Mɛni Esa Akɛ Ofee Koni Ohi Shi Kɛya Naanɔ?
Hetoo ni Biblia lɛ kɛhãa
Biblia lɛ ewo shi akɛ: “Mɔ ni feɔ nɔ ni Nyɔŋmɔ sumɔɔ lɛ hiɔ shi kɛyaa naanɔ.” (1 Yohane 2:17, Holy Bible—Easy-to-Read Version) Mɛni Nyɔŋmɔ taoɔ ni ofee?
Kasemɔ Nyɔŋmɔ kɛ e-Bi Yesu he nii. Yesu sɔle ekɛɛ Nyɔŋmɔ akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.” (Yohane 17:3) Kɛ́ akɛɛ esa akɛ ‘wɔle’ Nyɔŋmɔ kɛ Yesu lɛ, mɛni no tsɔɔ? Kɛ́ wɔkase Biblia lɛ ni wɔkɛ emli saji lɛ tsu nii lɛ, no tsɔɔ akɛ wɔle amɛ. a Biblia lɛ hãa wɔleɔ wɔ-Bɔlɔ lɛ, ni ji Yehowa Nyɔŋmɔ, kɛ wɔ-Walahalɔ lɛ jwɛŋmɔ. (Bɔfoi 17:24, 25) Biblia lɛ kɛɔ wɔ e-Bi Yesu, mɔ ni tsɔɔ mɛi ‘nibii ni hãa anáa naanɔ wala lɛ’ hu he sane.—Yohane 6:67-69.
Feemɔ nibii ni tsɔɔ akɛ oyɛ hemɔkɛyeli yɛ Yesu kpɔmɔ afɔleshãa lɛ mli. Yesu ba shikpɔŋ lɛ nɔ ‘koni ebasɔmɔ, ni ekɛ ewala ahã akɛ kpɔmɔnɔ.’ (Mateo 20:28) Yesu kpɔmɔ afɔleshãa lɛ gbele gbɛ kɛhã adesai koni amɛhi shi kɛya naanɔ yɛ Paradeiso yɛ shikpɔŋ lɛ nɔ. b (Lala 37:29) Yesu kɛɛ: “Nyɔŋmɔ sumɔɔ je lɛ aahu akɛ ekɛ e-Bi koome lɛ hã, koni mɔ fɛɛ mɔ ni heɔ enɔ eyeɔ lɛ hiɛ akakpãtã shi moŋ ená naanɔ wala.” (Yohane 3:16) Kadimɔ akɛ ebiɔ babaoo fe ni abaahe Yesu nɔ aye kɛkɛ. Esa akɛ ‘wɔfee nibii ni tsɔɔ akɛ wɔheɔ enɔ wɔyeɔ,’ no ji, wɔhi shi yɛ nibii ni Yesu tsɔɔ lɛ kɛ nɔ ni e-Tsɛ sumɔɔ lɛ anaa.—Mateo 7:21; Yakobo 2:17.
Feemɔ nibii ni baahã naanyobɔɔ kpakpa ahi okɛ Nyɔŋmɔ teŋ. Nyɔŋmɔ miisumɔ ni wɔtsi wɔbɛŋkɛ lɛ, ni wɔkɛ lɛ abɔ naanyo. (Yakobo 2:23; 4:8) Nyɔŋmɔ yɛ kɛmiiya naanɔ. Egboŋ kɔkɔɔkɔ, ni eesumɔ ni enanemɛi hu ahi shi kɛya naanɔ. Nyɔŋmɔ tsɔɔ e-Wiemɔ ni ji Biblia lɛ nɔ ehãa mɛi ni taoɔ esɛɛ gbɛ lɛ leɔ nɔ ni esumɔɔ, no ji: “Nyɛhia shi kɛyaa naanɔ yɛ miishɛɛ mli.”—Lala 22:26.
Susumɔi Ni Ejaaa Ni Ahiɛ Yɛ Shi Ni Abaahi Kɛya Naanɔ Lɛ He
Susumɔ ni ejaaa: Adesai amɔdɛŋbɔi baanyɛ ahã ahi shi kɛya naanɔ.
Anɔkwa sane: Eyɛ mli akɛ hiɛyaai komɛi ni aná yɛ helatsamɔ mli lɛ baanyɛ ahã adesai awala sɛɛ atsɛ fioo moŋ, shi mɔdɛŋbɔi nɛɛ nyɛŋ ehã ahi shi kɛya naanɔ. Nyɔŋmɔ pɛ baanyɛ ahã wɔhi shi kɛya naanɔ, ejaakɛ lɛ pɛ eŋɔɔ “wala jɛɔ.” (Lala 36:9) Ewo shi akɛ, “ebaami gbele kɛbaaya naanɔ” ni ebaahã adesai fɛɛ ni yeɔ lɛ anɔkwa lɛ, ahi shi kɛya naanɔ.—Yesaia 25:8; 1 Yohane 2:25.
