Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

YELIKƐBUAMƆ KƐHÃ WEKU LƐ

Bɔ Ni Obaafee Ojie Suɔmɔ Kpo

Bɔ Ni Obaafee Ojie Suɔmɔ Kpo

Kɛ́ mɛi bote gbalashihilɛ mli lɛ, bei komɛi lɛ, be ni afii lɛ yaa hiɛ lɛ, suɔmɔ ni amɛyɔɔ kɛhã amɛhe lɛ he jɔɔ. Kɛ́ nɔ ko tamɔ nɛkɛ miiya nɔ yɛ ogbalashihilɛ lɛ mli lɛ, mɛni esa akɛ ofee?

  • Nɔ ni esa akɛ ole

  • Nɔ ni obaanyɛ ofee

Nɔ ni esa akɛ ole

Kɛ́ gbalashihilɛ ko baaye omanye lɛ ehe miihia ni ahã suɔmɔ ahi mli. Bɔ ni ehe hiaa ni gbɔmɔtso lɛ aná niyenii kɛ nu be fɛɛ be koni ehe awa ni ená hewalɛ lɛ, nakai nɔŋŋ hu kɛ́ ajie suɔmɔ kpo be fɛɛ be lɛ, eyeɔ ebuaa gbalashihilɛ ni eyeɔ omanye. Ehe miihia ni be fɛɛ be lɛ, wu kɛ ŋa ni ehi shi afii nyɔŋmai abɔ po lɛ, ahã amɛhefatalɔi anu he akɛ amɛsumɔɔ amɛ waa ni amɛjwɛŋɔ amɛhe.

Anɔkwa suɔmɔ fooo lɛ pɛ enɔ mli. Esumɔɔ ni mɔ kroko lɛ aná miishɛɛ. No hewɔ lɛ, nɔ najiaŋ ni wu loo ŋa baajie suɔmɔ kpo be ni eenu he akɛ efee nakai lɛ pɛ mli lɛ, esusuɔ ehefatalɔ lɛ he ni eyɔseɔ akɛ suɔmɔ he miihia lɛ ni ebɔɔ mɔdɛŋ etsuɔ he nii.

Bei pii lɛ, ŋamɛi sumɔɔ ni ajie suɔmɔ kpo atsɔɔ amɛ, shi wumɛi anɔ bɛ lɛ nakai tsɔ. Wu ko baanyɛ esumɔ eŋa waa. Shi kɛ́ ejie nakai suɔmɔ lɛ kpo yɛ gbi lɛ shishijee kɛ enaagbee, kɛ be ni ekɛ lɛ yaana bɔlɛ pɛ lɛ, eŋa lɛ yiŋ etɛŋ lɛ akɛ ewu lɛ sumɔɔ lɛ lɛɛlɛŋ. Ehi waa akɛ gbalashihilɛ mli hefatalɔi baajie suɔmɔ kpo amɛtsɔɔ amɛhe yɛ gbi lɛ mli fɛɛ.

Nɔ ni obaanyɛ ofee

Okɛ owiemɔi atsɔɔ akɛ osumɔɔ ohefatalɔ lɛ. Kɛ́ okɛɛ ohefatalɔ lɛ saji tamɔ “Misumɔɔ bo” loo “Onɔ bɛ kwraa” lɛ, ebaanu he akɛ osusuɔ ehe waa.

Biblia shishitoo mla: “Nɔ ni eyi tsui obɔ kɛteke nɔ lɛ, no nɔŋŋ naabu wieɔ.”​—Mateo 12:34.

Ŋaawoo: Kaajie suɔmɔ kpo otsɔɔ ohefatalɔ lɛ yɛ wiemɔ mli pɛ. Ŋmaa yɛ wolo nɔ, tɛsmɔ lɛ, loo sɛndimɔ lɛ e-mail.

