yɛ mumɔ krɔŋkrɔŋ naa.  Agbɛnɛ nikeenii srɔtoi yɔɔ, shi mumɔ kome lɛ nɔŋŋ yɔɔ;  ni sɔɔmɔi srɔtoi yɔɔ, ni kɛ̃lɛ Nuŋtsɔ kome lɛ nɔŋŋ yɔɔ;  ni nitsumɔi* srɔtoi yɔɔ, ni kɛ̃lɛ Nyɔŋmɔ kome lɛ nɔŋŋ ji mɔ ni tsuɔ fɛɛ yɛ mɔ fɛɛ mɔ mli.  Shi akɛ mumɔ lɛ kpojiemɔ lɛ hãa mɔ fɛɛ mɔ yɛ yiŋtoo kpakpa hewɔ.  Ejaakɛ mɔ ko lɛ, atsɔɔ mumɔ lɛ nɔ ahãa lɛ hiɛshikamɔ wiemɔ,* mɔ kroko hu ahãa lɛ nilee yɛ nakai mumɔ lɛ nɔŋŋ naa,  mɔ kroko hu atsɔɔ nakai mumɔ lɛ nɔŋŋ nɔ ahãa lɛ hemɔkɛyeli, ni mɔ kroko hu atsɔɔ mumɔ kome lɛ nɔŋŋ nɔ ahãa lɛ helatsamɔ nikeenii, 10  mɔ ko lɛ hewalɛ nitsumɔi atsumɔ, mɔ kroko lɛ gbalɛ, mɔ kroko hu wiemɔi ni jɛ mumɔŋ lɛ asɛɛkɔmɔ, mɔ kroko hu wiemɔi srɔtoi, ni mɔ kroko hu wiemɔi ashishitsɔɔmɔ. 11  Shi mumɔ kome lɛ nɔŋŋ ni tsuɔ nitsumɔi nɛɛ fɛɛ, ni ejaa ehãa bɔ ni esumɔɔ, mɔ fɛɛ mɔ kɛ enɔ. 12  Ejaakɛ tamɔ bɔ ni gbɔmɔtso lɛ ekome ni, shi eyɛ henii pii, ni nakai gbɔmɔtso lɛ henii lɛ fɛɛ lɛ, eyɛ mli akɛ pii ni moŋ, shi gbɔmɔtso kome ni lɛ, nakai nɔŋŋ hu ji Kristo lɛ. 13  Ejaakɛ Yudafoi loo Helabii ji wɔ jio, nyɔji loo odehei ji wɔ jio, atsɔ mumɔ kome nɔ abaptisi wɔ fɛɛ awo gbɔmɔtso kome mli, ni ahã wɔ fɛɛ wɔnu mumɔ kome. 14  Ejaakɛ, anɔkwa, jeee henɔ kome feɔ gbɔmɔtso lɛ, shi moŋ henii pii. 15  Kɛ́ nanetokota kɛɛ akɛ, “Akɛni jeee nine ji mi hewɔ lɛ, mifataaa gbɔmɔtso lɛ he” lɛ, no etsɔɔɔ akɛ efataaa gbɔmɔtso lɛ he. 16  Ni kɛ́ toi kɛɛ akɛ, “Akɛni jeee hiŋmɛi ji mi hewɔ lɛ, mifataaa gbɔmɔtso lɛ he” lɛ, no etsɔɔɔ akɛ efataaa gbɔmɔtso lɛ he. 17  Kɛ́ gbɔmɔtso muu lɛ fɛɛ lɛ hiŋmɛi ni lɛ, nɛgbɛ ninumɔ yɔɔ? Kɛ́ gbɔmɔtso muu lɛ fɛɛ lɛ ninumɔ ni lɛ, nɛgbɛ nifũu yɔɔ? 18  Shi agbɛnɛ, Nyɔŋmɔ kɛ gbɔmɔtso lɛ henii lɛ ateŋ eko fɛɛ eko eto egbɛhe bɔ ni esumɔɔ. 