Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Ani Yesu Bote Gbalashihilɛ Mli? Ani Yesu yɛ Nyɛmimɛi?

Ani Yesu Bote Gbalashihilɛ Mli? Ani Yesu yɛ Nyɛmimɛi?

Hetoo ni Biblia lɛ kɛhãa

Biblia lɛ feɔ lɛ faŋŋ akɛ, Yesu boteee gbalashihilɛ mli, tsɛ ajeee gbɛ atsĩii tã moŋ. * Susumɔ saji ni nyiɛ sɛɛ nɛɛ ahe okwɛ.

  1. Bei pii lɛ, Biblia lɛ tsĩɔ Yesu weku lɛ, yei ni fata ehe kɛshiɛ lɛ, kɛ yei hu ni damɔ emasɛi be ni agbe lɛ lɛ atã, kɛ̃lɛ etsĩii tã kɔkɔɔkɔ akɛ eyɛ ŋa. (Mateo 12:46, 47; Marko 3:31, 32; 15:40; Luka 8:2, 3, 19, 20; Yohane 19:25) Yiŋtoo titri hewɔ ni Biblia lɛ etsĩii sane nɛɛ tã lɛ ji akɛ Yesu boteee gbalashihilɛ mli.

  2. Be ni Yesu wieɔ mɛi ni boteee gbalashihilɛ mli bɔ ni afee ni amɛnyɛ amɛtsu babaoo yɛ Nyɔŋmɔ sɔɔmɔ lɛ mli ahe lɛ, ekɛɛ ekaselɔi lɛ akɛ, “Mɔ ni baanyɛ [oshijayeli] mli amɔ lɛ, hã emɔ mli.” (Mateo 19:10-12) Eto okadi ehã mɛi ni halaa akɛ amɛboteŋ gbalashihilɛ mli bɔ ni afee ni amɛnyɛ amɛtsu babaoo yɛ Nyɔŋmɔ sɔɔmɔ lɛ mli.Yohane 13:15; 1 Korintobii 7:32-38.

  3. Be ni eshwɛ fioo ni Yesu baagbo lɛ, eto gbɛjianɔ koni akwɛ emami. (Yohane 19:25-27) Eji Yesu bote gbalashihilɛ mli loo efɔ bii kulɛ, nakai nɔŋŋ ebaato gbɛjianɔ koni akwɛ eŋa kɛ ebii lɛ hu.

  4. Biblia lɛ kɛ Yesu feɔ nɔkwɛmɔnɔ kɛhãa wumɛi, shi etsɔɔɔ bɔ ni ekɛ yoo hi shi ehã akɛ eŋa. No najiaŋ lɛ, Biblia lɛ kɛɔ akɛ: “Wumɛi, nyɛyaa nɔ nyɛsumɔa nyɛŋamɛi, tamɔ bɔ ni Kristo lɛ hu sumɔ asafo lɛ, ní eŋɔ ehe ehã yɛ ehewɔ lɛ.” (Efesobii 5:25) Eji Yesu bote gbalashihilɛ mli be ni eyɔɔ shikpɔŋ lɛ nɔ kulɛ, ani akɛ nɔkwɛmɔnɔ ni nɔ bɛ ni efee akɛ wu lɛ moŋ tsuŋ nii yɛ ŋmalɛ nɛɛ mli?

Ani Yesu yɛ nyɛmimɛi?

Hɛɛ, kɛhooo lɛ Yesu yɛ nyɛmimɛi ekpaa. Enyɛmimɛi ji Yakobo, Yosef, Simon, kɛ Yuda; agbɛnɛ hu, kɛhooo lɛ eyɛ nyɛmimɛi yei enyɔ. (Mateo 13:54-56; Marko 6:3) Yesu nyɛ Maria kɛ ewu Yosef ji mɛi ni fɔ enyɛmimɛi nɛɛ. (Mateo 1:25) Biblia lɛ tsɛɔ Yesu akɛ Maria “kromɔbi lɛ,” ni enɛ tsɔɔ akɛ Maria yɛ bii krokomɛi hu.Luka 2:7.

