Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

OBLAHII KƐ OBLAYEI BIƆ AKƐ

Ani Mishɛ Mɔ ni Sa akɛ Ekɛ Mɔ ko Anyiɛ Kɛhã Gbalashihilɛ?

Ani Mishɛ Mɔ ni Sa akɛ Ekɛ Mɔ ko Anyiɛ Kɛhã Gbalashihilɛ?
  • Mɛni ji nyiɛmɔ ni tsɔɔ gbalashihilɛ hiɛ?

  • Mɛni ji yiŋtoo ni yɔɔ nyiɛmɔ ni tsɔɔ gbalashihilɛ hiɛ lɛ sɛɛ?

  • Ani mishɛ mɔ ni sa akɛ ekɛ mɔ ko anyiɛ kɛhã gbalashihilɛ?

  • Mɛni hewɔ esa akɛ omɛ koni oshɛ dani oje nyiɛmɔ ni tsɔɔ gbalashihilɛ hiɛ shishi?

Mɛni ji nyiɛmɔ ni tsɔɔ gbalashihilɛ hiɛ?

  • Ŋɔɔ lɛ akɛ yoo ji bo ni okɛ nuu ko fɔɔ kpojee, loo nuu ji bo ni okɛ yoo ko fɔɔ kpojee. Ani eji nyiɛmɔ ni tsɔɔ gbalashihilɛ hiɛ?

  • Ŋɔɔ lɛ akɛ yoo ji bo ni oná nuu ko he miishɛɛ, ni lɛ hu ená ohe miishɛɛ. Nyɛfɔɔ nyɛhe tɛstimɔ, ni nyɛgbaa sane yɛ foŋ nɔ shii abɔ yɛ gbi lɛ mli. Ani eji nyiɛmɔ ni tsɔɔ gbalashihilɛ hiɛ?

  • Ekolɛ nuu ji bo, ni be fɛɛ be kɛ́ oyɛ onanemɛi ateŋ lɛ, osumɔɔ akɛ okɛ yoo pɔtɛɛ ko agba sane loo nyɛtse nyɛhe; loo ekolɛ yoo ji bo ni bo hu ofeɔ nakai. Ani eji nyiɛmɔ ni tsɔɔ gbalashihilɛ hiɛ?

Klɛŋklɛŋ sanebimɔ lɛ hetoohamɔ ebawaŋ kɛhaŋ bo. Shi ekolɛ obaashashao shi fioo dani obaahã sanebimɔ ni ji enyɔ kɛ etɛ lɛ ahetoo. Mɛni tuuntu ji nyiɛmɔ ni tsɔɔ gbalashihilɛ hiɛ?

Anɔkwa, eji sharamɔ krɛdɛɛ ko loo nifeemɔ ko ni yaa nɔ yɛ nuu ko kɛ yoo pɔtɛɛ ko teŋ, loo yoo ko kɛ nuu pɔtɛɛ ko teŋ, akɛni mɛi enyɔ lɛ yɛ suɔmɔ ko kɛhã amɛhe lɛ hewɔ.

No hewɔ lɛ, sanebimɔi etɛ nɛɛ eko fɛɛ eko hetoo ji hɛɛ. Kɛ́ yoo ji bo ni okɛ nuu ko fɔɔ sanegbaa yɛ foŋ nɔ jio, hiɛ kɛ hiɛ jio, teemɔŋ jio, loo nuu ji bo ni okɛ yoo ko feɔ nakai, ni nyɛjieɔ suɔmɔ kpo nyɛtsɔɔ nyɛhe yɛ wiemɔ loo nifeemɔ mli lɛ, no lɛ eji nyiɛmɔ ni tsɔɔ gbalashihilɛ hiɛ.

Mɛni ji yiŋtoo ni yɔɔ nyiɛmɔ ni tsɔɔ gbalashihilɛ hiɛ lɛ sɛɛ?

Esa akɛ yiŋtoo kpakpa ahi nyiɛmɔ ni tsɔɔ gbalashihilɛ hiɛ lɛ he—no ji koni eye ebua nuu kɛ yoo kɛkwɛ akɛ amɛsa kɛhã amɛhe akɛ gbalashihilɛ mli hefatalɔi lo.