Susumɔ ni ejaaa: Mɛi ni jɛ maji pɔtɛɛ komɛi anɔ lɛ pɛ baahi shi kɛya naanɔ.
Anɔkwa sane: Nyɔŋmɔ kwɛɛɛ hiɛiaŋ. Nɔ ni efeɔ moŋ ji, “yɛ jeŋmaŋ fɛɛ jeŋmaŋ mli lɛ, mɔ ni sheɔ lɛ gbeyei ni efeɔ nɔ ni ja lɛ, lɛ ji mɔ ni enáa ehe miishɛɛ.” (Bɔfoi 10:34, 35) Mɛi ni jɛ shihilɛi srɔtoi amli kɛ maji srɔtoi anɔ, ni yeɔ Nyɔŋmɔ wiemɔ lɛ nɔ loo amɛfeɔ nɔ ni esumɔɔ lɛ baanyɛ ahi shi kɛya naanɔ.
Susumɔ ni ejaaa: Naanɔ wala baaje mɛi atsine.
Anɔkwa sane: Nyɔŋmɔ ni sumɔɔ wɔ, ni esumɔɔ ni wɔná miishɛɛ lɛ ji mɔ ni kɛɛ ebaahã wɔhi shi kɛya naanɔ lɛ. (Yakobo 1:17; 1 Yohane 4:8) Ele akɛ, kɛ́ wɔbaaná miishɛɛ lɛ, esa akɛ wɔtsu nitsumɔ ni hãa mɔ tsui nyɔɔ emli. (Jajelɔ 3:12) Nyɔŋmɔ ewo shi akɛ, ebaahã mɛi ni baahi shi kɛya naanɔ yɛ shikpɔŋ lɛ nɔ lɛ, aná nitsumɔi kpakpai ni baahã amɛtsui anyɔ amɛmli, ni amɛ kɛ amɛsuɔlɔi baaná he sɛɛ lɛ amɛtsu.—Yesaia 65:22, 23.
Kɛfata he lɛ, mɛi ni baahi shi kɛya naanɔ lɛ baaya nɔ akase nibii hei ni kɔɔ amɛ-Bɔlɔ lɛ kɛ nibii srɔtoi babaoo ni ebɔ lɛ ahe nii. Ebɔ gbɔmɛi kɛ henumɔ koni amɛsumɔ akɛ amɛbaahi shi kɛya naanɔ ni amɛkase ehe nii, eyɛ mli akɛ “gbɔmɛi nyɛŋ aná ale nitsumɔ ni anɔkwa Nyɔŋmɔ lɛ tsuɔ kɛjɛɔ shishijee kɛyaa naagbee lɛ.” (Jajelɔ 3:10, 11) Enɛ hewɔ lɛ, mɛi ni baahi shi kɛya naanɔ lɛ baaná nibii babaoo amɛkase kɛ nibii babaoo hu amɛfee be fɛɛ be.
a Yehowa Odasefoi kɛ mɛi kaseɔ Biblia lɛ ni amɛheee nɔ ko. Kɛ́ ootao ole enɛ he saji krokomɛi lɛ, kwɛmɔ vidio ni ji Mɛni Yaa Nɔ yɛ Biblia Nikasemɔ Feemɔ Mli? lɛ.
b Kanemɔ sane ni ji “Mɛɛ Gbɛ Nɔ Yesu Hereɔ Mɛi Ayiwala?” lɛ.
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Mɛɛ Gbɛ Nɔ Yesu Hereɔ Mɛi Ayiwala?
Mɛni hewɔ ehe miihia ni Yesu akpa fai ehã wɔ lɛ? Ani hemɔkɛyeli ni wɔbaaná yɛ Yesu mli lɛ pɛ ji nɔ ni baahã ahere wɔyiwala?
BUU-MƆƆ
Yehowa “Jeee Mɛi Ahiɛaŋkwɛlɔ”
Nyɔŋmɔ boɔ mɛi ni jaa lɛ lɛ asɔlemɔi atoi ni etsuɔ he nii ekɔɔɔ he eko amɛhewolonɔ su, maji anɔ ni amɛjɛ, loo mɛi ni amɛji. Te wɔfeɔ tɛŋŋ wɔleɔ?
BIBLIA MLI ŊMALƐI NI AGBALA MLI
Yohane 3:16 Ni Agbala Mli—“Ejaakɛ Nɛkɛ Nyɔŋmɔ Sumɔ Je Lɛ”
Mɛɛ gbɛ nɔ Yehowa Nyɔŋmɔ tsɔɔ akɛ esumɔɔ wɔ, ni eesumɔ ni wɔhi shi kɛya naanɔ?
