Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

SAJI NI OBLAHII KƐ OBLAYEI BIƆ

Mɛni Esa akɛ Male yɛ Tɛst Mɛsej kɛ Ehenɔi lɛ Ahe?

Mɛni Esa akɛ Male yɛ Tɛst Mɛsej kɛ Ehenɔi lɛ Ahe?
  • :-) Kɛ́ okɛ tɛst mɛsej kɛ ehenɔi lɛ tsu nii yɛ hiɛshikamɔ mli lɛ, ebaaye ebua bo ni onyɛ okɛ onanemɛi ashara jogbaŋŋ.

  • :-( Kɛ́ okɛtsuuu nii jogbaŋŋ lɛ, ebaanyɛ efite okɛ onanemɛi ateŋ—ni ebaanyɛ efite ogbɛ́i po.

Sane nɛɛ baatsɔɔ bo nɔ ni esa akɛ ole yɛ nibii ni nyiɛ sɛɛ nɛɛ ahe:

  • Namɔ esa akɛ osɛndi lɛ tɛst mɛsej kɛ ehenɔi lɛ?

  • Mɛɛ saji esa akɛ osɛndi?

  • Mɛɛ be esa akɛ osɛndi tɛst mɛsej kɛ ehenɔi lɛ?

Saji krokomɛi ni fata he:

  • Ŋaawoi yɛ tɛst mɛsej kɛ ehenɔi lɛ ahe

  • Tɛst mɛsej kɛ ehenɔi lɛ ahe sanebimɔi komɛi

Namɔ esa akɛ osɛndi lɛ tɛst mɛsej kɛ ehenɔi lɛ

Oblahii kɛ oblayei pii naa tɛst mɛsej kɛ ehenɔi lɛ akɛ gbɛ ni hi fe fɛɛ ni atsɔɔ nɔ akɛ mɛi gbaa sane. Tɛst mɛsej kɛ ehenɔi lɛ hãa onyɛɔ okɛ mɔ fɛɛ mɔ ni oyɔɔ enɔmba loo e-mail adrɛs lɛ sharaa—ja ofɔlɔi egu bo nakai feemɔ.

“Mipapa sumɔɔɔ ni mi kɛ minyɛmi yoo lɛ kɛ hii gbaa sane yɛ mobail foŋ nɔ. Kɛ́ wɔkɛ nuu ko baagba sane po lɛ, no lɛ esa akɛ wɔfee nakai yɛ tɛlifoŋ ni yɔɔ asa lɛ nɔ lɛ nɔ, be ni mɛi krokomɛi yɛ jɛmɛ.”—Lenore.

Nɔ ni esa akɛ ole: Kɛ́ okɛ onɔmba hã mɔ fɛɛ mɔ kɛkɛ lɛ, ebaanyɛ ekɛ bo awo oshara mli.

“Kɛ́ okwɛɛɛ ohe nɔ jogbaŋŋ yɛ mɛi ni okɛ onɔmba hãa lɛ ahe lɛ, abaanyɛ akɛ tɛst mɛseji loo mfonirii ni osumɔɔɔ asɛndi bo.”—Scott.

“Kɛ́ yoo ji bo ni ofɔɔ nuu ko tɛstimɔ, loo nuu ji bo ni ofɔɔ yoo ko tɛstimɔ lɛ, ewaaa kwraa akɛ obaaná suɔmɔ ohã mɔ lɛ.”—Steven.

Biblia lɛ kɛɔ akɛ: Hiɛtɛ̃lɔ naa efɔŋ ní baa, ni eteɔ ehe.” (Abɛi 22:3.) Kɛji okwɛ ohe nɔ jogbaŋŋ lɛ, obaanyɛ oye ohe kɛje naagbai pii ahe.

Sane ko ni ba diɛŋtsɛ: Mikɛ oblanyo ko bɔi naanyo bɔɔ, ni wɔtɛstiɔ wɔhe waa. Misusu akɛ nanemɛi kɛkɛ ji wɔ. Shi mileee akɛ naagba ko yɛ bɔ ni mikɛ lɛ bɔɔ gbagbalii lɛ he, kɛyashi be ko ni ekɛɛ mi akɛ etsui emɔ mi, ni ená suɔmɔ ehã mi. Kɛ́ misusu nɔ ni ba lɛ he, minuɔ he akɛ kulɛ esaaa akɛ mikɛ lɛ bɔɔ gbagbalii, ni mitɛstiɔ lɛ waa nakai.—Melinda.

