Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Ani Woloŋlelɔi Heɔ Amɛyeɔ akɛ Yesu Hi Shi?

Ani Woloŋlelɔi Heɔ Amɛyeɔ akɛ Yesu Hi Shi?

Woloŋlelɔi yɛ nɔdaamɔnɔ ni yɔɔ shiŋŋ ni amɛkɛheɔ amɛyeaɔ akɛ Yesu hi shi. Yɛ saji ni yinɔsaneŋmalɔi ni hi shi yɛ klɛŋklɛŋ afii 100 kɛ afii 200 ŋmɛnɛ beaŋ lɛ eŋmala yɛ Yesu kɛ mra beaŋ Kristofoi lɛ ahe lɛ gbɛfaŋ lɛ, Encyclopædia Britannica, afi 2002 nɔ lɛ kɛɛ akɛ: “Saji srɔtoi nɛɛ tsɔɔ akɛ yɛ mra blema beaŋ lɛ, ehenyɛlɔi lɛ po ejeee mɔ ni Yesu ji lɛ he ŋwane, sɛɛ mli kwraa yɛ afi 1700 afiiaŋ naagbee gbɛ kɛ afi 1800 kɛ afi 1900 shishijee gbɛ ni aje he ŋwane klɛŋklɛŋ kwraa, shi jeee ko.

Yɛ afi 2006 lɛ, wolo ko (Jesus and Archaeology) kɛɛ akɛ: “Ŋmɛnɛ lɛ, woloŋlelɔ ni abuɔ lɛ waa ko bɛ ni baaje he ŋwane akɛ Yudanyo ko ni atsɛɔ lɛ Yesu, Yosef bi lɛ hi shi; amɛteŋ pii moŋ kɛɔ akɛ, kpaako wɔbale enifeemɔi kɛ etsɔɔmɔi lɛ ekome.

Biblia lɛ jieɔ Yesu kpo etsɔɔ afaŋŋ akɛ eji mɔ ko ni yɔɔ diɛŋtsɛ. Ehãa wɔleɔ eblematsɛmɛi kɛ ewekumɛi ni bɛŋkɛ kpaakpa lɛ agbɛ́i. (Mateo 1:1; 13:55) Kɛfata he lɛ, ehãa wɔleɔ maŋtsɛmɛi loo amraloi ni hi shi yɛ Yesu beaŋ lɛ agbɛ́i. (Luka 3:1, 2) Nibii nɛɛ hãa niiamlitaolɔi nyɛɔ amɛpɛiɔ bɔ ni Biblia mli saji lɛ ja hã lɛ amli.