Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

1 Korintobii 1:1-31

1  Paulo, ní atsɛ lɛ yɛ Nyɔŋmɔ suɔmɔ naa koni ebatsɔ Kristo Yesu bɔfo lɛ, kɛ wɔnyɛmi nuu Sostene,  kɛyahã Nyɔŋmɔ asafo ni yɔɔ Korinto lɛ, nyɛ mɛi ni atsuu nyɛhe* yɛ Kristo Yesu mli, ni atsɛ nyɛ koni nyɛbafee mɛi krɔŋkrɔŋi lɛ, kɛ mɛi fɛɛ ni yɔɔ he fɛɛ he, ni boɔ tsɛɔ wɔ-Nuŋtsɔ Yesu Kristo gbɛ́i lɛ, mɔ ni ji wɔ kɛ amɛ fɛɛ Nuŋtsɔ lɛ:  Duromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ ahã nyɛ.  Midaa mi-Nyɔŋmɔ lɛ shi daa nɛɛ yɛ nyɛhewɔ yɛ Nyɔŋmɔ duromɔ ni aŋɔhã nyɛ yɛ Kristo Yesu mli lɛ hewɔ;  ejaakɛ ahã nyɛtsɔmɔ niiatsɛmɛi yɛ nɔ fɛɛ nɔ mli, yɛ wiemɔ fɛɛ mli kɛ nilee fɛɛ mli,  tamɔ bɔ ni Kristo he odase lɛ emɔ shi jogbaŋŋ yɛ nyɛteŋ lɛ,  ni no hewɔ lɛ, nikeenii ko kwraa eshwɛɛɛ nyɛ, ni yɛ nakai be lɛ mli nɔŋŋ lɛ, nyɛkɛ miishɛɛ miimɛ wɔ-Nuŋtsɔ Yesu Kristo kpojiemɔ lɛ.  Kɛfata he lɛ, ebaahã nyɛhe awa kɛyashi naagbee, koni nyɛhe akaba shwamɔ ko yɛ wɔ-Nuŋtsɔ Yesu Kristo gbi lɛ nɔ.  Anɔkwafo ji Nyɔŋmɔ, mɔ ni tsɛ nyɛ kɛba e-Bi Yesu Kristo, wɔ-Nuŋtsɔ lɛ, naanyobɔɔ lɛ mli lɛ.* 10  Agbɛnɛ, nyɛmimɛi, miitsɔ wɔ-Nuŋtsɔ Yesu Kristo gbɛ́i lɛ nɔ miiwo nyɛ hewalɛ akɛ nyɛ fɛɛ nyɛnaabu afee ekome, ni mligbalamɔi akahi nyɛteŋ, shi moŋ nyɛjwɛŋmɔ kɛ nyɛsusumɔ afee ekome kɛwula shi. 11  Ejaakɛ, minyɛmimɛi, mɛi komɛi ni jɛ Kloe we lɛ ebabɔ mi nyɛhe amaniɛ, akɛ naataamɔi yɛ nyɛteŋ. 12  Nɔ ni mitsɔɔ ji akɛ, nyɛteŋ mɔ fɛɛ mɔ kɛɔ akɛ: “Paulo nɔ ji mi,” “Mi lɛ Apolo nɔ ji mi,” “Mi lɛ Kefa* nɔ ji mi,” “Shi mi lɛ Kristo nɔ ji mi.” 13  Ani Kristo lɛ mli egbala? Ani Paulo agbe yɛ tso jaŋŋ lɛ nɔ ahã nyɛ lɛ? Aloo akɛ, ani Paulo gbɛ́i mli abaptisi nyɛ yɛ lɛ? 14  Miida Nyɔŋmɔ shi akɛ mibaptisiii nyɛteŋ mɔ ko akɛ ja Krispo kɛ Gaio, 15  koni mɔ ko akakɛɛ akɛ abaptisi nyɛ yɛ migbɛ́i mli. 16  Hɛɛ, mibaptisi Stefana shĩabii lɛ hu. Shi mɛi ni eshwɛ lɛ, mileee kɛji mibaptisi mɔ ko mifata he dɔŋŋ. 17  Ejaakɛ Kristo tsuuu mi akɛ miyabaptisi, shi moŋ koni miyajaje sane kpakpa lɛ; ni jeee kɛ hiɛshikamɔ wiemɔi, koni Kristo piŋmɔ tso* lɛ akafee yaka. 18  Ejaakɛ piŋmɔ tso* lɛ he wiemɔi lɛ ji kwashiai asane kɛhã mɛi ni hiɛ miikpãtã lɛ, shi kɛhã wɔ mɛi ni aahere wɔyiwala lɛ, eji Nyɔŋmɔ hewalɛ. 