Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mɛni Esa akɛ Mafee Koni Mifɔlɔi Ahé Mi Aye?

Mɛni Esa akɛ Mafee Koni Mifɔlɔi Ahé Mi Aye?

Nɔ ni obaanyɛ ofee

Susumɔ he okwɛ: Kɛ́ opɛi oshihilɛ mli okwɛ lɛ, ani bɔ ni obaa ojeŋ ohãa lɛ hewɔ ofɔlɔi heee bo amɛyeee lɛ?

Ákɛ nɔkwɛmɔnɔ lɛ, bɔfo Paulo ŋma akɛ: “Wɔmiisumɔ ni wɔkɛ anɔkwayeli aba wɔjeŋ yɛ nɔ fɛɛ nɔ mli.” (Hebribii 13:18) Bi ohe akɛ, ‘Kɛ́ mikwɛ shii abɔ ni mifɔlɔi etao mi ní amɛleee he ni mitee, aloo amɛleee nɔ ni mifeɔ hu lɛ, mɛɛ jwɛŋmɔ amɛnáa yɛ mihe?’

Halamɔ gbɛ́i nɛɛ ateŋ ekome kɛhã sane ko ni ba diɛŋtsɛ.

 Lori  Beverly

 Lori

Mijuɔ shi mikɛ e-mail majeɔ oblanuu ko ni misumɔɔ lɛ. Mifɔlɔi baná amɛle, ni amɛbɔ mi kɔkɔ koni makpa. Miwo shi akɛ makpa, shi mikpaaa. Enɛ tee nɔ afi sɔŋŋ. Mikɛ oblanuu lɛ shãraa kɛtsɔɔ e-mail nɔ, kɛkɛ lɛ mifɔlɔi emɔ mi, mikpaa he fai kɛkɛ lɛ miwo shi akɛ mifeŋ nakai dɔŋŋ, kɛ̃lɛ miyaa nɔ mifeɔ. Agbɛnɛ, ebashɛ he ko lɛ, mifɔlɔi heee mi amɛyeee dɔŋŋ!

Kɛ́ okwɛ lɛ, mɛni hewɔ Lori fɔlɔi eyaheee lɛ amɛyeee dɔŋŋ lɛ?

Kɛ́ bo ji Lori fɔlɔi kulɛ, mɛni obaafee, ni mɛni hewɔ?

Be ni Lori fɔlɔi kɛ lɛ wie naagba lɛ he klɛŋklɛŋ kwraa lɛ, kulɛ te esa akɛ eba ejeŋ jogbaŋŋ ehã tɛŋŋ?

 Beverly

Kɛ́ ebalɛ hii asane lɛ, mifɔlɔi heee mi amɛyeee kwraa, shi amrɔ nɛɛ mina nɔ hewɔ ni amɛfee nakai lɛ. No mli lɛ, mijuɔ shi mikɛ oblahii komɛi ni ye mi onukpa afii enyɔ jeɔ kpo. Mikɛ amɛ gbaa sane be kpalaŋŋ yɛ tɛlifoŋ nɔ, ni kɛ́ atee henaabuamɔi ashishi lɛ, amɛ pɛ mikɛ gbaa sane. Mifɔlɔi lɛ hé mifoŋ lɛ yɛ midɛŋ nyɔɔŋ kome, ni amɛŋmɛɛɛ mi gbɛ koni maya hei ni nakai oblahii lɛ yɔɔ lɛ.

Kɛ́ bo ji Beverly fɔlɔi kulɛ, mɛni obaafee, ni mɛni hewɔ?

Ani osusuɔ akɛ naatsĩi ni Beverly fɔlɔi kɛshwie enɔ lɛ naa wa tsɔ? Kɛ́ nakai ni lɛ, Mɛni hewɔ?

Mɛni kulɛ Beverly baanyɛ afee koni efɔlɔi anyɛ ahé lɛ aye ekoŋŋ?