Eji anɔkwale akɛ onanemɛi lɛ ekomɛi ebuŋ nifeemɔ nɛɛ akɛ nɔ ko ni yɔɔ hiɛdɔɔ. Kɛ́ yoo ni lɛ, ekolɛ enáa he miishɛɛ kɛkɛ akɛ ekɛ nuu pɔtɛɛ ko baabɔ naanyo, shi jeee akɛ gbalashihilɛ yɛ ehiɛ; nakai nɔŋŋ hii komɛi hu feɔ. Mɛi komɛi po buɔ naanyobɔɔ ni tamɔ enɛ lɛ akɛ juromɔnɔ ko loo nɔ ko ni amɛná ni amɛkɛbaashi amɛtsitsi.

Bei pii lɛ, naanyobɔɔ ni tamɔ nɛkɛ lɛ sɛɛ etɛɛɛ kwraa. Oblayoo ko ni atsɛɔ lɛ Heather lɛ kɛɛ akɛ: “Oblahii kɛ Oblayei babaoo jeɔ nyiɛmɔ nɛɛ shishi, shi otsi loo otsii enyɔ ko pɛ eyeɔ. Amɛbanaa nyiɛmɔ ni tsɔɔ gbalashihilɛ hiɛ akɛ shihilɛ ko ni atsɔɔ mli, ni yɛ gbɛ ko nɔ lɛ, ehãa amɛleɔ bɔ ni atseɔ gbãla moŋ fe gbãla mli botemɔ.”

Kɛ́ okɛ mɔ ko nyiɛ kɛhã gbalashihilɛ, shi jeee ojwɛŋmɔ ji akɛ okɛ mɔ lɛ baabote gbãla mli lɛ, otamɔ gbekɛ ko ni kɛ́ ená tsobi hee lɛ, ekɛshwɛɔ kɛkɛ lɛ eshɛ efɔ̃

Eyɛ faŋŋ akɛ, kɛ́ nuu ji bo ni okɛ yoo ko bɔi nyiɛmɔ, loo yoo ji bo ni okɛ nuu ko bɔi nyiɛmɔ lɛ, enáa suɔmɔ ehãa bo. No hewɔ lɛ, kwɛmɔ ni okɛ ehenumɔi akashwɛ.Luka 6:31.

Susumɔ enɛ he okwɛ: Ani obaasumɔ ni mɔ ko kɛ ohenumɔi ashwɛ tamɔ akɛ tsobi ko shwɛɔ fioo kɛkɛ lɛ aŋmɛɛ he afɔ̃ shi lɛ? Belɛ, kaafee mɔ ko nakai! Biblia lɛ kɛɔ akɛ, suɔmɔ “efeee nii ni bulɛ bɛ he.”1 Korintobii 13:4, 5.

Oblayoo ko ni atsɛɔ lɛ Chelsea lɛ kɛɛ akɛ: “Bei komɛi lɛ, misusuɔ akɛ nyiɛmɔ ni tamɔ nakai lɛ ji naanyobɔɔ ko kɛkɛ. Shi esaaa akɛ wɔbuɔ no akɛ naanyobɔɔ kɛkɛ, titri lɛ kɛ́ mɔ ni okɛnyiɛ lɛ ebuuu lɛ nakai.”

Ŋaawoo: Bɔ ni afee ni osaa ohe kɛhã nyiɛmɔ ni tsɔɔ gbalashihilɛ hiɛ kɛ gbalashihilɛ mli botemɔ lɛ, kanemɔ 2 Petro 1:5-7 lɛ, ni okwɛ sui ni atsɔɔ yɛ jɛmɛ lɛ ateŋ nɔ ni esa akɛ otsu he nii. Nyɔɔŋ kome sɛɛ lɛ, kwɛmɔ akɛ nɛgbɛ onyɛ otsu nakai su lɛ he nii kɛshɛ.

Ani mishɛ mɔ ni sa akɛ ekɛ mɔ ko anyiɛ kɛhã gbalashihilɛ?