Susumɔi ni ejaaa ni mɛi hiɛ yɛ Yesu nyɛmimɛi lɛ ahe

Bɔ ni afee ni mɛi aná nɔ ko kɛfĩ amɛsusumɔ ni amɛhiɛ akɛ Maria hi shi akɛ oblayoofro ewala shihilɛ fɛɛ lɛ sɛɛ lɛ, amɛtsɔɔ wiemɔ ni ji “nyɛmimɛi hii” lɛ shishi yɛ gbɛi srɔtoi anɔ. Ákɛ nɔkwɛmɔnɔ lɛ, mɛi komɛi susuɔ akɛ Yesu nyɛmimɛi lɛ ji Yosef bii ni ekɛ yoo kroko fɔ dani ekɛ Maria bahi shi. Kɛ̃lɛ, Biblia lɛ hãa wɔnaa akɛ, Yesu ji mɔ ni nine shɛ gbɛnaa nii ni ji maŋtsɛyeli lɛ ni awo David shi yɛ he lɛ nɔ akɛ gboshinii. (2 Samuel 7:12, 13; Luka 1:32) Eji Yosef yɛ bihii krokomɛi ni ye Yesu onukpa kulɛ, amɛteŋ onukpa lɛ ji mɔ ni baaye Yosef gboshinii lɛ.

Ani Yesu kaselɔi lɛ loo emumɔŋ nyɛmimɛi hii lɛ ji mɛi ni awie amɛhe akɛ ‘enyɛmimɛi hii’ lɛ? Susumɔ nɛɛ teɔ shi ewoɔ nɔ ni Ŋmalɛi lɛ kɛɔ lɛ, ejaakɛ Biblia lɛ wie akɛ, “Anɔkwa, no mli lɛ enyɛmimɛi hii lɛ ejieee hemɔkɛyeli kpo yɛ emli.” (Yohane 7:5) Biblia lɛ tsɔɔ akɛ jeee Yesu nyɛmimɛi hii lɛ nɔŋŋ ji ekaselɔi lɛ.Yohane 2:12.

Mɛi komɛi hu ewie akɛ, mɛi ni awie amɛhe akɛ Yesu nyɛmimɛi hii lɛ ji Yosef kɛ Maria nyɛmimɛi abii. Kɛ̃lɛ, Hela Ŋmalɛi lɛ kɛ wiemɔi srɔtoi tsu nii kɛhã “nyɛmimɛi hii,” “wekumɛi,” kɛ ‘tsɛkwɛ̃ bihii loo nyɛkwɛ̃ bihii.’ (Luka 21:16; Kolosebii 4:10) Biblia he nilelɔi babaoo kpɛlɛɔ nɔ akɛ, mɛi ni Biblia lɛ wieɔ amɛhe akɛ Yesu nyɛmimɛi lɛ ji enyɛmimɛi diɛŋtsɛ. Ákɛ nɔkwɛmɔnɔ lɛ, wolo ko (The Expositor’s Bible Commentary) kɛɛ akɛ: “Wiemɔ ni akɛtsu nii akɛ “nyɛmimɛi hii” . . . lɛ ji bihii ni Maria kɛ Yosef fɔ, no hewɔ lɛ, amɛji Yesu nyɛmimɛi hii akɛni amɛnyɛ ji Maria lɛ hewɔ.” *

^ kk. 3 Biblia lɛ tsɛɔ Yesu akɛ ayemforo wu, shi kɛ́ okwɛ amaniɛbɔɔ tso muu lɛ fɛɛ lɛ, obaana akɛ eji mfonirifeemɔŋ wiemɔ.Yohane 3:28, 29; 2 Korintobii 11:2.

^ kk. 13 Kwɛmɔ woji ni ji, The Gospel According to St. Mark, Second Edition, ni Vincent Taylor ŋma lɛ, baafã 249, kɛ A Marginal Jew—Rethinking the Historical Jesus, ni John P. Meier ŋmã lɛ, Kpo 1, baafã 331-332 lɛ hu.

Ekrokromɛi Hu Nɛ

Namɔ Ji Yesu Kristo?

Kanemɔ ni ona nɔ hewɔ ni Yesu gbo, nɔ ni kpɔmɔnɔ lɛ ji, kɛ nɔ ni Yesu feɔ amrɔ nɛɛ.