Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

BIBLIA LƐ TSAKEƆ MƐI

“No Mli Lɛ Mitsui Gbaa Minaa Waa”

“No Mli Lɛ Mitsui Gbaa Minaa Waa”
  • Be Ni Afɔ Lɛ: 1975

  • Maŋ Nɔ Ni Ejɛ: Mexico

  • Mɔ Ni Eji Tsutsu: Etsui gbaa enaa waa; awo lɛ tsuŋ dã

MITSUTSU SHIHILƐ

Afɔ mi yɛ San Juan Chancalaito, eji maŋ bibioo ko yɛ Mexico maŋtiase ni atsɛɔ lɛ Chiapas lɛ mli. Miweku lɛ jɛ Cholbii lɛ ateŋ, amɛji Maya shikwɛɛbii. Mifɔlɔi fɔ bii 12, ni miji enumɔ nɔ. Be ni miji gbekɛ lɛ, Yehowa Odasefoi kɛ mi, kɛ minyɛmimɛi lɛ kase Biblia lɛ. Mɔbɔ sane ji akɛ, be ni midaa lɛ, mikɛ nibii ni atsɔɔ mi yɛ Biblia mli lɛ tsuuu nii.

Be ni miye afii 13 lɛ, mibɔi juu, ni mikɛ tsofai hu bɔi nitsumɔ yɛ gbɛ ni esaaa nɔ. Nakai afi lɛ mli nɔŋŋ lɛ, mishi shĩa ni mitsɔ kobɔlɔ. Be ni miye afii 16 lɛ, mibɔi nitsumɔ yɛ wii ŋmɔ ko mli. Mihi jɛmɛ aaafee afi, kɛkɛ ni gbi gbɛkɛ ko ni wɔkɛ wii babaoo ko ewo lɛlɛ mli kɛmiifã gbɛ lɛ, trukaa lɛ, hii komɛi ni hiɛ tui ni amɛ hu amɛhɔɔ wii lɛ batutua wɔ. Amɛbɔi tui tswaramɔ, shi mitsɛ̃ miwo faa lɛ mli, ni miyajekpo yɛ faa lɛ naa he ko shɔŋŋ. No sɛɛ lɛ, mijo foi kɛtee United States.

Be ni miyɔɔ United States lɛ mitee nɔ mihɔɔ tsofai ni akɛtsuɔ nii yɛ gbɛ ni esaaa nɔ nɛɛ, ni no hã miná naagbai pii. Be ni miye afii 19 lɛ, miyaju, ni mika akɛ magbe gbɔmɔ, no hewɔ lɛ awo mi tsuŋ. Mikɛ kuu ko yabɔ yɛ tsuŋwoohe lɛ ni mifee yiwalɛ nibii krokomɛi hu. Enɛ hewɔ lɛ, akɛ mi tee tsuŋwoohe kroko yɛ Lewisburg, ni yɔɔ Pennsylvania lɛ, ni hebuu ni yɔɔ jɛmɛ lɛ mli wa.

Be ni miyɔɔ tsuŋwoohe yɛ Lewisburg lɛ, mijeŋba bafite kwraa. Akɛni no mli lɛ, kuu ko tatuu yɛ mihe momo hewɔ lɛ, mikɛ nakai kuu lɛ nɔŋŋ yabɔ yɛ jɛmɛ. Mibɔi yiwalɛ nifeemɔ fe tsutsu lɛ po, mikɛ mɛi nɔɔ basabasa. Be ko lɛ, mikuu lɛ kɛ kuu kroko nɔ waa yɛ tsuŋwoohe lɛ. Wɔnɔ gbeyeigbeyei, wɔkɛ tsei kɛ dadei fɛɛ nɔ. Nɔ ni blɔfo tsɛɔ lɛ tear gas lɛ ji nɔ ni tsuŋwoohe nɔkwɛlɔi lɛ nyɛ amɛkɛkpata wɔ. Enɛ sɛɛ lɛ, tsuŋwoohe nɔkwɛlɔi lɛ kɛ mi yafata mɛi ni hiɛ yɔɔ laŋlaŋ lɛ ahe. No mli lɛ mitsui gbaa minaa waa, ni miwieɔ wiemɔi sha hu. Miyiɔ mɛi kɛkɛ. Anɔkwa, minyaa he waa. Mishwaaa mihe yɛ jeŋba gbonyo nɛɛ he.

