Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Korintobii 11:1-34

YITSEI LƐ AMLI SAJI

  • Nyɛkasea mi” (1)

  • Yitsoyeli kɛ yinɔhaa (2-16)

  • Nuŋtsɔ lɛ Gbɛkɛ Niyeli lɛ he gbijurɔyeli (17-34)

11  Nyɛkasea mi, tamɔ bɔ ni mi hu mikaseɔ Kristo lɛ.  Miijie nyɛyi ejaakɛ nyɛkaiɔ mi yɛ nibii fɛɛ mli, ni nyɛhiɛ kusumii* ni mikɛhã nyɛ lɛ mli bɔ pɛ ni mikɛhã nyɛ lɛ.  Shi miisumɔ ni nyɛle akɛ nuu fɛɛ nuu yitso ji Kristo lɛ; ni yoo fɛɛ yoo hu yitso ji nuu; ni Kristo lɛ hu yitso ji Nyɔŋmɔ.  Nuu fɛɛ nuu ni sɔleɔ aloo egbaa ni ekɛ nɔ ko haa eyitso nɔ lɛ, eewo eyitso lɛ hiɛgbele;  shi yoo fɛɛ yoo ni sɔleɔ aloo egbaa ni nɔ ko ehaaa eyitso nɔ lɛ, eewo eyitso lɛ hiɛgbele, ejaakɛ etamɔ yoo ni eshɛ eyi nɔŋŋ pɛ.  Ejaakɛ kɛ́ yoo ehaaa eyi nɔ lɛ, esa akɛ eku eyi; shi kɛ́ eji hiɛgbele hã yoo akɛ eeeku eyi aloo eeeshɛ eyi lɛ, esa akɛ eha eyi nɔ.  Ejaakɛ esaaa akɛ nuu haa eyitso nɔ, ejaakɛ eji Nyɔŋmɔ henɔ kɛ anunyam, shi yoo lɛ, nuu anunyam ji lɛ.  Ejaakɛ nuu jɛɛɛ yoo mli, shi yoo moŋ jɛ nuu mli.  Ni asaŋ, abɔɔɔ nuu yɛ yoo hewɔ, shi abɔ yoo moŋ yɛ nuu hewɔ. 10  No hewɔ ni esa akɛ yoo aná hegbɛ he okadi ko yɛ eyitso nɔ yɛ ŋwɛibɔfoi lɛ ahewɔ lɛ. 11  Kɛfata he lɛ, yɛ Nuŋtsɔ lɛ mli lɛ, yoo nyɛŋ atse ehe yɛ nuu he, ni nuu hu nyɛŋ atse ehe yɛ yoo he. 12  Ejaakɛ tamɔ bɔ ni yoo jɛ nuu mli lɛ, nakai nɔŋŋ nuu hu tsɔ yoo nɔ kɛba; shi nibii fɛɛ jɛ Nyɔŋmɔ mli. 13  Nyɛ diɛŋtsɛ nyɛkojoa nyɛhãa nyɛhe: Ani eja gbɛ akɛ yoo aaasɔle ehã Nyɔŋmɔ ni ehaaa eyi nɔ? 14  Ani adebɔɔ diɛŋtsɛ etsɔɔɔ nyɛ akɛ, kɛji nuu hã eyitsɔi tsa kakadaŋŋ lɛ, eji hiɛshishwiemɔ kɛhã lɛ, 15  shi kɛ́ yoo yɛ yitsɔi kakadaŋŋ lɛ eji anunyam hã lɛ? Ejaakɛ yɛ nɔ najiaŋ ni aaahã lɛ hehaanɔ lɛ, ahã lɛ eyitsɔi moŋ. 16  Shi kɛ́ mɔ ko miisumɔ ni eje enɛ he ŋwane yɛ kusum kroko hewɔ po lɛ, wɔ lɛ wɔbɛ ekroko, ni Nyɔŋmɔ asafoi lɛ hu nakai nɔŋŋ. 17  Shi be ni mikɛ gbɛtsɔɔmɔi nɛɛ hãa nyɛ lɛ, mijieee nyɛyi, ejaakɛ kɛ́ nyɛkpe lɛ nɔ ko kpakpa jɛɛɛ mli kɛbaaa, shi moŋ efɔŋ. 18  Klɛŋklɛŋ kwraa lɛ, minu akɛ, kɛ́ nyɛbua nyɛhe naa akɛ asafo lɛ, mligbalamɔi yɛ nyɛteŋ; ni miheɔ miyeɔ yɛ gbɛ ko nɔ. 19  Ejaakɛ bɔ fɛɛ bɔ ni fee lɛ jamɔ kui hu baate shi yɛ nyɛteŋ, koni mɛi ni akpɛlɛ amɛnɔ lɛ hu aje kpo faŋŋ yɛ nyɛteŋ. 