Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

OBLAHII KƐ OBLAYEI BIƆ AKƐ

Ani Esa akɛ Mikɛ Lɛ Agbala Mli?—Fã 1

Ani Esa akɛ Mikɛ Lɛ Agbala Mli?—Fã 1

Bei komɛi lɛ, kɛ́ okɛ mɔ lɛ kpa nyiɛmɔ lɛ ebafeɔ jɔɔmɔ. Susumɔ oblayoo ko ni atsɛɔ lɛ Jill ni eye afii 21 lɛ niiashikpamɔ lɛ he okwɛ. Ekɛɛ akɛ: “Shishijee lɛ eŋɔɔ minaa akɛ oblanyo ni mikɛ nyiɛ lɛ sumɔɔ ni ele he ni miyɔɔ, nɔ ni mifeɔ, kɛ mɛi ni mikɛyɔɔ jɛmɛ. Shi eshɛ he ko ni lɛ esɛɛ lɛ, esumɔɔɔ ni enaa mi kɛ mɔ ko. Ni kɛ́ ena ni mikɛ miwekumɛi—titri lɛ mipapa, miishara po lɛ, eyeɔ he awuŋa. Be ni mikɛ oblanyo lɛ kpa nyiɛmɔ lɛ, minu he tamɔ awo jatsu ko ni tsĩi yɛ mikɔŋ nɔ!”

Oblayoo ko ni atsɛɔ lɛ Sarah hu ná niiashikpamɔ ni tamɔ nakai nɔŋŋ. Eyɔse akɛ oblanyo, ni ji John ni ekɛnyiɛ lɛ nifeemɔ kɛ ewiemɔ fɛɛ esaaa kwraa, enyɛɔ mɔ nɔ, ni ebuuu mɔ. Sarah wie akɛ: “be ko lɛ ewo shi akɛ ebaaba ebawo mi kɛje kpo, ekpe sɛɛ ŋmlɛtswai etsɛ sɔŋŋ! Be ni etswa shinaa lɛ ni mimami yagbele lɛ lɛ, eŋaaa mimami po, nɔ ni ekɛɛ moŋ ji: ‘Baaho wɔtee. Wɔkpe sɛɛ.’ Ekɛɛɛ ‘mikpe sɛɛ,’ shi ‘Wɔkpe sɛɛ.’ Kulɛ esa akɛ ekpa mimami fai aloo etsɔɔ nɔ hewɔ ni ekpe sɛɛ lɛ. Nɔ ni fe fɛɛ lɛ, kulɛ esa akɛ ejie bulɛ kpo etsɔɔ mimami!”

Anɔkwa, kɛ́ mɔ ko jie su ni tamɔ nɛkɛ kpo shi kome ko pɛ kɛkɛ lɛ, no etsɔɔɔ doo akɛ esa akɛ afo nyiɛmɔ lɛ sɛɛ. (Lala 130:3) Shi be ni Sarah yɔse akɛ bulɛ kpo ni John ejieee lɛ ji esu lɛ, eto eyiŋ akɛ ekɛ lɛ baakpa nyiɛmɔ lɛ kwraa.

Taakɛ ebalɛ yɛ Jill kɛ Sarah gbɛfaŋ lɛ, kɛ́ ona akɛ mɔ ni okɛ nyiɛ lɛ ebafeŋ hefatalɔ ni sa lɛ mɛni obaafee? Kɛ́ ona nakai lɛ, kaaku ohiɛ oshwie nɔ! Eyɛ mli akɛ ebɛ mlɛo moŋ nɛ, shi ebaahi akɛ abaafo sɛɛ. Abɛi 22:3 kɛɔ akɛ: “Hiɛtɛ̃lɔ naa efɔŋ ní baa, ni eteɔ ehe.”

Eji anɔkwale akɛ ebɛ mlɛo akɛ okɛlɛ baagbala mli. Shi gbalashihilɛ jeee nɔ ni akaa akwɛɔ, ni kɛ́ ehiii lɛ obaaku osɛɛ. Ebaahi moŋ akɛ okɛ mɔ lɛ agbala mli koni opiŋ fioo fe nɔ ni obaaku ohiɛ oshwie nɔ ni opiŋ owala gbii abɔ fɛɛ!