BƆ NI BIBLIA LƐ TSAKE MISHIHILƐ

Be ni miyɔɔ mɛi ni hiɛ yɔɔ laŋlaŋ lɛ ateŋ lɛ, ekpakpa ko dani ahãa mijeɔ kpo, no hewɔ lɛ, mibɔi Biblia lɛ kanemɔ koni mikɛtsi jenamɔ lɛ yisɛɛ. Sɛɛ mli lɛ, bulɔ lɛ eko hã mi wolo ni ji, Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ eko. * Be ni mikaneɔ Biblia kasemɔ wolo nɛɛ, mikai nibii ni Odasefoi lɛ tsɔɔ mi be ni miji gbekɛ lɛ ateŋ babaoo. Enɛ hã misusu bɔ ni yiwalɛ nifeemɔ ni mikɛ mihe woɔ mli lɛ ehã mijeŋba ekpɔtɔ kwraa lɛ he. Misusu miweku lɛ hu he. Akɛni no mli lɛ, minyɛmimɛi yei enyɔ ebatsɔmɔ Yehowa Odasefoi hewɔ lɛ, mikɛɛ mihe akɛ, ‘Amɛbaahi shi kɛya naa.’ No sɛɛ lɛ, mibi mihe akɛ, ‘Mɛni tsĩɔ minaa mɔ?’ Nakai beiaŋ ni mikpɛ miyiŋ akɛ mafee tsakemɔi.

Shi mina akɛ, dani manyɛ matsake lɛ ehe baahia ni aye abua mi. No hewɔ lɛ, klɛŋklɛŋ lɛ, misɔle mihã Yehowa Nyɔŋmɔ ni mikpa lɛ fai ni eye ebua mi. No sɛɛ lɛ, miŋma wolo kɛmaje Yehowa odasefoi anitsumɔhe nine ni yɔɔ United States lɛ, ni mibi koni akɛ mi abakase Biblia lɛ. Nitsumɔhe nine lɛ to gbɛjianɔ koni asafo ko ni bɛŋkɛ kɛ mi akase nii lɛ. Nakai beiaŋ lɛ, aŋmɛɛɛ gbɛ ni mɛi ni jeee miwekumɛi abasara mi, no hewɔ lɛ, Odasefonyo ko ni yɔɔ asafo lɛ mli lɛ ŋmaa mi wolo kɛwoɔ mi hewalɛ, ni emajeɔ mi Biblia kasemɔ woji hu, enɛ hã shwelɛ ni miná akɛ mafee tsakemɔi lɛ mli bawa waa.

Mifee tsakemɔ wulu ko, no ji, mikpɛ miyiŋ akɛ mashi kuu ni mikɛbɔ afii babaoo lɛ. No mli lɛ, mikɛ mikuu lɛ hiɛnyiɛlɔ lɛ yɛ tsuŋwoohe kome, no hewɔ lɛ, be ko ni wɔmiijie wɔhiɛtserɛ lɛ miyana lɛ ni mikɛɛ lɛ akɛ, miitao matsɔ Yehowa Odasefonyo. Naakpɛɛ sane ji akɛ, ekɛɛ mi akɛ: “Kɛ́ hiɛdɔɔ sane owieɔ lɛ, mibɛ he naagba ko. Minyɛŋ matsĩ onaa akɛ okaja Nyɔŋmɔ. Shi kɛ́ kuu nɛɛ ní otaoɔ oshi lɛ kɛkɛ lɛ hewɔ ni okɛɔ nakai lɛ, no lɛ bo diɛŋtsɛ ole nɔ ni wɔbaafee bo.”

Afii enyɔ sɛɛ lɛ, mɛi ni kwɛɔ wɔnɔ lɛ na akɛ misubaŋ etsake kwraa. No hewɔ lɛ, amɛkɛ mi ye jogbaŋŋ. Akɛ nɔkwɛmɔnɔ lɛ, kɛ́ bulɔi lɛ kɛ mi miije kpo koni miyaju mihe lɛ amɛwooo mi handkɔf dɔŋŋ. Amɛteŋ mɔ kome po wo mi hewalɛ ni miya nɔ mifee tsakemɔ lɛ. Anɔkwa, be ni shwɛ afi ni abaajie mi lɛ, akɛ mi tee tsuŋwoohe kroko, shi hebuu ni yɔɔ jɛmɛ lɛ mli waaa tsɔ, ni ebɛŋkɛ tsuŋwoohe wulu lɛ. Yɛ afi 2004, be ni mihi tsuŋwoohe lɛ afii nyɔŋmɔ lɛ, ajie mi ni akɛ mi wo gboklɛfoi abɔs mli kɛtee Mexico.

