Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Ani Esa akɛ Makpa Skulyaa?

Ani Esa akɛ Makpa Skulyaa?

Nibii ni esa akɛ osusu he lɛ nɛ

Nɛgbɛ mla ni yɔɔ he ni oyɔɔ lɛ biɔ koni mɔ fɛɛ mɔ aya skul kɛyashi? Ani otee kɛshɛ jɛmɛ? Kɛ́ oku ohiɛ ofɔ̃ Biblia ŋaawoo akɛ “aba he shi ahã hegbɛi ni yeɔ nɔ lɛ” nɔ, ni ogbeee nɔ ni mla lɛ biɔ lɛ naa lɛ, belɛ okɛyawa gbɛteŋ ji no.Romabii 13:1.

Ani oshɛ otii ni okɛmamɔ ohiɛ yɛ skul lɛ he? Mɛɛ otii obaasumɔ ni skulyaa aye abua bo ni oshɛ he? Ani oleee? Esa akɛ ole! Kɛ́ oleee lɛ, belɛ otamɔ mɔ ko ni ta oketeke mli ni leee he ni eyaa. No hewɔ lɛ, okɛ ofɔlɔi ata shi ni nyɛsusu sane ni nyiɛ sɛɛ ni hiɛ yitso akɛ, “ Nibii ni Masumɔ ni Skul Aye Abua Mi ni Manyɛ Mafee” lɛ he. Kɛ́ oyashɛɛɛ otii ni okɛ ofɔlɔi kpɛ mli yɛ he lɛ he lɛ, belɛ okɛyawa gbɛteŋ ji no.

Kɛ́ okɛ skul yawa gbɛteŋ lɛ, etamɔ otu kɛjɛ oketeke ni hiɛ foi mli be ni oshɛko he ni oyaa

Mɛni hewɔ oosumɔ ni okpa skul lɛ? Yiŋtoo lɛ eko baanyɛ afee akɛ oosumɔ ni okpa koni oyatsu nii kɛye obua oweku lɛ yɛ shika gbɛfaŋ, aloo okɛ ohe awo yelikɛbuamɔ nitsumɔ ko mli. Eeenyɛ efee hu akɛ, akɛni osumɔɔɔ ni oŋmaa kaa, aloo osumɔɔɔ ni ofeɔ homwɛk hewɔ. Nɔ ni bawaa ji akɛ, ní obaayɔse nɔ tuuntu hewɔ ni otaoɔ okpa skul lɛ—yiŋtoo kpakpa ko hewɔ, aloo ŋkomeŋfa susumɔ ko hewɔ. Kɛ́ okɛyawa gbɛteŋ koni okɛjo naagbai anaa foi lɛ, no lɛ obaashwa ohe diɛŋtsɛ.

Kɛ́ okɛ skul yawa gbɛteŋ lɛ, etamɔ otu kɛjɛ oketeke ni hiɛ foi mli be ni oshɛko he ni oyaa. Ekolɛ, be ni ota oketeke lɛ mli lɛ, ohe ejɔɔɔ bo, ni mɛi ni okɛ ta mli lɛ hu tseee amɛhiɛ amɛhãaa bo, fɛɛ sɛɛ lɛ, kɛ́ otu kɛjɛ oketeke lɛ mli lɛ, ekã shi faŋŋ akɛ oyashɛŋ he ni oyaa lɛ, ni obaapila gbeyeigbeyei hu. Nakai nɔŋŋ kɛ́ okɛ skul yawa gbɛteŋ lɛ, ebaatɔ bo waa yɛ nitsumɔ namɔ mli. Ni kɛ́ oná eko po lɛ, ekolɛ, nyɔmɔwoo lɛ faŋ tamɔ nɔ ni kulɛ obaaná eji ogbe skul lɛ naa.

Nɔ najiaŋ ni obaakpa skul lɛ, bɔɔ mɔdɛŋ ni oto otsui shi kɛkpee naagbai ni okɛkpeɔ yɛ skul lɛ naa. Kɛ́ ofee nakai lɛ, ebaahã ole bɔ ni atoɔ tsui shi ahãa, ni ebaasaa bo koni onyɛ okpee shihilɛi ni tamɔ nakai lɛ anaa yɛ nitsumɔ mli wɔsɛɛ.

 Nibii ni Masumɔ ni Skul Aye Abua Mi ni Manyɛ Mafee

Yiŋtoo titri ni yɔɔ skul sɛɛ ji ní eye ebua bo koni oná nitsumɔ ni baahã onyɛ okwɛ ohe, ni kɛ́ oná weku hu lɛ onyɛ okwɛ amɛ. (2 Tesalonikabii 3:10, 12) Ani obi ohe akɛ, ‘Mɛni masumɔ matsu wɔsɛɛ, ni mɛɛ nibii kɛ́ mikase yɛ skul lɛ ebaaye ebua mi kɛshɛ nakai oti lɛ he?’ Hã sanebimɔi ni nyiɛ sɛɛ nɛɛ ahetoo kɛkwɛ akɛ nibii ni okaseɔ yɛ skul amrɔ nɛɛ baaye abua bo kɛná hesai kɛhã nakai nitsumɔ lɛ lo:

  • Mɛɛ nibii minyɛɔ mifeɔ? (Ákɛ nɔkwɛmɔnɔ lɛ, ani onyɛɔ okɛ mɛi shãraa jogbaŋŋ? Ani onyaa ninenaa nitsumɔi aloo nibii asaamɔi ahe? Ani onyɛɔ opɛiɔ naagbai amli jogbaŋŋ ni otsuɔ he nii?)

  • Mɛɛ nitsumɔi manyɛ mikɛ nibii ni minyɛɔ mifeɔ nɛɛ atsu?

  • Ani manyɛ maná nitsumɔi nɛɛ yɛ he ni miyɔɔ lɛ?

  • Mɛni mikaseɔ amrɔ nɛɛ ni baanyɛ asaa mi kɛhã nitsumɔ námɔ?

  • Mɛɛ skul yɔɔ amrɔ nɛɛ ni manyɛ maya ni baaye abua mi kɛshɛ oti ni ma mihiɛ lɛ he jogbaŋŋ?

Kaimɔ akɛ, oti ni ma ohiɛ ji kɛ́ ogbe skul naa lɛ, onyɛ okɛ nɔ ni okase lɛ atsu nii. No hewɔ lɛ, kaaya fe nine, ní no hã obatsɔ mɔ ni daa nɛɛ eeya skul—ebafeɔ tamɔ mɔ ko ni “ta oketeke mli” ni sumɔɔɔ akɛ eyiɔ shi, efeɔ nakai koni ekɛjo esɔ̃i anaa foi.