Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Mɛni Ji Esha?

Mɛni Ji Esha?

Hetoo ni Biblia lɛ kɛhãa

Esha ji nifeemɔ, henumɔ loo susumɔ ko ni teɔ shi woɔ Nyɔŋmɔ mlai. Kɛ́ mɔ ko fee nɔ ko fɔŋ loo nɔ ko ni ejaaa yɛ Nyɔŋmɔ hiɛ lɛ, eku Nyɔŋmɔ mla mli, ni no hu lɛ esha ni. (1 Yohane 3:4; 5:​17) Kɛfata he lɛ, Biblia lɛ wieɔ eshai krokomɛi ahe​—no ji ekpakpa loo nɔ ni ja ni afeee.​—Yakobo 4:​17.

Wiemɔ ni atsɔɔ shishi akɛ esha yɛ Biblia lɛ mli lɛ shishinumɔ diɛŋtsɛ ji “ashɛɛɛ oti” ko he. Akɛ nɔkwɛmɔnɔ lɛ, yɛ blema Israel lɛ, ayɛ tabilɔi komɛi ni he esa waa kɛ akromia fɔɔ ni ‘eko eŋmɛɛɛ amɛ.’ Wiemɔ ni ji eŋmɛɛɛ amɛ lɛ shishitsɔɔmɔ ŋmiiŋmi ji “amɛfeee esha.” (Kojolɔi 20:16) No hewɔ lɛ, kɛ́ mɔ ko fee esha lɛ, etsɔɔ akɛ eshɛɛɛ Nyɔŋmɔ jalɛ mlai lɛ ahe.

Akɛ Bɔlɔ lɛ, Nyɔŋmɔ yɛ hegbɛ akɛ ewoɔ mla yɛ nɔ ni ja kɛ nɔ ni ejaaa he ehãa adesai. (Kpojiemɔ 4:​11) Wɔbaabu wɔnifeemɔi ahe akɔntaa wɔhã lɛ.​—Romabii 14:12.

Ani abaanyɛ akpa eshafeemɔ kwraa?

Dabi. Biblia lɛ kɛɔ akɛ “mɛi fɛɛ efee esha ni amɛnyɛɛɛ amɛjie Nyɔŋmɔ anunyam lɛ kpo.” (Romabii 3:​23; 1 Maŋtsɛmɛi 8:​46; Jajelɔ 7:​20; 1 Yohane 1:8) Mɛni hewɔ eba lɛ nakai?

Shishijee lɛ, esha bɛ Adam kɛ Hawa ni ji klɛŋklɛŋ adesai lɛ ahe. Nɔ hewɔ ji akɛ abɔ amɛ yɛ Nyɔŋmɔ subaŋ nɔ, ni amɛye emuu. (1 Mose 1:​27) Shi amɛgbo Nyɔŋmɔ nɔ toi ni no hã amɛtsɔmɔ mɛi ni yeee emuu. (1 Mose 3:​5, 6, 17-​19) Be ni amɛfɔ bii lɛ, amɛkɛ esha kɛ emuu ni amɛyeee lɛ hã amɛbii lɛ akɛ gboshinii. (Romabii 5:​12) Taakɛ Israel Maŋtsɛ David kɛɛ lɛ, ‘esha mli afɔ mi yɛ.’​—Lala 51:5.

Ani eshai komɛi yɛ hiɛdɔɔ fe ekrokomɛi?

Hɛɛ. Akɛ nɔkwɛmɔnɔ lɛ, Biblia lɛ kɛɔ akɛ blema Sodombii lɛ, “efɔŋfeelɔi kɛ eshafeelɔi kpeteŋkpelei ji amɛ.” (1 Mose 13:13; 18:20) Hã wɔsusu nibii etɛ komɛi ni hãa esha ko feɔ nɔ ni yɔɔ hiɛdɔɔ lɛ ahe wɔkwɛ.

  1. Enaawalɛ. Biblia lɛ bɔɔ wɔ kɔkɔ akɛ wɔtsi wɔhe kɛje eshai ni yɔɔ hiɛdɔɔ tamɔ bɔlɛnamɔ jeŋba sha, amagajamɔ, juu, dãatɔɔ, amimyeli, gbɔmɔgbee, kɛ mumɔi atsɛmɔ he. (1 Korintobii 6:​9-​11; Kpojiemɔ 21:8) Biblia lɛ tsɔɔ akɛ eshai komɛi, tamɔ wiemɔ ni awieɔ ni ajwɛŋŋ he, kɛ eshai ni ajeee gbɛ afeɔ lɛ bɛ hiɛdɔɔ tsɔ; ekomɛi ji wiemɔi loo nifeemɔi ni baanyɛ agba mɛi krokomɛi anaa loo eye amɛ awui. (Abɛi 12:18; Efesobii 4:​31, 32) Fɛɛ sɛɛ lɛ, Biblia lɛ woɔ wɔ hewalɛ koni wɔkaku wɔhiɛ wɔfɔ̃ esha ko kwraa nɔ, ejaakɛ amɛbaanyɛ amɛhã wɔtɔ̃ Nyɔŋmɔ mlai lɛ anɔ.​—Mateo 5:​27, 28.

  2. Ani mɔ lɛ je gbɛ efee? Mɛi komɛi feɔ esha ni amɛleee nɔ ni Nyɔŋmɔ ekɛɛ yɛ he. (Bɔfoi 17:30; 1 Timoteo 1:​13) Eyɛ mli akɛ Biblia lɛ ekɛɛɛ akɛ naagba bɛ eshai nɛɛ ahe moŋ, shi ehãa anaa akɛ srɔto yɛ eshai nɛɛ kɛ eshai ni ajeɔ gbɛ afeɔ kɛkuɔ Nyɔŋmɔ mlai amli lɛ ateŋ. (4 Mose 15:30, 31) “Tsui fɔŋ” ji nɔ ni hãa mɔ ko jeɔ gbɛ efeɔ esha.​—Yeremia 16:12.

  3. Shii abɔ ni afee. Biblia lɛ tsɔɔ srɔto ni yɔɔ esha ni afee shi kome kɛ esha ni ayaa nɔ afeɔ be kpalaŋŋ lɛ he. (1 Yohane 3:​4-8) Nyɔŋmɔ gbalaa mɛi ni “jeɔ gbɛ amɛfeɔ esha” be ni amɛná amɛle nɔ ni ja lɛ atoi.​—Hebribii 10:26, 27.

Mɛi ni feɔ eshai ni yɔɔ hiɛdɔɔ lɛ ateŋ mɛi komɛi atsui yeɔ waa yɛ bɔ ni eshai ni amɛfee lɛ naa wa hã lɛ hewɔ. Akɛ nɔkwɛmɔnɔ lɛ, Maŋtsɛ David ŋma akɛ: “Minishaianii lɛ esu mi; etamɔ jatsu ni tsii yɛ minɔ.” (Lala 38:4; Ga Biblia hee) Fɛɛ sɛɛ lɛ, Biblia lɛ hãa wɔ hiɛnɔkamɔ nɛɛ akɛ: “Hã ní mɔ fɔŋ akwa egbɛ̀i lɛ, ni nɔshafeelɔ akwa ejwɛŋmɔi lɛ, ní eku esɛɛ kɛba Yehowa ŋɔɔ, ni emusuŋ aaatsɔ lɛ yɛ ehewɔ, kɛ wɔ-Nyɔŋmɔ lɛ ŋɔɔ, shi ekɛaafa lɛ aahu.”​—Yesaia 55:7.