Okɛ onifeemɔi atsɔɔ akɛ osumɔɔ ohefatalɔ lɛ. Fuamɔ lɛ, shɔ enaa, mɔ enine shi koni ena akɛ jeee kɛɛmɔ kɛkɛ okɛɔ lɛ akɛ osumɔɔ lɛ lɛ. Naa nibii komɛi ni obaanyɛ ofee koni ohefatalɔ lɛ anu he akɛ osusuɔ ehe waa: mɔ emli blɛoo, okɛ suɔmɔ akwɛ ehiɛ, loo hemɔ nɔ ko oke lɛ yɛ be kɛ beiaŋ. Ni bɛ obaanyɛ ofee nibii nɛɛ hu kɛye obua oŋa lɛ? Ekolɛ, obaanyɛ ohiɛ ebaagi loo ogbele shinaa ohã lɛ, osha nibii amli, ofɔ nibii ahe, loo ohoo niyenii, kɛtsɔɔ akɛ osumɔɔ oŋa lɛ. Mɛi pii naa nifeemɔi nɛɛ akɛ suɔmɔ ni aajie lɛ kpo, shi jeee yelikɛbuamɔ ko kɛkɛ!

Biblia shishitoo mla: ‘Esaaa akɛ wɔsumɔɔ mɛi yɛ wiemɔ mli loo lilɛi nɔ [kɛkɛ], shi moŋ yɛ nifeemɔ mli.’​—1 Yohane 3:​18.

Ŋaawoo: Okɛ ohefatalɔ lɛ aye jogbaŋŋ tamɔ bɔ ni okɛ lɛ ye be ni nyɛnyiɛɔ kɛtsɔɔ gbalashihilɛ hiɛ lɛ.

Nyɛnáa be nyɛhãa nyɛhe. Kɛ́ nyɛyi enyɔ lɛ pɛ nyɛná be nyɛhã nyɛhe lɛ, ewajeɔ nyɛgbalashihilɛ lɛ, ni ehãa ohefatalɔ lɛ náa nɔmimaa akɛ onáa miishɛɛ kɛ́ oyɛ emasɛi. Eji anɔkwale akɛ kɛ́ nyɛyɛ bii, loo be fɛɛ be lɛ, sɔ̃i babaoo jwere nyɛnɔ ni esa akɛ nyɛtsu he nii lɛ, ebaawa akɛ nyɛyi enyɔ lɛ pɛ nyɛbaaná be nyɛhã nyɛhe. Ekolɛ, nyɛbaanyɛ nyɛto be koni nyɛyi enyɔ lɛ pɛ nyɛshara shi yɛ akutso lɛ mli kɛgba sane.

Biblia shishitoo mla: “Nyɛkwɛa ni nyɛna nibii ni he hiaa waa lɛ.”​—Filipibii 1:​10.

Ŋaawoo: Gbalashihilɛ mli hefatalɔi komɛi ni bɛ dekã lɛ toɔ be ni amɛjeɔ kpo gbɛkɛgbɛkɛ loo otsii lɛ anaagbee, koni amɛyi enyɔ lɛ pɛ amɛná be amɛhã amɛhe.

Le ohefatalɔ lɛ jogbaŋŋ. Esoro nibii ni mɔ fɛɛ mɔ sumɔɔ ni afee kɛjie suɔmɔ kpo atsɔɔ lɛ. Nyɛgbaa sane koni nyɛle nibii ni nyɛteŋ mɔ fɛɛ mɔ sumɔɔ ni afee kɛjie suɔmɔ kpo atsɔɔ lɛ, ni agbɛnɛ hu, nyɛle kɛji esa akɛ afee nibii krokomɛi kɛfata he. No sɛɛ lɛ, bɔɔ mɔdɛŋ ni otsu ohefatalɔ lɛ hiamɔ nii ahe nii ohã lɛ. Kaimɔ akɛ, kɛ́ gbalashihilɛ ko baaye omanye lɛ ehe miihia ni ahã suɔmɔ ahi mli.

Biblia shishitoo mla: Suɔmɔ . . . epeleee ehãaa lɛ pɛ ehe.”​—1 Korintobii 13:4, 5.

Ŋaawoo: Nɔ najiaŋ ni obaakɛɛ ohefatalɔ akɛ ejie suɔmɔ kpo etsɔɔ bo lɛ, bi ohe akɛ, ‘Mɛni manyɛ mafee koni mihefatalɔ lɛ asumɔ mi waa?’