Shi kɛya he ni ato saneyitsei lɛ anaa yɛ lɛ

Kɛ́ Akɛɛ Afɔ Mɔ Ko Ekoŋŋ Lɛ, Te Atsɔɔ Tɛŋŋ?

Kɛ́ Akɛɛ Afɔ Mɔ Ko Ekoŋŋ Lɛ, Te Atsɔɔ Tɛŋŋ?

Hetoo ni Biblia lɛ kɛhãa

Wiemɔ ni ji ‘fɔmɔ ekoŋŋ’ lɛ tsɔɔ akɛ, mɔ ni afɔ lɛ ekoŋŋ lɛ eje shishi ekɛ Nyɔŋmɔ miiná wekukpaa krɛdɛɛ ko. (Yohane 3:3, 7) Nyɔŋmɔ ŋɔɔ mɛi ni afɔ amɛ ekoŋŋ lɛ akɛ ebii. (Romabii 8:15, 16; Galatiabii 4:5; 1 Yohane 3:1) Mɛi nɛɛ ashihilɛ tsakeɔ ni amɛbatsɔmɔɔ Nyɔŋmɔ weku lɛ mli bii, tamɔ bɔ ni eji yɛ mɛi ni aŋɔ amɛ akɛ bii yɛ mla naa lɛ agbɛfaŋ lɛ.​—2 Korintobii 6:18.

Mɛni hewɔ afɔɔ mɔ ko ekoŋŋ?

Yesu kɛɛ: “kɛji afɔɔɔ mɔ ko ekoŋŋ lɛ, enyɛŋ Nyɔŋmɔ Maŋtsɛyeli lɛ ena.” (Yohane 3:3) No hewɔ lɛ, kɛ́ afɔ mɔ ko ekoŋŋ lɛ, esaa lɛ koni ekɛ Kristo aye nɔ yɛ Nyɔŋmɔ Maŋtsɛyeli lɛ mli. Akɛni Maŋtsɛyeli nɛɛ baaye nɔ kɛjɛ ŋwɛi hewɔ lɛ, Biblia lɛ tsɔɔ akɛ ‘fɔmɔ hee’ lɛ hãa anáa gboshinii ni “aŋɔto yɛ ŋwɛi.” (1 Petro 1:3, 4) Ahãa mɛi ni afɔɔ ekoŋŋ lɛ náa nɔmimaa akɛ amɛkɛ Yesu “baaye nɔ akɛ maŋtsɛmɛi.”​—2 Timoteo 2:12; 2 Korintobii 1:21, 22.

Mɛɛ gbɛ nɔ atsɔɔ afɔɔ mɔ ehee?

Be ni Yesu tsɔɔ sane nɛɛ mli lɛ, ewie akɛ abaajɛ “nu kɛ mumɔ” mli afɔ mɛi lɛ ekoŋŋ. (Yohane 3:5) Enɛ tsɔɔ akɛ, abaabaptisi mɛi lɛ yɛ nu mli, kɛkɛ lɛ no sɛɛ lɛ, akɛ mumɔ krɔŋkrɔŋ lɛ ebaptisi amɛ.​—Bɔfoi 1:5; 2:1-4.

Yesu ji mɔ klɛŋklɛŋ ni afɔ lɛ ekoŋŋ. Abaptisi lɛ yɛ Yordan Faa lɛ mli, ni sɛɛ mli lɛ, Nyɔŋmɔ kɛ mumɔ krɔŋkrɔŋ lɛ fɔ lɛ mu (loo, baptisi lɛ). Enɛ hã Yesu bafee mɔ ko ni afɔ lɛ ekoŋŋ akɛ mumɔŋ bi ni ená hiɛnɔkamɔ akɛ ebaaku esɛɛ kɛya ŋwɛi. (Marko 1:9-11) Nyɔŋmɔ hã Yesu hiɛnɔkamɔ nɛɛ ba mli be ni etee lɛ shi akɛ mumɔŋ bɔɔ nɔ lɛ.​—Bɔfoi 13:33.

Mɛi krokomɛi hu ni afɔɔ amɛ ekoŋŋ lɛ, abaptisiɔ amɛ yɛ nu mli dani amɛnáa mumɔ krɔŋkrɔŋ lɛ. * (Bɔfoi 2:38, 41) Enɛ hãa amɛnáa hiɛnɔkamɔ ni mli wa akɛ amɛbaahi wala mli yɛ ŋwɛi, ni Nyɔŋmɔ baahã enɛ aba mli yɛ gbohiiashitee lɛ mli.​—1 Korintobii 15:42-49.

Susumɔi ni ejaaa ni ahiɛ yɛ fɔmɔ ekoŋŋ he

Susumɔ ni ejaaa: Esa akɛ afɔ mɔ ko ekoŋŋ dani abaanyɛ ahere eyiwala loo ebaanyɛ etsɔ Kristofonyo.

Anɔkwa sane: Kristofoi krokomɛi ni baafee Nyɔŋmɔ Maŋtsɛyeli lɛ shishi bii ni baahi shikpɔŋ lɛ nɔ lɛ hu baaná Yesu afɔleshaa lɛ he sɛɛ, shi jeee mɛi ni afɔ amɛ ekoŋŋ ni kɛ Yesu baaye nɔ lɛ pɛ. (1 Yohane 2:1, 2; Kpojiemɔ 5:9, 10) Kristofoi krokomɛi nɛɛ baaná hegbɛ kɛhi Paradeiso lɛ mli yɛ shikpɔŋ lɛ nɔ kɛya naanɔ.​—Lala 37:29; Mateo 6:9, 10; Kpojiemɔ 21:1-5.

Susumɔ ni ejaaa: Mɔ diɛŋtsɛ baanyɛ ehã afɔ lɛ ekoŋŋ.

Anɔkwa sane: Mɔ fɛɛ mɔ yɛ hegbɛ akɛ ebaatsi ebɛŋkɛ Nyɔŋmɔ ni ahere eyiwala. (1 Timoteo 2:3, 4; Yakobo 4:8) Shi Nyɔŋmɔ ji mɔ ni halaa mɛi ni abaafɔ ekoŋŋ loo akɛ mumɔ krɔŋkrɔŋ baafɔ amɛ mu lɛ. Biblia lɛ tsɔɔ akɛ, kɛ́ abaafɔ mɔ ko ekoŋŋ lɛ “edamɔɔɔ nɔ ni mɔ shweɔ aloo mɔ lɛ mɔdɛŋbɔɔ nɔ, shi moŋ edamɔ Nyɔŋmɔ nɔ.” (Romabii 9:16) Abaanyɛ atsɔɔ wiemɔ ni ji ‘fɔmɔ ekoŋŋ’ lɛ shishi akɛ ‘ajɛ ŋwɛi afɔ,’ ni no maa nɔ mi akɛ ‘ajɛɔ ŋwɛi’ afɔɔ mɔ ko ekoŋŋ loo Nyɔŋmɔ ni halaa mɛi ni afɔɔ ekoŋŋ lɛ.​—Yohane 3:3, shishigbɛ niŋmaa.

^ kk. 9 Kornelio kɛ eshĩabii lɛ pɛ ná mumɔ krɔŋkrɔŋ lɛ dani abaptisi amɛ.​—Bɔfoi 10:44-48.