Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

OBLAHII KƐ OBLAYEI BIƆ AKƐ

Ani Bɔ ni Migbɔmɔtso Ji lɛ Ehé Mijwɛŋmɔ Fɛɛ?

Ani Bɔ ni Migbɔmɔtso Ji lɛ Ehé Mijwɛŋmɔ Fɛɛ?
  • Bi ohe akɛ: Ani no pɛ he Mijwɛŋɔ?

  • Mɛni hewɔ mibɛ bɔ ni migbɔmɔtso yɔɔ lɛ he miishɛɛ lɛ?

  • Ani esa akɛ matsake bɔ ni anaa mi ahãa?

  • Tsakemɔ ni fe fɛɛ ni obaanyɛ ofee!

  • Julia sane lɛ

  1. Te wiemɔi nɛɛ ateŋ nɔ ni tsɔɔ bɔ ni onuɔ he ohãa?

    • Mimii shɛko bɔ ni migbɔmɔtso yɔɔ lɛ he .

    • Mimii shɛɔ bɔ ni migbɔmɔtso yɔɔ lɛ he bei komɛi.

    • Mimii shɛɔ bɔ ni migbɔmɔtso yɔɔ lɛ he be fɛɛ be.

  2. Mɛni titri obaasumɔ ni otsake yɛ ogbɔmɔtso he?

    • Okwɔlɛ

    • Odalɛ

    • Bɔ ni ogbɔmɔtso ji hã

    • Oyitsɔi

    • Ohewolonɔ su

    • Okpɔiaŋwalɛ

    • Nɔ kroko

  3. Gbee saji ni nyiɛ sɛɛ nɛɛ anaa.

    Mibɛ bɔ ni migbɔmɔtso yɔɔ lɛ he miishɛɛ kwraa . . .

    • kɛ́ midamɔ nsɛni nɔ.

    • kɛ́ mikwɛ mihe yɛ ashwishwɛ mli.

    • kɛ́ mikɛ mihe to mɛi krokomɛi ahe (nanemɛi, mɛi ni woɔ hesaamɔ nibii kɛtsɛɔ jara, sini mli gbɔmɛi ni ehé gbɛ́i).

  4. Gbee saji ni nyiɛ sɛɛ nɛɛ anaa.

    Midamɔɔ nsɛni nɔ kɛkwɛɔ mitsiimɔ . . .

    • daa gbi.

    • daa otsi.

    • bei komɛi lɛ otsi hoɔ.

  5. Te wiemɔi nɛɛ ateŋ nɔ ni tsɔɔ bɔ ni onuɔ he ohãa jogbaŋŋ?

    • Obɛ bɔ ni ogbɔmɔtso yɔɔ lɛ he miishɛɛ. (Ákɛ nɔkwɛmɔnɔ lɛ: “Be fɛɛ be kɛ́ mikwɛ ashwishwɛ mli lɛ, minaa mihe akɛ obolo, mihe bɛ fɛo. Mihãa hɔmɔ po yeɔ mi bɔ ni afee ni minɔ agbɔ.”—Serena.)

    • Onáa jwɛŋmɔ ni ja yɛ ogbɔmɔtso lɛ he. (Ákɛ nɔkwɛmɔnɔ lɛ: “Bɔ fɛɛ bɔ ni ji lɛ, nɔ ko kɛ̃ baahi wɔgbɔmɔtso lɛ he ni wɔnyaŋ he, ekomɛi yɛ ni esa akɛ wɔmɔ mli nakai. Nilee bɛ mli akɛ wɔbaahao wɔhe yɛ nɔ ko ni wɔnyɛŋ wɔtsake lɛ he.”—Natanya.)

Biblia lɛ kɛɔ wɔ akɛ, wɔkasusu wɔhe tutuu ‘fe bɔ ni sa akɛ wɔsusuɔ wɔhe.’ (Romabii 12:3) No hewɔ lɛ, ehi, ni ehe hiaa po akɛ obaasusu bɔ ni ogbɔmɔtso yɔɔ lɛ he, shi esa akɛ oŋmɛ pɛpɛɛpɛ. No hewɔ ni kɛ́ fee lɛ, oshaa odaaŋ ni ofeɔ falefale hu lɛ.

Ni kɛ́ efɔɔ kaa akɛ onyaaa bɔ ni ogbɔmɔtso yɔɔ lɛ he hu—aahu akɛ ekolɛ eheɔ ojwɛŋmɔ fɛɛ po lɛ? Kɛ́ nakai ji sane lɛ, obaabi ohe akɛ . . .

Mɛni hewɔ mibɛ bɔ ni migbɔmɔtso yɔɔ lɛ he miishɛɛ lɛ?

Nibii babaoo baanyɛ ahã onu he nakai. Nibii nɛɛ ekomɛi ji:

  • Hewalɛ ni adafitswaa nibii náa yɛ mɛi anɔ. “Nibii babaoo ni oblahii kɛ oblayei kwɛɔ yɛ TV nɔ kɛ woji amli lɛ hãa wɔnuɔ he akɛ esa akɛ wɔfee legelege koni wɔhe afee fɛo be fɛɛ be. Enɛ hewɔ lɛ, kɛ́ wɔfeee tamɔ mɛi ni wɔnaa yɛ TV kɛ woji amli lɛ, wɔhaoɔ waa!”—Kellie.