Bɔ ni Obaafee Koni Ahé Bo Aye Ekoŋŋ

Nɔ ni obaanyɛ ofee

Kɛ́ mɔ ko miida ebatsɔ onukpa ni anyɛɔ akɛ he fɔ̃ɔ enɔ lɛ, ebafeɔ tamɔ aakwɔ atrakpoi, akwɔɔ lɛ fiofio, kɛyashiɔ onukpa tsɔmɔ mli

Klɛŋklɛŋ lɛ, esa akɛ ole nibii ni ofee hewɔ ni aheee bo ayeee lɛ.

  • Be ni kulɛ esa akɛ mahi shĩa

  • Shiwoi anɔ yeli

  • Be nɔ yeli

  • Shika ni akɛtsuɔ nii yɛ nilee mli

  • Shĩa nifeemɔi ni atsuɔ agbeɔ naa

  • Shi ni ateɔ mra yɛ saa mli

  • Tsũ mli falefalefeemɔ

  • Anɔkwale wiemɔ

  • Pɛpɛɛpɛ ni aŋmɛɔ yɛ bɔ ni akɛ foŋ loo kɔmpiuta tsuɔ nii ahãa lɛ mli

  • Tɔ̃mɔi anɔ kpɛlɛmɔ kɛ faikpamɔ

  • Ekrokomɛi hu

Nɔ ni ji enyɔ lɛ, kpɛɛ oyiŋ. Hã efee oti ni ma ohiɛ akɛ obaafee nibii ni baahã anyɛ ahe bo aye yɛ nibii ni ona akɛ otɔɔ fã yɛ mli lɛ amli. Okɛ Biblia mli ŋaawoo nɛɛ atsu nii: ‘Jiemɔ subaŋ momo lɛ ní kɛ otsutsu jeŋba lɛ kpãa gbee lɛ oshɛ ofɔ̃.’ (Efesobii 4:22.) Be ni be shwieɔ mli lɛ, mɛi fɛɛ, ni ofɔlɔi hu fata he lɛ, baana omɔdɛŋbɔɔ.1 Timoteo 4:15.

Nɔ ni ji etɛ lɛ, okɛ ofɔlɔi asusu oyiŋkpɛi lɛ ahe. Nɔ najiaŋ ni obaatɔke akɛ amɛheee bo amɛyeee lɛ, okɛ bulɛ abi amɛ ni amɛtsɔɔ bo nibii ni amɛsusuɔ akɛ esa akɛ ofee koni amɛhé bo amɛye.

Ŋaawoo: Kaakpa gbɛ akɛ esa akɛ amrɔ nɔŋŋ lɛ, ofɔlɔi ajie naatsii ni amɛkɛshwie onɔ lɛ. Ŋwanejee ko bɛ he akɛ amɛbaasumɔ amɛná nɔmimaa akɛ ooye oshiwoi anɔ. Ŋɔɔ hegbɛ nɛɛ kɛfee nibii ni tsɔɔ akɛ anɔkwafo ji bo. Be ni be shwieɔ mli lɛ, ofɔlɔi lɛ hu baaná hekɛnɔfɔ̃ɔ yɛ omli ni amɛbaahã bo hegbɛ babaoo. Nakai ji bɔ ni ebalɛ yɛ Beverly, ni atsĩ etã kɛtsɔ hiɛ lɛ gbɛfaŋ. Ekɛɛ akɛ: “Ebɛ mlɛo akɛ abaaná hekɛnɔfɔ̃ɔ yɛ omli, kɛ̃lɛ, ewaaa akɛ ebaaŋmɛɛ bo. Amrɔ nɛɛ, aahé mi aaye fiofio, ni eŋɔɔ minaa waa!”

Sane lɛ nɔŋŋ ji akɛ: Babaoo ni aheɔ bo ayeɔ lɛ, babaoo ni anyɛɔ akɛ he fɔ̃ɔ onɔ ji no.