Shi kɛya he ni ato saneyitsei lɛ anaa yɛ lɛ

Ani Mama Ni Yɔɔ Turin Ni Akɛbalaa Gbonyo Lɛ Ji Nɔ Ni Akɛbala Yesu Lɛ?

Ani Mama Ni Yɔɔ Turin Ni Akɛbalaa Gbonyo Lɛ Ji Nɔ Ni Akɛbala Yesu Lɛ?

Hetoo ni Biblia lɛ kɛhãa

Atsĩii mama ni akɛbalaa gbonyo ni yɔɔ Turin lɛ tã yɛ Biblia lɛ mli. Eji klala ko ni mɛi babaoo susuɔ akɛ akɛfu Yesu Kristo. Hemɔkɛyeli nɛɛ hewɔ lɛ, mɛi babaoo naa mama ni akɛbalaa gbonyo nɛɛ akɛ Kristendom okadi nɔ ko ni yɔɔ krɔŋkrɔŋ ni abuɔ waa. Akɛ mama nɛɛ ewo glase fɛofɛo ko mli yɛ sɔlemɔtsu ko ni yɔɔ Turin, yɛ Italy lɛ mli, afee glase lɛ koni mama lɛ akafite.

Ani Biblia lɛ maa nɔ mi akɛ mama nɛɛ tuuntu ji nɔ ni akɛbala Yesu lɛ? Dabi.

Naa nibii etɛ ahewɔ ni abaanyɛ akɛɛ akɛ Biblia lɛ fĩii susumɔ ni ahiɛ yɛ mama nɛɛ he lɛ sɛɛ.

  1. Mama ni akɛbalaa gbonyo nɛɛ lɛɛmɔ ji sɛntimitai 442, ni ekɛlɛ ji sɛntimitai 113, ni akpɛ mama kroko ni lɛɛmɔ ji sɛntimitai 8 kɛbele mli.

    Nɔ ni Biblia lɛ kɛɔ: Akɛ klalai bibii pii bala Yesu gbonyo lɛ, jeee klala muu kome. Akɛ klala kroko bala eyitso. Be ni atee Yesu shi lɛ, ekaselɔi lɛ ateŋ mɔ kome ba gbonyobu ni kã efolo lɛ he ni ena “klalai lɛ jwere jɛmɛ.” Biblia lɛ kɛfata he akɛ: “Mama ni akɛfi eyitso lɛ kãaa mamai krokomɛi ni akɛbala lɛ lɛ amasɛi, shi moŋ akota ni ekã he kroko banee.”​—Yohane 20:​6, 7.

  2. Nibii komɛi eka mama lɛ mli, ni mɛi susuɔ akɛ eji gbonyo ko ni ajuko ehe la.

    Nɔ ni Biblia lɛ kɛɔ: Be ni Yesu gbo lɛ, ekaselɔi lɛ saa egbonyo lɛ “tamɔ bɔ ni Yudafoi lɛ feɔ kɛfuɔ mɔ yɛ kusum naa lɛ.” (Yohane 19:39-​42) Nɔ ni Yudafoi lɛ feɔ ji akɛ, amɛjuɔ gbonyo lɛ he ni amɛkɛ mu kɛ tsofai kpaa ehe dani amɛyafuɔ lɛ. (Mateo 26:12; Bɔfoi 9:​37) No hewɔ lɛ, ekã shi faŋŋ akɛ, Yesu kaselɔi lɛ baaju Yesu gbonyo lɛ he dani amɛkɛ mamai lɛ baabala lɛ.

  3. Encyclopædia Britannica lɛ kɛɛ: “Nuu ko gbɔmɔtso etɛŋ yɛ mama lɛ fã nɔ, ni kɛ́ okwɛ lɛ, etamɔ nɔ ni akɛ lɛ fɔ̃ nɔ kakadaŋŋ nɔ, ni adɔ fã ni eshwɛ lɛ kɛha eyitso he koni mama lɛ aha egbɔmɔtso lɛ hiɛgbɛ fɛɛ.”

    Nɔ ni Biblia lɛ kɛɔ: Yesu kaselɔi lɛ wie nibii komɛi ahe; amɛwie egbele lɛ, egbonyobu ni kã efolo lɛ, kɛ nɔ ni yei ni kɛ amɛhiŋmɛii na ‘ŋwɛibɔfoi ni jie amɛhe kpo tsɔɔ amɛ, ni amɛkɛɛ akɛ ehiɛ kã’ lɛ ahe. (Luka 24:15-​24) Eji mama ni akɛbala Yesu lɛ yɛ egbonyobu lɛ mli kulɛ, bɔ fɛɛ bɔ ni fee lɛ, ekaselɔi lɛ bawie he ni amɛtsɔɔ bɔ ni eyɔɔ. Kɛ̃lɛ, Biblia lɛ ewieee akɛ amɛgba sane ko tamɔ nakai.

Ani esa akɛ akɛ woo krɛdɛɛ ko ahã mama ni mɛi susuɔ akɛ no ji nɔ ni akɛbala Yesu lɛ?

Dabi. Kɛ́ no tuuntu ji mama ni akɛbala lɛ lɛ po lɛ, eji tɔmɔ akɛ akɛ woo krɛdɛɛ ko baahã mama nɛɛ. Susumɔ Biblia mli shishitoo mlai ni hãa wɔkɛɔ nakai lɛ ahe okwɛ.

  1. Ehe ehiaaa. Yesu kɛɛ akɛ: “Nyɔŋmɔ lɛ Mumɔ ni, ni mɛi ni jáa lɛ lɛ, esa akɛ amɛkɛ mumɔ kɛ anɔkwale ajá lɛ.” (Yohane 4:​24) Akɛ woo hãaa jamɔŋ nibii yɛ anɔkwa jamɔ mli.

  2. Nyɔŋmɔ miihi. Kitãi Nyɔŋma lɛ kɛɛ wɔkajá amagai. (5 Mose 5:​6-​10) Ni Biblia lɛ fãa Kristofoi akɛ: “Amɛkwɛ amɛhe nɔ jogbaŋŋ yɛ amagai ahe.” (1 Yohane 5:​21) Ekolɛ, mɛi komɛi baakɛɛ akɛ amɛjáaa mama ni akɛɛ no akɛbala Yesu gbonyo lɛ, shi eji amɛjamɔ okadi ko kɛkɛ. Kɛ̃lɛ, kɛ́ mɔ ko kɛ woo krɛdɛɛ ko hãa okadi ko lɛ, etsɔɔ amaga kɛhãa lɛ. * No hewɔ lɛ, mɔ fɛɛ mɔ ni miisumɔ ni esa Nyɔŋmɔ hiɛ lɛ, kɛ woo krɛdɛɛ ko hãŋ okadi ko okadi ko ni mama ni asusuɔ akɛ no akɛbala Yesu gbonyo lɛ hu fata he.

^ kk. 15 Amaga ji nɔ ko, nɔ ko ni akɛdamɔɔ shi ahãa nɔ kroko, loo okadi ko ni akɛ woo krɛdɛɛ ko hãa.