Shi kɛya he ni ato saneyitsei lɛ anaa yɛ lɛ

YELIKƐBUAMƆ KƐHÃ WEKU LƐ

Bɔ Ni Obaafee Oye Mlifu Nɔ

Bɔ Ni Obaafee Oye Mlifu Nɔ

Ohefatalɔ lɛ wie nɔ ko loo efee nɔ ko ni wo omlila, ni okɛwo omli. Shi ohefatalɔ lɛ yɔse akɛ nɔ ko miigba onaa, ni ebɔi bo saji bimɔ. Enɛ hã omlifu waa moŋ. Te obaafee tɛŋŋ oye omlifu nɔ yɛ shihilɛ ni tamɔ enɛ mli?

 Nɔ ni esa akɛ ole

  • Mlifu baanyɛ aye ogbɔmɔtso awui. Niiamlitaomɔ etsɔɔ akɛ, kɛ́ mɔ ko nyɛɛɛ eye emlifu nɔ lɛ, ewaŋ akɛ e-BP baaya ŋwɛi, ebaaná tsui hela, ebaahao fe nine, loo egbɔmɔtso lɛ nyɛŋ agbɛlɛ niyenii jogbaŋŋ. Mɛi komɛi hu kɛɔ akɛ mlifu hãaa mɔ awɔ, ehãa mɔ yeɔ etsui fe nine, gbɛ̃i shwieɔ lɛ, loo enáa strok. Enɛ hewɔ Biblia lɛ kɛɔ akɛ: “Kaahã omli fu . . . , ejaakɛ efɔŋfeemɔ mli kɛkɛ ekɛ mɔ yaa” lɛ.​—Lala 37:8, shishigbɛ niŋmaa.

  • Kɛ́ okɛ mlifu toɔ lɛ, no hu baanyɛ aye bo awui. Kɛ́ omli fɔɔ fumɔ lɛ, ebaanyɛ efee tamɔ ooye hela ko yɛ omligbɛ. Akɛ nɔkwɛmɔnɔ lɛ, ekolɛ, owieɔ nii ahe waa. Su ni tamɔ nɛkɛ baahã ewa kɛhã mɛi akɛ amɛkɛ bo baahi shi, ni enɛ baanyɛ aye ogbalashihilɛ lɛ awui waa.

 Nɔ ni obaanyɛ ofee

  • Taomɔ ohefatalɔ lɛ sui kpakpai komɛi. Ŋmalamɔ nibii etɛ ni osumɔɔ yɛ ohefatalɔ lɛ he lɛ oshwie shi. Be kroko kɛ́ efee nɔ ko ni omlifu lɛ, jwɛŋmɔ sui ni ona yɛ ehe nɛɛ anɔ. Enɛ baanyɛ awa bo ni oye omlifu nɔ.

    Biblia shishitoo mla: “Nyɛfea nyɛhe mɛi ni le shidaa.”​—Kolosebii 3:15.

  •   Kasemɔ bɔ ni akɛ sane keɔ. Klɛŋklɛŋ lɛ, bɔɔ mɔdɛŋ ni ona nɔ hewɔ ni ohefatalɔ lɛ fee nɔ ni efee lɛ. Enɛ baawa bo ni ‘onu he ohã lɛ.’ (1 Petro 3:8) No sɛɛ lɛ, bi ohe akɛ, ‘Ani nɔ ni efee ni mimli efu lɛ yɛ hiɛdɔɔ bɔ ni minyɛŋ mikɛke lɛ?’

    Biblia shishitoo mla: “Ehiɛ ni ekuɔ efɔ̃ɔ tɔmɔ nɔ lɛ, ehiɛnyam ni.”​—Abɛi 19:11.

  •   Jɛɛ mlihilɛ kɛ hiɛshikamɔ mli otsɔɔ osusumɔ. Okɛ wiemɔ ni ji “Mi” atsu nii. Akɛ nɔkwɛmɔnɔ lɛ, nɔ najiaŋ ni obaakɛɛ akɛ, “Osusuuu mihe, no hewɔ ni ohãaa male he ni otee lɛ,” kɛɛmɔ akɛ, “Kɛ́ otee he ko ni je na lɛ, mitsui yeɔ waa, ejaakɛ mileee nɔ ni eba onɔ.” Kɛ́ ojɛ mlihilɛ mli otsɔɔ osusumɔ yɛ nɛkɛ gbɛ nɔ lɛ, ebaawa bo ni oye omlifu nɔ.

    Biblia shishitoo mla: “Nyɛhãa nyɛwiemɔ he abaa nyam daa, kɛ́ wɔɔkɛɛ lɛ, ŋoo ahi mli.”​—Kolosebii 4:6.

  •   Jɛɛ bulɛ mli obo lɛ toi. Kɛ́ otsɔɔ osusumɔ ogbe naa lɛ, hã ohefatalɔ lɛ hu awie, ni kɛ́ eewie lɛ, kaafolɔ mli. Kɛ́ ewie egbe naa lɛ, tsɔɔmɔ lɛ bɔ ni onu shishi ohã ni obi lɛ akɛ nakai etsɔɔ lɛ lo. Kɛ́ obo ohefatalɔ lɛ toi jogbaŋŋ lɛ, ebaawa bo koni oye omlifu nɔ.

    Biblia shishitoo mla: “Mɔ he afee oya kɛ sane toiboo, ekaye ehe oyai kɛwie.”​—Yakobo 1:19.