  •  Kɛ́ okwɛ lɛ, afii enyiɛ esa akɛ mɔ ko aná dani ekɛ mɔ ko abɔi nyiɛmɔ kɛhã gbalashihilɛ?

  •  Agbɛnɛ bi ofɔlɔi sane nɛɛ nɔŋŋ.

Ekolɛ, ebaasoro ohetoo lɛ yɛ amɛnɔ lɛ he. Aloo ohetoo lɛ baatamɔ amɛnɔ lɛ! Ekolɛ, ofata oblahii kɛ oblayei babaoo ni kɛ hiɛshikamɔ mɛɔ ni amɛda saŋŋ koni amɛnyɛ amɛle amɛhe jogbaŋŋ dani amɛbote gbalashihilɛ mli lɛ ahe.

Nakai ji bɔ ni Danielle, ni eye afii 17 lɛ, kpɛ mli akɛ ebaafee. Ekɛɛ akɛ: “Kɛ́ mikwɛ afii enyɔ ni eho nɛɛ, nibii ni kulɛ matao akɛ mana yɛ mɔ ko ni mikɛ lɛ baanyiɛ kɛhã gbalashihilɛ lɛ he lɛ yɛ srɔto kwraa yɛ nibii ni mitaoɔ amrɔ nɛɛ ahe. Anɔkwa, amrɔ nɛɛ po lɛ, efeee mi akɛ manyɛ makpɛ yiŋ ni ja yɛ sane nɛɛ he. Kɛ́ mina akɛ misu kɛ minifeemɔi etsake bɔ ni sa lɛ, afii fioo ko mli lɛ, makwɛ akɛ maná mɔ ko kɛnyiɛ kɛhã gbalashihilɛ lo.”

Yiŋtoo kroko hu yɛ ni maa nɔ mi akɛ, nilee yɛ mli akɛ wɔbaato wɔtsui shi. Kɛ́ oblahii kɛ oblayei da kɛshɛ he ko lɛ, henumɔi ni amɛnáa kɛhã bɔlɛnamɔ, kɛ henumɔ ni amɛnáa akɛ amɛná suɔlɔ ko lɛ mli bawaa waa; Biblia lɛ tsɛ be nɛɛ akɛ “oblahiiaŋ loo oblayeiaŋ.” (1 Korintobii 7:36) Kɛ́ oshɛ nɛkɛ be nɛɛ mli ni nuu ji bo, ni okɛ yoo ko bɔɔ gbagbalii, loo yoo ji bo, ni okɛ nuu ko bɔɔ gbagbalii lɛ, ewaaa kwraa akɛ nyɛbɔlɛnamɔ henumɔi mli baawa waa, ni ebaatsirɛ nyɛ ni nyɛkɛ nyɛhe baawo jeŋba sha mli.

Anɔkwa, ekolɛ otipɛŋfoi lɛ ebuŋ lɛ nɔ ko kwraa. Amɛteŋ mɛi babaoo baasumɔ ni amɛka bɔlɛnamɔ amɛkwɛ. Shi obaanyɛ oye ohe nɔ—ni esa akɛ oye ohe nɔ hu! (Romabii 12:2) Ejaakɛ Biblia lɛ miiwo bo hewalɛ ni ‘ojo bɔlɛnamɔ jeŋba sha naa foi.’ (1 Korintobii 6:18.) Kɛ́ oto otsui shi kɛyashi ofo mli yɛ oblahiiaŋ loo oblayeiaŋ lɛ, obaaye ohe kɛje haomɔ he.Jajelɔ 11:10.

Mɛni hewɔ esa akɛ omɛ koni oshɛ dani oje nyiɛmɔ ni tsɔɔ gbalashihilɛ hiɛ shishi?

Kɛ́ aanyɛ onɔ koni oje nyiɛmɔ ni tsɔɔ gbalashihilɛ hiɛ lɛ shishi, be ni oshɛko nakai feemɔ lɛ, etamɔ nɔ ni aanyɛ onɔ ni oŋma naagbee kaa ko, be ni okaseko he nɔ ko kwraa. Eyɛ faŋŋ akɛ ebafeŋ nɔ ni hi kwraa! Esa akɛ oná be kɛkase saji ni abaaka bo yɛ he lɛ he nii jogbaŋŋ, koni ole naagbai ni obaanyɛ okɛkpe yɛ kaa lɛ mli.

