Shi kɛya he ni ato saneyitsei lɛ anaa yɛ lɛ

Kɛ́ Akɛɛ Afee Krɔŋkrɔŋ Lɛ, Mɛni Atsɔɔ Lɛ?

Kɛ́ Akɛɛ Afee Krɔŋkrɔŋ Lɛ, Mɛni Atsɔɔ Lɛ?

Hetoo ni Biblia lɛ kɛhãa

Kɛ́ akɛɛ afee krɔŋkrɔŋ lɛ, etsɔɔ akɛ atsi he kɛje nibii ni buleɔ mɔ ahe. Aná Hebri wiemɔ ni atsɔɔ shishi akɛ “krɔŋkrɔŋ” lɛ kɛjɛ wiemɔ ni shishi ji “atse he kɛje he” lɛ mli. No hewɔ lɛ, nii ni yɔɔ krɔŋkrɔŋ ji nii ni atse kɛje nii ni mɔ fɛɛ mɔ kɛkɛ kɛtsuɔ nii lɛ he, titri lɛ akɛni ehe tse loo muji ko bɛ he lɛ hewɔ.

Nyɔŋmɔ yɛ krɔŋkrɔŋ fe mɔ fɛɛ mɔ. Biblia lɛ kɛɛ: “Mɔ krɔŋkrɔŋ ko bɛ ni tamɔ Yehowa.” * (1 Samuel 2:2) No hewɔ lɛ, Nyɔŋmɔ ji mɔ ni esa akɛ etsɔɔ nɔ ni kɛ́ wɔfee lɛ wɔbaafee krɔŋkrɔŋ.

Abaanyɛ akɛ wiemɔ ni ji “krɔŋkrɔŋ” lɛ atsu nii kɛhã nɔ fɛɛ nɔ ni kɔɔ Nyɔŋmɔ he, titrii lɛ, nibii ni atuu ahã Nyɔŋmɔ jamɔ pɛ. Akɛ nɔkwɛmɔnɔ lɛ, Biblia lɛ wieɔ nibii ni nyiɛ sɛɛ nɛɛ ahe:

  • Hei krɔŋkrɔŋi: Nyɔŋmɔ kɛɛ Mose yɛ ŋmei tso ko ni miishã lɛ masɛi akɛ: “He ní odamɔ lɛ, shikpɔŋ krɔŋkrɔŋ ni.”​—2 Mose 3:2-5.

  • Kpeei krɔŋkrɔŋi: Blema Israelbii lɛ já Yehowa yɛ jamɔŋ gbii juji ni afɔɔ feemɔ ni atsɛɔ lɛ “kpeei krɔŋkrɔŋi” lɛ ashishi.​—3 Mose 23:37.

  • Nibii Krɔŋkrɔŋi: Atsɛɔ nibii ni akɛtsu nii yɛ Nyɔŋmɔjamɔ mli yɛ blema sɔlemɔ shĩa ni yɔɔ Yerusalem lɛ mli lɛ akɛ “nibii krɔŋkrɔŋi.” (1 Maŋtsɛmɛi 8:4) Blemabii lɛ bu nibii nɛɛ waa, shi amɛjaaa amɛ. *

Ani gbɔmɔ ni yeee emuu baanyɛ afee krɔŋkrɔŋ?

Hɛɛ. Nyɔŋmɔ fãa Kristofoi akɛ: “Nyɛfea krɔŋkrɔŋ, ejaakɛ miyɛ krɔŋkrɔŋ.” (1 Petro 1:16) Eji anɔkwale akɛ adesai ni yeee emuu nyɛŋ afee krɔŋkrɔŋ kɛmɔ shi kɔkɔɔkɔ. Shi abaanyɛ abu adesai ni boɔ Nyɔŋmɔ jalɛ mlai lɛ atoi lɛ akɛ mɛi ‘ni yɔɔ krɔŋkrɔŋ ni Nyɔŋmɔ náa amɛhe miishɛɛ.’ (Romabii 12:1) Kɛ́ mɔ ko miibɔ mɔdɛŋ ni efee krɔŋkrɔŋ lɛ anaa yɛ ewiemɔ kɛ enifeemɔ mli. Akɛ nɔkwɛmɔnɔ lɛ, ekɛ ŋaa ni Biblia lɛ woɔ akɛ ‘nyɛfea krɔŋkrɔŋ ni nyɛtsia nyɛhe kɛjea ajwamaŋbɔɔ he’ kɛ “nyɛfea mɛi krɔŋkrɔŋi yɛ nyɛnifeemɔi fɛɛ amli” lɛ tsuɔ nii.​—1 Tesalonikabii 4:3; 1 Petro 1:15.