Susumɔ he okwɛ: Amrɔ nɛɛ ni oblanyo lɛ ehã Melinda ele akɛ ená suɔmɔ ehã lɛ lɛ, te osusuɔ akɛ no baasa amɛnaanyobɔɔ lɛ he tɛŋŋ?

Kulɛ, mɛni esa akɛ efee? Mɛni kulɛ Melinda baanyɛ afee koni nɔ ni ba lɛ akaba, ni ekɛ oblanyo lɛ sharamɔ lɛ afee naanyobɔɔ kɛkɛ?

Mɛɛ saji esa akɛ osɛndi?

Tɛst mɛseji kɛ ehenɔi lɛ asɛndimɔ yɛ mlɛo waa—ni kɛ́ onine shɛ eko nɔ lɛ, eyɛ miishɛɛ—ni no hãa kɛ́ mɔ ko miisɛndi eko lɛ, ewaaa akɛ ehiɛ baakpa nɔ akɛ abaanyɛ anu nɔ ni esɛndiɔ lɛ shishi ekroko.

Nɔ ni esa akɛ ole: Abaanyɛ anu saji ni atsɔɔ tɛst mɛsej kɛ ehenɔi lɛ anɔ akɛmajeɔ lɛ ashishi yɛ gbɛ kroko nɔ.

“Kɛ́ ootɛst mɔ ko lɛ, mɔ lɛ nyɛŋ ena bɔ tuuntu ni onuɔ he ohãa kɛ bɔ ni otaoɔ owie nakai sane lɛ yɛ sane ni okɛmajeɔ lɛ lɛ mli—kɛ́ okɛ okadii po fata sane lɛ he. Ebaanyɛ ekɛ naataamɔi aba.”—Briana.

“Mile oblayei komɛi ni yɛ saji komɛi ni amɛsɛndi amɛhã oblahii komɛi hewɔ lɛ, anaa amɛ akɛ amɛsumɔɔ hii waa, ni enɛ efite amɛgbɛ́i.”—Laura.

Biblia lɛ kɛɔ akɛ: Mɛi kpakpai susuɔ sane he dani amɛhãa hetoo.” (Abɛi 15:28, Good News Translation) Mɛni wɔkaseɔ yɛ ŋmalɛ nɛɛ mli? Kɛ́ obaasɛndi sane ko lɛ, kanemɔ lɛ jogbaŋŋ dani osɛndi!

Mɛɛ be esa akɛ osɛndi tɛst mɛsej kɛ ehenɔi lɛ?

Kɛ́ okɛ hiɛshikamɔ tsu nii lɛ, obaanyɛ ole bei amli ni kɛ́ oosɛndi tɛst mɛsej kɛ ehenɔi lɛ ehi.

Nɔ ni esa akɛ ole: Kɛ́ okwɛɛɛ ohe nɔ jogbaŋŋ yɛ bɔ ni otɛstiɔ he lɛ, abaana bo akɛ obuuu mɔ, ni nɔ najiaŋ ni onanemɛi kɛ bo baabɔ lɛ, amɛbaatsi amɛhe yɛ ohe.

“Ewaaa akɛ ohiɛ baaje ohe nɔ yɛ be ni esa akɛ otɛst lɛ he. Bei komɛi lɛ, ebaa lɛ akɛ be ni mikɛ mɔ ko miigba sane loo mikɛ mɛi ta okpɔlɔ he wɔmiiye nii lɛ, nakai beiaŋ nɔŋŋ lɛ miitɛst mɔ ko.”—Allison.

“Eyɛ oshara waa akɛ obaatɛst mɛi be ni oodraivi. Kɛ́ ojie ohiɛ yɛ gbɛ lɛ nɔ lɛ, obaanyɛ oná oshara.”—Anne.

Biblia lɛ kɛɔ akɛ: Nɔ fɛɛ nɔ yɛ ebe ní ato, . . . dioofeemɔ be yɛ, ni wiemɔ be yɛ.” (Jajelɔ 3:1, 7) Sane nɛɛ bafeɔ anɔkwale yɛ tɛstimɔ gbɛfaŋ taakɛ eji yɛ wiemɔ gbɛfaŋ lɛ!

