Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kɛ́ Mitsɔɔlɔ lɛ Sumɔɔɔ Misane Hu?

Kɛ́ Mitsɔɔlɔ lɛ Sumɔɔɔ Misane Hu?

Too otsui shi ni osusu nii ahe!

Susumɔ Rachel nɔkwɛmɔnɔ lɛ he okwɛ. Kulɛ, Rachel ni eye afi 16 lɛ náa A kɛ B yɛ skul nifeemɔi lɛ amli, ni tsɔɔ akɛ ebɔɔ mɔdɛŋ waa yɛ skul. Kɛkɛ ni be ni eshɛ JHS 1 (grade 7) lɛ, nibii batsake kwraa. Rachel kɛɛ akɛ: “Mitsɔɔlɔ lɛ fee nɔ fɛɛ nɔ ni ebaanyɛ koni ehã makpe aloo mafeeli.” Mɛni ji naagba lɛ? Tsɔɔlɔ lɛ fee lɛ faŋŋ ehã Rachel kɛ emami akɛ, esumɔɔɔ amɛjamɔ lɛ.

Skul tsɔɔlɔi bafeɔ tamɔ tɛi ni ato yɛ faa mli ni anaanaa nɔ kɛfoɔ, ní tsɔɔ akɛ amɛbaanyɛ amɛye amɛbua bo koni ofo mli kɛyashɛ nilee mli, kɛ̃lɛ, esa akɛ bo diɛŋtsɛ ofamɔ onaji

Mɛni ba? Rachel kɛɛ akɛ: “Be fɛɛ be ni nibii baafee faŋŋ akɛ tsɔɔlɔ lɛ ehã mihe jwɛŋmɔ ni ejaaa ni ená lɛ esa miskul nifeemɔ ni emaaki lɛ he lɛ, mimami kɛ mi baa skul lɛ, ni ekɛ lɛ basusuɔ sane lɛ he. Fiofio lɛ, tsɔɔlɔ lɛ bakpa minaagbamɔ.”

Kɛ́ okɛ naagba ni tamɔ nɛkɛ kpe lɛ, ná ekãa ni okɛ ofɔlɔi awie he. Ekã shi faŋŋ akɛ, amɛbaasumɔ ni amɛkɛ tsɔɔlɔ lɛ, aloo skul nɔkwɛlɔi lɛ ayawie, koni akwɛ nɔ ni abaanyɛ atsu yɛ sane lɛ he.

Anɔkwa, bei komɛi lɛ nibii egbeŋ naa jogbaŋŋ. Bei komɛi lɛ, nɔ pɛ ni obaanyɛ ofee ji ní okpee naa. (Romabii 12:17, 18) Oblayoo ko ni atsɛɔ lɛ Tanya, ni eye afii 16 lɛ kɛɛ akɛ: “Mitsɔɔlɔi lɛ ateŋ mɔ kome kɛ skulbii ni etsɔɔ amɛ nii lɛ yeee jogbaŋŋ kwraa. Ejɛɔ wɔ akɛ buului ji wɔ. Klɛŋklɛŋ kwraa ni efee nakai lɛ mifo, shi mibayɔse akɛ esaaa akɛ mikɛ mijwɛŋmɔ yaa ejɛmɔi lɛ anɔ. Mikɛ mijwɛŋmɔ ma miskul nikasemɔ lɛ nɔ; anɔkwa mikɛshwɛɛɛ kwraa. Enɛ hã ekpa minaagbamɔ fioo, ni mifata mɛi fioo ni bɔ mɔdɛŋ yɛ eklas lɛ ahe. Afii enyɔ sɛɛ lɛ, ashwie nakai tsɔɔlɔ lɛ yɛ skul lɛ.”

Sane lɛ nɔŋŋ ji akɛ: Esa akɛ okase bɔ ni okɛ tsɔɔlɔ ni sumɔɔɔ osane lɛ baahi shi ahã, no baahã oná su ko ni he hiaa waa yɛ shihilɛ mli—su ni baanyɛ aye abua bo wɔsɛɛ koni onyɛ okɛ obɔs ni sumɔɔɔ osane lɛ atsu nii. (1 Petro 2:18) Enɛ hu baaye abua bo koni kɛ́ oná tsɔɔlɔi kpakpai lɛ, ohiɛ asɔ amɛ jogbaŋŋ.