Kɛ́ mɔ ko yɛ krɔŋkrɔŋ lɛ, ani ebaanyɛ eŋmɛɛ lɛ?

Hɛɛ. Kɛ́ mɔ ko kpoo Nyɔŋmɔ jeŋba he mlai lɛ, Nyɔŋmɔ ebuŋ lɛ akɛ eyɛ krɔŋkrɔŋ dɔŋŋ. Akɛ nɔkwɛmɔnɔ lɛ, aŋma Biblia mli wolo ni ji Hebribii lɛ ahã “nyɛmimɛi krɔŋkrɔŋi” lɛ, kɛ̃lɛ ekɛɛ amɛ akɛ amɛkwɛ amɛhe nɔ jogbaŋŋ koni amɛteŋ mɔ ko “akaná tsui fɔŋ ni bɛ hemɔkɛyeli akɛni etsi ehe kɛje Nyɔŋmɔ hiɛkãalɔ lɛ he lɛ hewɔ.”​—Hebribii 3:1, 12.

Susumɔ ni ejaaa ni mɛi hiɛ yɛ krɔŋkrɔŋfeemɔ he

Susumɔ ni ejaaa: Kɛ́ mɔ ko baafee krɔŋkrɔŋ lɛ ebiɔ ni etsĩ ehe naa yɛ nibii babaoo ahe.

Anɔkwa sane: Biblia lɛ tsɔɔ akɛ akɛ mɔ ko ‘baawa egbɔmɔtso yi’ loo ebaatsĩ ehe naa yɛ nibii babaoo ahe lɛ he ehiaaa Nyɔŋmɔ. (Kolosebii 2:23) Moŋ lɛ, Nyɔŋmɔ miisumɔ ni wɔná nibii kpakpai lɛ ahe sɛɛ. Biblia lɛ kɛɛ akɛ: “Esa akɛ mɔ fɛɛ mɔ aye ni enu ni ená nii ni etsuɔ waa lɛ fɛɛ mli ŋɔɔmɔ. Nyɔŋmɔ nikeenii ni.”​—Jajelɔ 3:13.

Susumɔ ni ejaaa: Kɛ́ mɔ ko kpɛ eyiŋ akɛ eboteee gbalashihilɛ mli ni enáaa bɔlɛ hu yɛ jamɔ hewɔ lɛ, etsɔɔ akɛ eyɛ krɔŋkrɔŋ waa.

Anɔkwa sane: Eyɛ mli akɛ Kristofonyo ko baanyɛ akpɛ eyiŋ akɛ eboteŋ gbalashihilɛ mli moŋ, shi kɛ́ mɔ ko kpɛ eyiŋ akɛ eboteŋ gbalashihilɛ mli ni enáŋ bɔlɛ lɛ, no etsɔɔɔ akɛ eyɛ krɔŋkrɔŋ yɛ Nyɔŋmɔ hiɛ. Eji anɔkwale akɛ, mɛi ni boteko gbalashihilɛ mli lɛ baanyɛ amɛkɛ amɛhe awo Nyɔŋmɔjamɔ nifeemɔi amli ni nɔ ko gbalaaa amɛjwɛŋmɔ. (1 Korintobii 7:​32-​34) Kɛ̃lɛ, Biblia lɛ tsɔɔ akɛ mɛi ni ebote gbalashihilɛ mli hu baanyɛ afee krɔŋkrɔŋ. Anɔkwa, kɛhooo kwraa lɛ Yesu kaselɔi lɛ ateŋ mɔ kome​—ni ji Petro​—bote gbalashihilɛ mli.​—Mateo 8:14; 1 Korintobii 9:5.

^ kk. 2 Yehowa ji Nyɔŋmɔ gbɛ́i diɛŋtsɛ. Ŋmalɛi babaoo hãa anaa akɛ gbɛ́i nɛɛ kɛ wiemɔ ni ji “krɔŋkrɔŋ” kɛ “krɔŋkrɔŋfeemɔ” lɛ yɛ tsakpaa.

^ kk. 6 Biblia lɛ wieɔ eshiɔ okadii komɛi ni akɛtsuɔ nii yɛ jamɔ mli ni ajaa lɛ.​—1 Korintobii 10:14.