Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

SAJI NI OBLAHII KƐ OBLAYEI BIƆ

Ani Esa akɛ Wɔgbala Mli?—Fã 2

Ani Esa akɛ Wɔgbala Mli?—Fã 2

Kɛ́ okpɛ mli akɛ oosumɔ ni nyɛgbala mli lɛ, klɛŋklɛŋ lɛ, taomɔ be ni sa kɛ he ni sa kɛhã sane lɛ he susumɔ. Mɛni enɛ tsɔɔ?

Ojogbaŋŋ, susumɔ bɔ ni obaasumɔ ni akɛ bo aye ahã lɛ he okwɛ. (Mateo 7:12) Ani obaasumɔ ni akɛɛ bo sane tamɔ nɛkɛ yɛ mɛi ahiɛ? Kɔkɔɔkɔ.

Ebafeŋ nɔ ni ja akɛ abaatsɔ tɛlifoŋ, tɛs mɛsej, loo e-mail nɔ afo nyiɛmɔ ni tsɔɔ gbalashihilɛ hiɛ lɛ mli, ja shihilɛ lɛ ebi ni afee nakai. No najiaŋ lɛ, halamɔ be ni baahi kɛ he ni sa ni nyɛbaanyɛ nyɛsusu hiɛdɔɔ sane nɛɛ he yɛ.

Kɛ́ be shɛ ni okɛbaajie osusumɔi lɛ akpo lɛ, mɛni esa akɛ owie? Bɔfo Paulo wo Kristofoi hewalɛ ni amɛkɛ amɛhe “awie anɔkwale.”Efesobii 4:25.

Belɛ, gbɛ ni hi fe fɛɛ ji ni okɛ hiɛshikamɔ kɛ shiŋŋfeemɔ baatsu nii. Hã nɔ hewɔ ni osusuɔ akɛ nyɛnyɛŋ nyɛtsa nyiɛmɔ lɛ nɔ lɛ afee faŋŋ.

Ehe ehiaaa ni owieɔ etɔmɔi ahe babaoo, loo otsĩɔ nibii fɛɛ ni efeɔ ni osumɔɔɔ lɛ atã. Nɔ najiaŋ ni obaakɛɛ akɛ, Ofeee enɛ kɛ enɛ” loo Ofeko nɛkɛ dã” lɛ, ebaahi jogbaŋŋ akɛ obaagbala bɔ ni onuɔ he ohãa lɛ mli otsɔɔ lɛ—tamɔ, Miitao mɔ ni . . .” loo Misusuɔ akɛ, esa akɛ wɔfo nyiɛmɔ nɛɛ sɛɛ, ejaakɛ . . .”

Jeee be ni esa akɛ ohã oyiŋ afee bo enyɔɔnyɔ nɛ. Kaimɔ akɛ, oosumɔ ni nyɛgbala mli yɛ yiŋtoo ko ni yɔɔ hiɛdɔɔ hewɔ. No hewɔ lɛ, hã ohiɛ ahi ohe nɔ koni onanemɛi akatsɔ gbɛ ni yɔɔ nigii nɔ amɛkɔne oyiŋ ni otsake ojwɛŋmɔ. Oblayoo ko ni atsɛɔ lɛ Lori lɛ kɛɛ akɛ, “Be ni mi kɛ oblanyo ni no mli lɛ mikɛ lɛ nyiɛ kɛhã gbalashihilɛ lɛ gbala mli lɛ, be fɛɛ be lɛ, efee enii mɔbɔmɔbɔ. Efeɔ mi akɛ efee nakai koni mana lɛ mɔbɔ. Ni enii fee mi mɔbɔ hu. Shi mihãaa enifeemɔ lɛ ahã matsake mijwɛŋmɔ.” Taakɛ Lori fee lɛ, esa akɛ ole nɔ ni otaoɔ. Hii shi yɛ oyiŋkpɛɛ lɛ naa. Hã owiemɔ dabi afee dabi.Yakobo 5:12.