20  Kɛ́ nyɛbua nyɛhe naa yɛ he kome lɛ, jeee kɛhã Nuŋtsɔ lɛ Gbɛkɛ Niyeli lɛ. 21  Ejaakɛ kɛ́ shɛ be ni abaaye lɛ, mɔ fɛɛ mɔ tsɔɔ hiɛ eyeɔ lɛ diɛŋtsɛ egbɛkɛ niyenii, ni no hewɔ lɛ be ni hɔmɔ miiye mɔ ko lɛ, mɔ kroko hu etɔ dãa. 22  Ani nyɛbɛ shĩai ni nyɛyeɔ nii ni nyɛnuɔ nii yɛ jɛmɛ? Aloo nyɛgbeɔ Nyɔŋmɔ asafo lɛ he guɔ ni nyɛkɛwoɔ mɛi ni bɛ nɔ ko lɛ hiɛgbele? Mɛni makɛɛ nyɛ? Ani mijie nyɛyi? Mijieee nyɛyi yɛ enɛ mli. 23  Ejaakɛ nɔ ni miná kɛjɛ Nuŋtsɔ lɛ dɛŋ ni mi hu miŋɔhã nyɛ lɛ ji akɛ, nakai nyɔɔŋ lɛ mli nɔŋŋ ni abaajie Nuŋtsɔ Yesu ahã lɛ, ekɔ aboloo,* 24  ni be ni eda shi lɛ, ekumɔ mli ni ekɛɛ: “Enɛ damɔ shi kɛhã* migbɔmɔtso ni abaaŋɔ ahã yɛ nyɛ hewɔ lɛ. Nyɛyaa nɔ nyɛfea enɛ kɛkaia mi.” 25  Nakai nɔŋŋ efee yɛ kpulu lɛ hu he be ni amɛye gbɛkɛ niyenii lɛ amɛtã lɛ, ni ekɛɛ: “Kpulu nɛɛ damɔ shi kɛhã kpaŋmɔ hee lɛ ni damɔ milá lɛ nɔ lɛ. Be fɛɛ be ni nyɛbaanu lɛ, nyɛfea enɛ kɛkaia mi.” 26  Ejaakɛ be fɛɛ be ni nyɛbaaye aboloo nɛɛ ni nyɛbaanu kpulu nɛɛ, belɛ nyɛmiijaje Nuŋtsɔ lɛ gbele lɛ nyɛmiitsɔɔ kɛyashi ebaaba. 27  No hewɔ lɛ, mɔ fɛɛ mɔ ni yeɔ aboloo lɛ loo enuɔ Nuŋtsɔ lɛ kpulu lɛ bɔ ni esaaa lɛ, ebaaye fɔ yɛ Nuŋtsɔ lɛ gbɔmɔtso lɛ kɛ elá lɛ gbɛfaŋ. 28  Klɛŋklɛŋ lɛ, gbɔmɔ apɛi lɛ diɛŋtsɛ emli ekwɛ akɛ esa lo, ni no dani eye aboloo lɛ eko ni enu kpulu lɛ eko. 29  Ejaakɛ mɔ ni yeɔ ni enuɔ ni ekɔɔɔ nɔ ni gbɔmɔtso lɛ damɔ shi kɛhã lɛ sɛɛ lɛ, fɔbuu kojomɔ moŋ eyeɔ ni enuɔ ehãa lɛ diɛŋtsɛ ehe lɛ. 30  No hewɔ ni nyɛteŋ mɛi babaoo egbede ni amɛhe yeɔ, ni nyɛteŋ mɛi saŋŋ miiwɔ yɛ gbele mli lɛ.* 31  Shi kɛ́ wɔyɔse bɔ ni wɔ diɛŋtsɛ wɔji lɛ, akojooo wɔ. 32  Shi kɛ́ akojo wɔ lɛ, Yehowa* miitsɔse wɔ, koni akabu wɔ kɛ je lɛ fɛɛ fɔ. 33  No hewɔ lɛ, minyɛmimɛi, kɛ́ nyɛbua nyɛhe naa kɛhã niyeli nɛɛ, nyɛmɛmɛa nyɛhe. 34  Kɛ́ hɔmɔ miiye mɔ ko lɛ, eye nii yɛ shĩa dã koni kɛ́ nyɛbabua nyɛhe naa lɛ, no akafee kojomɔ. Shi saji ni eshwɛ lɛ, kɛ́ miba jɛmɛ lɛ mabato amɛhe gbɛjianɔ.

Shishigbɛ Niŋmaa

Aloo “gbɛtsɔɔmɔi.”
Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
Kwɛmɔ Mat 26:26 sh. niŋ.
Ekã shi faŋŋ akɛ eewie mumɔŋ gbele he.
Kwɛmɔ Wiemɔi Titrii Amligbalamɔ lɛ.