Tɛstimɔ he ŋaawoi

Namɔ esa akɛ osɛndi lɛ tɛst mɛsej kɛ ehenɔi lɛ?

  • ;-) Okɛ ŋaawoi ni ofɔlɔi kɛhãa bo lɛ atsu nii.Kolosebii 3:20.

  • ;-) Okɛ onɔmba akahã mɔ fɛɛ mɔ kɛkɛ. Kɛ́ ojɛɔ bulɛ mli okpoɔ akɛ okɛ ohe saji—ni ofoŋ nɔmba hu fata he lɛ—baahã mɛi lɛ, onáa hesai ni he baahia bo be ni odaa lɛ.

  • ;-) Kɛ́ okɛ mɔ ko bako gbeekpamɔ akɛ nyɛbaabote gbalashihilɛ mli lɛ, okɛ saji ni baahã mɔ lɛ anu he akɛ osumɔɔ lɛ lɛ akamaje lɛ. Kɛ́ jeee nakai lɛ nyɛbaaná suɔmɔ nyɛhã nyɛhe, ni enɛ kɛ naagbai pii baaba.

“Yɛ foŋ kɛ nitsumɔ gbɛfaŋ lɛ, mifɔlɔi yɛ hekɛnɔfɔɔ yɛ mimli akɛ mikɛtsuuu nii bɔ ni esaaa, no hewɔ lɛ amɛshiɔ mi koni mahala mɛi ni masumɔ ni mikɛ amɛnɔmbai awo mifoŋ lɛ nɔ.—Briana.

Mɛɛ saji esa akɛ osɛndi?

  • ;-) Dani obaabɔi sane ni obaasendi lɛ taipimɔ lɛ, bi ohe akɛ, ‘Yɛ shihilɛ nɛɛ mli lɛ, ani tɛstimɔ ji gbɛ ni ja ni esa akɛ matsɔ nɔ mikɛ mɔ nɛɛ awie?’ Ekolɛ, ebaahi akɛ obaatswa mɔ lɛ loo omɛ koni okɛ mɔ lɛ awie hiɛ kɛ hiɛ.

  • ;-) Okɛ saji ni onyɛŋ okɛɛ mɔ lɛ hiɛ kɛ hiɛ lɛ akamaje lɛ. Oblayoo ko ni atsɛɔ Sarah, ni eye afii 23 lɛ, wie akɛ: “Kɛ́ ole akɛ esaaa akɛ akɛ naabu wieɔ lɛ, belɛ, esaaa akɛ akamajeɔ hu.

“Kɛ́ mɔ ko kɛ yakayaka mfoniri ko maje bo lɛ, kɛɛmɔ ofɔlɔi. Enɛ baabu ohe, ni ebaahã ofɔlɔi aná hekɛnɔfɔɔ yɛ omli.”—Sirvan,

Mɛɛ be esa akɛ osɛndi tɛst mɛseji kɛ ehenɔi lɛ?

  • ;-) Tsɔ hiɛ okpɛ oyiŋ yɛ bei ni okɛ omobail foŋ lɛ tsuŋ nii lɛ he. Oblayoo ko ni atsɛɔ lɛ Olivia lɛ wie akɛ: “Kɛ́ mikɛ mɛi tara shi wɔmiiye nii, loo miikase nii lɛ, mihãaa mifoŋ lɛ ahi mihe. Kɛ́ miyɛ Kristofoi akpeei ashishi lɛ, migbeɔ mifoŋ lɛ, bɔ ni afee ni ekaba akɛ makwɛ nɔ.

  • ;-) Susumɔ mɛi krokomɛi ahe. (Filipibii 2:4) Kɛ́ okɛ mɔ ko miigba sane hiɛ kɛ hiɛ lɛ, kaasɛndi tɛst mɛsej.

“Miwo mihe mlai; eko ji akɛ, kɛ́ miyɛ minanemɛi ateŋ lɛ mitɛstiŋ mɔ ko, ja ehe miihia ni mafee nakai. Kɛfata he lɛ, mikɛ minɔmba hãaa mɛi ni mileee amɛ.”—Janelly.