Be ni mishɛ Mexico nɔŋŋ lɛ, mitao Yehowa Odasefoi a-Maŋtsɛyeli Asa. Miwo gboklɛfoi atade kɛtee klɛŋklɛŋ kpeei ni mitee lɛ, ejaakɛ no mli lɛ, no ji atade kpakpa ni miyɔɔ. Mihesaamɔ nɛɛ fɛɛ sɛɛ lɛ, Odasefoi lɛ here mi hiɛmɛɛ. Bɔ ni amɛjie mlihilɛ kpo amɛtsɔɔ mi lɛ hã minu he akɛ miyɛ anɔkwa Kristofoi ateŋ. (Yohane 13:35) Be ni akpa kpeei lɛ nɔŋŋ lɛ, asafoŋ onukpai lɛ to gbɛjianɔ koni mɔ ko kɛ mi abɔi Biblia lɛ kasemɔ. No sɛɛ afi, yɛ September 3, 2005 lɛ, abaptisi mi akɛ Yehowa Odasefonyo.

Yɛ January 2007 mli lɛ, mikɛ mihe wo be fɛɛ sɔɔmɔ lɛ mli, no ji, mikɛ ŋmɛlɛtswaa 70 tsɔɔ mɛi Biblia mli anɔkwalei lɛ daa nyɔɔŋ. Yɛ afi 2011 lɛ mli lɛ, mitee Biblia Skul Kɛhã Nyɛmimɛi Hii Oshijafoi lɛ eko (amrɔ nɛɛ atsɛɔ lɛ Skul Kɛhã Maŋtsɛyeli Sane Kpakpa Jajelɔi). Skul nɛɛ ye ebua mi koni manyɛ matsu misɔ̃i ahe nii yɛ asafo lɛ mli.

Amrɔ nɛɛ mitsɔɔ mɛi bɔ ni akɛ mɛi hiɔ shi yɛ toiŋjɔlɛ mli, ni enɛ hãa mimiishɛɔ mihe waa

Yɛ afi 2013 mli lɛ, mikpee Pilar, miŋa ni misumɔɔ waa lɛ. Kɛ́ migba lɛ nibii komɛi ni mifee be ko ni eho lɛ, ekɛ ŋmɔlɔ kɛɔ akɛ, “miheee miyeee.” Kɛjɛ be ni mitsake nɛɛ, mifeko nibii gbohii ni kulɛ mifeɔ lɛ eko. Mikɛ miŋa fɛɛ heɔ yeɔ akɛ, mɔ ni mitsɔ ŋmɛnɛ lɛ yeɔ odase akɛ Biblia lɛ yɛ hewalɛ ni ekɛtsakeɔ mɛi.​—Romabii 12:2.

BƆ NI MINÁ HE SƐƐ

Minuɔ he akɛ Yesu wiemɔi ni yɔɔ Luka 19:10 lɛ kɔɔ mihe. Ewie yɛ jɛmɛ akɛ: ‘Miba nɔ ni elaaje lɛ taomɔ kɛ eyiwalaheremɔ.’ Amrɔ nɛɛ minuuu he akɛ milaaje. Agbɛnɛ hu, miyeee mɛi awui dɔŋŋ. Biblia lɛ ewa mi waa, amrɔ nɛɛ miná hiɛnɔkamɔ kpakpa, toiŋjɔlɛ yɛ mi kɛ mɛi ateŋ, ni nɔ ni fe fɛɛ lɛ, wekukpaa kpakpa yɛ mi kɛ Yehowa, ni ji mi-Bɔlɔ lɛ teŋ.

[SHISHIGBƐ NIŊMA]

^ kk. 13 Yehowa Odasefoi ji mɛi ni fee wolo nɛɛ, shi amrɔ nɛɛ akpa kalamɔ. Wolo titri ni amɛkɛ mɛi kaseɔ amrɔ nɛɛ ji, Mɛni Wɔbaanyɛ Wɔkase Kɛjɛ Biblia Lɛ Mli?