Nakai nɔŋŋ eji yɛ nyiɛmɔ ni tsɔɔ gbalashihilɛ hiɛ lɛ he.

Nyiɛmɔ ni tsɔɔ gbalashihilɛ hiɛ lɛ ji hiɛdɔɔ sane, esaaa akɛ obuɔ lɛ nɔ ko flɛflɛ. No hewɔ lɛ, dani okɛ ojwɛŋmɔ baama mɔ ko pɔtɛɛ nɔ lɛ, esa akɛ oná be kɛkase nɔ ko ni hiaa waa, no ji naanyobɔɔ.

Sɛɛ mli kɛ́ oná mɔ ni sa lɛ, ebaahã nyɛnyiɛmɔ lɛ amɔ shi jogbaŋŋ. Ejaakɛ kɛ́ nuu kɛ yoo ni amɛle amɛhe jogbaŋŋ ni sumɔɔ amɛhe bote gbalashihilɛ mli lɛ, amɛgbãla lɛ yeɔ omanye.

Kɛ́ oto otsui shi ni oshɛ dani obɔi lɛ, no etsiŋ oheyeli naa. Moŋ lɛ, ebaahã oná heyeli babaoo ni ‘omii baashɛ ohe yɛ oblahiiaŋ.’ (Jajelɔ 11:9) Kɛfata he lɛ, obaaná be kɛtsɔse ohe bɔ ni afee ni oná sui kpakpai, ni titri lɛ koni owaje okɛ Yehowa teŋ wekukpaa lɛ.Yeremia Yaafo 3:27.

Amrɔ nɛɛ po lɛ, kɛ́ yoo ji bo lɛ, obaanyɛ okɛ hii ashara, ni kɛ́ nuu ji bo lɛ, obaanyɛ okɛ yei ashara. Mɛni ji gbɛ ni hi fe fɛɛ ni esa akɛ otsɔ nɔ ofee nakai? Okɛ onanemɛi hii kɛ yei, kɛ onukpai ni baa amɛjeŋ jogbaŋŋ lɛ afee ekome kɛjie nyɛhiɛtserɛ. Oblayoo ko ni atsɛɔ lɛ Tammy lɛ wie akɛ: “Misusuɔ akɛ enɛ hi jogbaŋŋ. Ehi akɛ obaaná nanemɛi babaoo.” Oblayoo ko ni atsɛɔ lɛ Monica lɛ hu kpɛlɛɔ nɔ nakai, ewie akɛ: “Kɛ́ akpe kutuu lɛ ehi waa, ejaakɛ ehãa okɛ mɛi ni hiɛ sui srɔtoi bɔɔ.”

Nɔ ni tamɔɔɔ nakai lɛ, kɛ́ oŋmɛɛɛ otsui shi ni okɛ ojwɛŋmɔ ma mɔ ko nɔ lɛ, ewaaa akɛ otsui baakumɔ wɔ sɛɛ. No hewɔ lɛ, ŋmɛɛ otsui shi. Okɛ be ni oyɔɔ amrɔ nɛɛ atsu nii kɛkase bɔ ni abɔɔ naanyo kɛ bɔ ni akɛ nanemɛi hiɔ shi jogbaŋŋ. Sɛɛ mli be ni obaakpɛ oyiŋ akɛ okɛ mɔ ko baanyiɛ kɛhã gbalashihilɛ lɛ, no mli lɛ ole ohe jogbaŋŋ, ni ona nɔ tuuntu ni otaoɔ yɛ mɔ ni okɛbaabote gbalashihilɛ mli lɛ hu he.

 

Ekrokromɛi Hu Nɛ

SAJI NI OBLAHII KƐ OBLAYEI BIƆ

Te Obaafee Tɛŋŋ Ole Kɛji Mɔ Ko Baafee Hefatalɔ Ni Sa Bo?

Te obaafee tɛŋŋ okwɛ nii kɛya shɔŋŋ koni ole nɔ gbɔmɔ ni eji lɛ?