19  Kɛ́ amɛ fɛɛ lɛ henɔ kome ni lɛ, nɛgbɛ gbɔmɔtso lɛ yɔɔ? 20  Shi agbɛnɛ henii pii ji amɛ moŋ, kɛ̃lɛ gbɔmɔtso kome ni. 21  Hiŋmɛi nyɛŋ ekɛɛ nine akɛ, “Ohe ehiaaa mi,” ni asaŋ, yitso nyɛŋ ekɛɛ nanetokotai akɛ, “Nyɛhe ehiaaa mi.” 22  Nɔ ni tamɔɔɔ nakai lɛ, gbɔmɔtso lɛ henii ni etamɔ nɔ ni amɛhe waaa lɛ, amɛhe miihia, 23  ni gbɔmɔtso lɛ henii ni wɔsusuɔ akɛ amɛhiɛ bɛ nyam tsɔ lɛ, nomɛi wɔkɛ woo kpele hãa, no hewɔ lɛ wɔhenii ni bɛ fɛo lɛ wɔhiɛɔ amɛ kɛ bulɛ kpele, 24  shi wɔhenii ni yɔɔ fɛo lɛ, nɔ ko ehiaaa amɛ. Kɛ̃lɛ Nyɔŋmɔ eto gbɔmɔtso lɛ he gbɛjianɔ, ni ekɛ woo kpele ehã henii ni hiɛ bɛ nyam lɛ, 25  koni mligbalamɔ akaba gbɔmɔtso lɛ mli, shi moŋ koni gbɔmɔtso lɛ henii lɛ asusususuu amɛhe. 26  Kɛ́ henii lɛ eko miina nɔ lɛ, henii krokomɛi lɛ fɛɛ kɛ lɛ naa nɔ; ni asaŋ kɛ́ henii lɛ eko hiɛ ba nyam lɛ, henii krokomɛi lɛ fɛɛ kɛ lɛ náa miishɛɛ babaoo. 27  Agbɛnɛ Kristo gbɔmɔtso ji nyɛ, ni akɛ aŋkroaŋkroi lɛ, nyɛteŋ mɔ fɛɛ mɔ ji ehenii lɛ eko. 28  Ni Nyɔŋmɔ kɛ nitsumɔ ewo aŋkroaŋkroi ni yɔɔ asafo lɛ mli lɛ adɛŋ: klɛŋklɛŋ lɛ, bɔfoi; nɔ ni ji enyɔ lɛ, gbalɔi; nɔ ni ji etɛ lɛ, tsɔɔlɔi; no sɛɛ lɛ, hewalɛ nitsumɔi; kɛkɛ lɛ helatsamɔ nikeenii; yelikɛbuamɔ nitsumɔi; nyɛmɔi ni akɛtsɔɔ gbɛ; kɛ wiemɔi srɔtoi. 29  Ani mɛi fɛɛ ji bɔfoi? Ani mɛi fɛɛ ji gbalɔi? Ani mɛi fɛɛ ji tsɔɔlɔi? Ani mɛi fɛɛ tsuɔ hewalɛ nitsumɔi? 30  Ani mɛi fɛɛ yɔɔ helatsamɔ nikeenii? Ani mɛi fɛɛ wieɔ wiemɔi srɔtoi? Ani mɛi fɛɛ ji wiemɔi ashishitsɔɔlɔi? 31  Shi nyɛyaa nɔ nyɛbɔa mɔdɛŋ waa ní nyɛná* nikeenii kpelei lɛ. Ni kɛ̃lɛ matsɔɔ nyɛ gbɛ ko ni nɔ bɛ.

Shishigbɛ Niŋmaa

Ni tsɔɔ akɛ, be ni amɛjeee héyelilɔi.
Aloo “nifeemɔi.”
Aloo “sane.”
Aloo “nyɛyaa nɔ nyɛkɛ hiɛdɔɔ ataoa.”