  • Hewalɛ ni fɔlɔi náa yɛ bii anɔ. “Miyɔse akɛ, kɛ́ mami ko nyaaa bɔ ni egbɔmɔtso yɔɔ lɛ he lɛ, bei pii lɛ, ebiyoo hu naa ehe nakai nɔŋŋ. Ebaanyɛ eba lɛ nakai yɛ tsɛmɛi kɛ amɛbihii hu agbɛfaŋ.”—Rita.

  • Kɛ́ onaa ohe akɛ obaa shi tsɔ. “Mɛi ni nyaaa bɔ ni amɛgbɔmɔtso yɔɔ lɛ he lɛ sumɔɔ ni be fɛɛ be lɛ, mɛi akɛɛ amɛ akɛ amɛhe efee fɛo waa. Ewa akɛ obaahi amɛmasɛi!”—Jeanne.

Ekɔɔɔ he eko nɔ ni kɛ henumɔ nɛɛ baa lɛ, obaanyɛ obi ohe akɛ . . .

‘Ani esa akɛ matsake bɔ ni anaa mi ahãa?’

Susumɔ saji ni otipɛŋfoi komɛi ewie lɛ ahe okwɛ.

“Jeee be fɛɛ be obaanyɛ otsake nibii ni osumɔɔɔ yɛ ohe lɛ, no hewɔ lɛ, esa akɛ okpɛlɛ bɔ ni oyɔɔ lɛ nɔ. Kɛ́ okɔ lɛ nakai lɛ, ebaawa akɛ mɛi kɛ amɛjwɛŋmɔ baaya nɔ.”—Rori.

“Bɔɔ mɔdɛŋ ni ofee nibii ni baahã oná gbɔmɔtsoŋ hewalɛ. Kɛ́ oyɛ gbɔmɔtsoŋ hewalɛ lɛ, mɛi baana bo bɔ ni esa akɛ ana bo. Ni kɛ́ mɔ ko sumɔɔɔ osane yɛ bɔ ni enaa bo yɛ kponɔgbɛ lɛ hewɔ (moŋ fe mɔ ni oji) lɛ, nakai mɔ lɛ jeee onaanyo.”—Olivia.

Sane lɛ nɔŋŋ ji akɛ: Bɔɔ mɔdɛŋ ni ohiɛ ohe jogbaŋŋ be fɛɛ be. Shi kaaye otsui yɛ nɔ ni onyɛŋ ofee lɛ he. Eyɛ oshara akɛ obaagba ohe naa fe nine yɛ bɔ ni osumɔɔ ni ana bo ahã lɛ he. (Kwɛmɔ “Julia Sane lɛ.”)

Nɔ ni tamɔɔɔ nakai lɛ, oblayoo ko ni atsɛɔ lɛ Erin lɛ kpa shi ena akɛ, kɛ́ oná jwɛŋmɔ ni ja yɛ bɔ ni ogbɔmɔtso yɔɔ lɛ he lɛ, onáa bɔ ni oji lɛ he miishɛɛ. Ewie akɛ: “Anɔkwa, mile nibii ni misumɔɔɔ yɛ migbɔmɔtso lɛ he, kɛ̃lɛ miyɔse akɛ ja mikɛ mijwɛŋmɔ etee nɔ dani egbaa minaa. Amrɔ nɛɛ, mikpɔiaŋ kɛkɛ migbɔleɔ daa, ni miyeɔ nii bɔ ni sa. Ni nɔ fɛɛ nɔ ni eshwɛ lɛ yaa nɔ jogbaŋŋ.”

Tsakemɔ ni fe fɛɛ ni obaanyɛ ofee!

Kɛ́ oná jwɛŋmɔ ni ja yɛ bɔ ni ogbɔmɔtso lɛ yɔɔ lɛ he lɛ, omii baashɛ ohe (ni ohe baafee fɛo hu). Biblia lɛ baanyɛ aye abua bo. Ewoɔ bo hewalɛ ni ojie sui ni nyiɛ sɛɛ nɛɛ akpo:

  • Ohiɛ asɔ bɔ ni oyɔɔ. “Ehi jogbaŋŋ akɛ obaaná nɔ ni oyɔɔ lɛ he miishɛɛ moŋ fe ni obaashwe nɔ kroko, nilee bɛ mli kwraa ejaakɛ ebafeɔ tamɔ ootiu kɔɔyɔɔ koni omɔ lɛ.”Jajelɔ 6:9, Contemporary English Version.

  • Ŋmɛɛ pɛpɛɛpɛ yɛ kpɔiaŋgbɔlemɔ mli. “Gbɔmɔtsoŋ tsɔsemɔ he yɛ sɛɛnamɔ yɛ gbɛ bibioo ko nɔ.”1 Timoteo 4:8.

  • Mligbɛ hefɛo. “Gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ!”1 Samuel 16:7.

“Wɔhiɛsu hãa anaa bɔ ni wɔnaa wɔhe wɔhãa. Kɛ́ mɔ ko hiɛ sɔɔ bɔ ni eyɔɔ lɛ, mɛi krokomɛi yɔseɔ ni amɛtsiɔ amɛbɛŋkɛɔ lɛ.”—Sarah.

“Hefɛo gbalaa mɛi ajwɛŋmɔ oya. Shi mɔ ni oji diɛŋtsɛ kɛ sui kpakpai ni oyɔɔ lɛ ji nɔ titri ni mɛi kɛbaakai bo.”—Phylicia.

Kwɛmɔ ŋmalɛi nɛɛ hu; Abɛi 11:22; Kolosebii 3:10, 12; 1 Petro 3:3, 4.