Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Te Mafee Tɛŋŋ Mabɔ Mɔdɛŋ yɛ Skul?

Te Mafee Tɛŋŋ Mabɔ Mɔdɛŋ yɛ Skul?

Nɔ ni obaanyɛ ofee

Ná jwɛŋmɔ ni ja! Kɛ́ oná susumɔ akɛ onyɛŋ obɔ mɔdɛŋ kɔkɔɔkɔ lɛ, no lɛ ogbee ohe shi ji no. Kɛ́ obɔi onyɛmɔi ahe jwɛŋmɔ ni ejaaa námɔ nɔŋŋ lɛ, esa akɛ okɛ susumɔi ni ja aye najiaŋ oya nɔŋŋ. Ákɛ nɔkwɛmɔnɔ lɛ, be ni mɛi wie amɛshi bɔ ni bɔfo Paulo wieɔ ehãa lɛ, ejie naa ekɛɛ: “Kɛ́ miji gbɔmɔ ko ni leee nɔ ko yɛ wiemɔ gbɛfaŋ tete lɛ, mijeee nakai yɛ nilee gbɛfaŋ.” (2 Korintobii 10:10; 11:6) Paulo le egbɔjɔmɔi. Kɛ̃lɛ, ele enyɛmɔi hu. Ni bo hu? Ani ole onyɛmɔi? Kɛ́ oleee lɛ, mɛni hewɔ obiii onukpa ko? Naanyo ni tamɔ nɛkɛ lɛ baanyɛ aye abua bo ni ole onyɛmɔi lɛ saŋŋ, koni onyɛ oná amɛhe sɛɛ kɛmɔ shi.

Ná nikasemɔ sui kpakpai. Gbɛ kuku ko kwraa bɛ ni atsɔɔ nɔ ayeɔ omanye yɛ skul. Kɛ́ otee ŋwɛi ni oba shi tete, esa akɛ okase nii. Ekã shi faŋŋ akɛ, nɛkɛ wiemɔ nɛɛ tuuntu eŋɔŋ otoi naa. Kɛ̃lɛ, sɛɛnamɔ yɛ nikasemɔ he. Anɔkwa, kɛ́ omia ohiɛ fioo lɛ, obaana akɛ nikasemɔ ŋɔɔ pam. Bɔ ni afee ni oná nikasemɔ su kpakpa lɛ, esa akɛ oto obe he gbɛjianɔ jogbaŋŋ. Kaimɔ akɛ, esa akɛ nikasemɔ afee ohiamɔ nii. Anɔkwa, Biblia lɛ kɛɔ akɛ “ŋmɔlɔ be yɛ” ni “joo be yɛ.” (Jajelɔ 3:1, 4; 11:9) No hewɔ lɛ, taakɛ eji yɛ otipɛŋfoi pii agbɛfaŋ lɛ, ekolɛ bo hu obaasumɔ ni oná be kɛjie ohiɛtserɛ. Shi Jajelɔ 11:4 lɛ bɔɔ kɔkɔ akɛ: “Mɔ ni saraa kɔɔyɔɔ lɛ, eduŋ nii, ni mɔ ni kwɛɔ atatui lɛ, ekpaŋ nii.” Mɛɛ nikasemɔ yɔɔ mli? Kaatsi be owo be mli. Ehaŋ onyɛ otsu nibii ni he hiaa waa lɛ. Okɛ nikasemɔ aye klɛŋklɛŋ gbɛhe koni okɛ shwɛmɔ aye gbɛhe ni ji enyɔ. Kaaye otsui kwraa—obaanyɛ oná be ohã enyɔ lɛ fɛɛ!

Bɔ ni kɛ́ owo matso lɛ, ofaji amli walaa lɛ, nakai nɔŋŋ kɛ́ okase nii lɛ obaabɔ mɔdɛŋ yɛ skul.