Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

OBLAHII KƐ OBLAYEI BIƆ AKƐ

Mɛni Hewɔ Esa akɛ Magbɔle Mikpɔiaŋ?

Mɛni Hewɔ Esa akɛ Magbɔle Mikpɔiaŋ?

Biblia lɛ kɛɔ akɛ: “Gbɔmɔtsoŋ tsɔsemɔ he yɛ sɛɛnamɔ.” (1 Timoteo 4:8) Kɛ̃lɛ, etamɔ nɔ ni oblahii kɛ oblayei babaoo ni kɛɔ akɛ, “Esa akɛ magbɔle mikpɔiaŋ lɛ” enaaa nɔ hewɔ ni esa akɛ amɛtsu nɔ ni amɛwieɔ lɛ he nii.

“Kɛ́ atsɔɔ bo gbekɛbii abɔ ni feeli kpɔiaŋgbɔlemɔ he kaa be ni miyɔɔ sɛkɛndre skul lɛ, onaa baakpɛ ohe. Kpɔiaŋgbɔlemɔ jeee nifeemɔ ni wa ni esa akɛ mɔ ko afeeli!”—Richard, 21.

“Mɛi komɛi shwieɔ amɛyiŋ akɛ, ‘Mɛni hewɔ esa akɛ oje kpo oyahiɛ foi yɛ hulu gbaŋgbaŋ nɛɛ nɔ kɛyashi latsa baatsa bo, ni etɔ bo, be mli ni obaanyɛ otswa vidio gem ni okwa ofee tamɔ bo nɔŋŋ oyɔɔ mli lɛ?’”—Ruth, 22.

Kɛ́ bo hu onuɔ he nakai lɛ, susumɔ sɛɛnamɔi etɛ ni anáa yɛ kpɔiaŋgbɔlemɔ mli lɛ ahe okwɛ.

Sɛɛnamɔ 1. Kpɔiaŋgbɔlemɔ wajeɔ ogbɔmɔtso lɛ koni ewu eshi hela. Oblayoo ko ni atsɛɔ lɛ Rachel ni eye afii 19 lɛ wie akɛ, “Mipapa fɔɔ wiemɔ akɛ ‘Kɛ́ onáaa be ni okɛgbɔle okpɔiaŋ lɛ, no lɛ ná ole akɛ hela baamɔ bo ni ebaahe obe.’”

Sɛɛnamɔ 2. Kpɔiaŋgbɔlemɔ wajeɔ jwɛŋmɔ lɛ, ni ehãa ohe jɔɔ bo. Oblayoo ko ni atsɛɔ lɛ Emily ni eye afii 16 lɛ wie akɛ, “Kɛ́ mihao yɛ nibii pii ahe lɛ, foijee hãa mihe jɔɔ mi. Minuɔ he akɛ mijwɛŋmɔŋ ekã shi, ni mitsui hu nyɔɔ mimli.”

Sɛɛnamɔ 3. Kpɔiaŋgbɔlemɔ baanyɛ ehã omii ashɛ ohe waa. Oblayoo ko ni atsɛɔ lɛ Ruth lɛ wie akɛ,Minyaaa tsũ mli kpɔiaŋgbɔlemɔ he kwraa. No hewɔ lɛ, misumɔɔ ŋshɔ kɛ faa wumɔ, baisiko tamɔ, kɛ kpɔiaŋgbɔlemɔ nifeemɔi komɛi hu.

Nɔ ni Baahã Oye Omanye: Kɛhooo kwraa lɛ, ŋɔɔ minitii 20 kɛgbɔle okpɔiaŋ waa shii etɛ daa otsi; esa akɛ efee kpɔiaŋgbɔlemɔ ko ni osumɔɔ waa.

Kaimɔ akɛ: Eyɛ mli akɛ nibii ni akɛfɔ bo lɛ baanyɛ asa ohewalɛnamɔ he moŋ, shi bei pii lɛ, ogbɔmɔtsoŋ hewalɛnamɔ damɔ bɔ ni ohiɔ shi ohãa lɛ nɔ titri. No hewɔ lɛ, kɛ́ okɛɛ akɛ, “Esa akɛ magbɔle mikpɔiaŋ lɛ,” bo onɔ ekã; obaanyɛ ofee he nɔ ko!