19  Ejaakɛ aŋma akɛ: “Mahã hiɛshikalɔi lɛ ahiɛshikamɔ lɛ afite, ni makpoo nilelɔi lɛ anilee lɛ.”* 20  Nɛgbɛ hiɛshikalɔ lɛ yɔɔ? Nɛgbɛ woloŋmalɔ* lɛ yɔɔ? Nɛgbɛ shihilɛ gbɛjianɔtoo nɛɛ* naataalɔ lɛ yɔɔ? Ani Nyɔŋmɔ hãko je lɛ hiɛshikamɔ lɛ atsɔ kwashiai asane? 21  Shi yɛ Nyɔŋmɔ hiɛshikamɔ lɛ naa lɛ, akɛni je lɛ nyɛɛɛ atsɔ lɛ diɛŋtsɛ ehiɛshikamɔ lɛ nɔ ele Nyɔŋmɔ hewɔ lɛ, esa Nyɔŋmɔ hiɛ akɛ eeetsɔ kwashiai asane ni ashiɛɔ lɛ nɔ ehere mɛi ni heɔ yeɔ lɛ ayiwala. 22  Ejaakɛ Yudafoi lɛ, okadii ashi amɛbiɔ, ni Helabii hu taoɔ hiɛshikamɔ; 23  shi wɔ lɛ, Kristo ni agbe lɛ yɛ tso jaŋŋ lɛ nɔ lɛ wɔshiɛɔ, mɔ ni ji nanetɔ̃tɔmɔnɔ kɛhã Yudafoi lɛ kɛ kwashiai asane kɛhã jeŋmaji lɛ. 24  Shi mɛi ni atsɛ amɛ lɛ agbɛfaŋ lɛ, Yudafoi jio, Helabii jio, Kristo ji Nyɔŋmɔ hewalɛ kɛ Nyɔŋmɔ hiɛshikamɔ lɛ. 25  Ejaakɛ Nyɔŋmɔ nii ni abuɔ lɛ kwashiai asane lɛ hiɛ kã shi fe gbɔmɛi, ni Nyɔŋmɔ nii ni abuɔ lɛ akɛ egbede lɛ he wa fe gbɔmɛi. 26  Shi nyɛmimɛi, nyɛmiina yɛ tsɛmɔ ni etsɛ nyɛ lɛ mli akɛ, mɛi babaoo jeee hiɛshikalɔi yɛ heloo gbɛfaŋ,* mɛi babaoo jeee hewalɔi, ni mɛi babaoo jeee abladei,* 27  shi Nyɔŋmɔ hala je lɛ mli kwashiai anii lɛ koni ekɛwo hiɛshikalɔi lɛ ahiɛgbele; ni Nyɔŋmɔ hala je lɛ mli nibii ni egbede lɛ, koni ekɛwo nibii ni he wa lɛ ahiɛgbele; 28  ni Nyɔŋmɔ hala je lɛ mli nibii ni abuuu lɛ kɛ nibii ni anyaŋeɔ lɛ, nibii ni bɛ lɛ, koni ekɛhã nibii ni yɔɔ lɛ afee yaka, 29  koni mɔ ko mɔ ko* akashwã yɛ Nyɔŋmɔ hiɛ. 30  Shi lɛ ehewɔ nyɛ kɛ Kristo Yesu efee ekome lɛ, mɔ ni ebatsɔ hiɛshikamɔ ni jɛ Nyɔŋmɔ ŋɔɔ, kɛ agbɛnɛ hu, jalɛ kɛ hetsuumɔ kɛ jiemɔ kɛtsɔ kpɔmɔnɔ lɛ nɔ ehã wɔ lɛ, 31  koni eba mli tamɔ bɔ ni aŋma lɛ, akɛ: “Mɔ ni shwãa lɛ, eshwã efɔ̃ Yehowa* nɔ.”

Shishigbɛ Niŋmaa

Aloo “mɛi ni asaa nyɛ ato ahã Nyɔŋmɔ.”
Aloo “tsɛ nyɛ koni nyɛbatsɔmɔ . . . hefatalɔi lɛ.”
Atsɛɔ lɛ Petro hu.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “matswa nilelɔi lɛ anilee lɛ mafɔ̃ afã.”
Ni tsɔɔ akɛ, mɔ ni le Mla lɛ mli jogbaŋŋ.
Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
Aloo “yɛ gbɔmɛi ataomɔ nii anaa.”
Aloo “jɛɛɛ wekui ní abuɔ amɛ waa amli.”
Sht. ŋm., “heloo ko.”
Kwɛmɔ Wiemɔi Titrii Amligbalamɔ lɛ.