Shi kɛya he ni ato saneyitsei lɛ anaa yɛ lɛ

Ani Nyɔŋmɔ Yɛ?

Ani Nyɔŋmɔ Yɛ?

Hetoo ni Biblia lɛ kɛhãa

 Hɛɛ, Biblia lɛ kɛ odaseyeli ni mli wa hãa kɛtsɔɔ akɛ Nyɔŋmɔ yɛ. Biblia lɛ woɔ wɔ hewalɛ koni wɔkɛ ‘wɔjwɛŋmɔ nyɛmɔi’ kɛ “sɛɛyoomɔ” atsu nii kɛná Nyɔŋmɔ mli hemɔkɛyel, jeee jamɔŋ tsɔɔmɔi ni akaa yiŋ awieɔ ni wɔbaahe wɔye. (Romabii 12:1; 1 Yohane 5:20) Jwɛŋmɔ niiahesusumɔi ni nyiɛ sɛɛ ni damɔ Biblia lɛ nɔ lɛ ahe okwɛ:

  •   Bɔ ni ato je lɛ kɛ emli nibii ni wala yɔɔ amɛmli lɛ ahe gbɛjianɔ ahã lɛ tsɔɔ akɛ Bɔlɔ ko yɛ. Biblia kɛɔ akɛ: “Yɛ anɔkwale mli lɛ, shĩa fɛɛ shĩa lɛ mɔ ko kɛ̃ ma, shi mɔ ni fee nibii fɛɛ ji Nyɔŋmɔ.” (Hebribii 3:4) Niiahesusumɔ ni yɔɔ ŋmalɛ nɛɛ mli lɛ bɛ haŋtsii, shi woloŋlelɔi babaoo naa lɛ akɛ eji odaseyeli ni mli wa. a

  •   Ákɛ adesai lɛ, wɔshweɔ waa akɛ wɔnu yiŋtoo ni yɔɔ shihilɛ mli lɛ sɛɛ, etamɔ hɔmɔ kroko ko ní kɛ́ wɔye nii tete po lɛ, ja wɔná hetoo dani wɔhe baajɔ wɔ. Enɛ fata nɔ ni Biblia lɛ tsɛɔ lɛ akɛ mumɔŋ hiamɔ nii lɛ ahe, ni efata shwelɛ ni wɔnáa akɛ esa akɛ wɔle Nyɔŋmɔ, ni wɔjá lɛ lɛ he. (Mateo 5:3; Kpojiemɔ 4:11) Nɛkɛ shwelɛ nɛɛ hãa wɔnáa nɔmimaa akɛ Nyɔŋmɔ yɛ, ni no hu tsɔɔ akɛ eji Bɔlɔ ko ni yɔɔ suɔmɔ ni miisumɔ ni wɔnine ashɛ nakai hiamɔ nii lɛ nɔ.—Mateo 4:4

  •   Atsɔ hiɛ afii ohai komɛi aŋmala gbalɛi fitsofitso yɛ Biblia lɛ mli, ni gbalɛi nɛɛ ba mli pɛpɛɛpɛ taakɛ agba lɛ. Bɔ ni gbalɛi nɛɛ ja ni amɛba mli fitsofitso lɛ tsɔɔ akɛ, amɛjɛ mɔ ko ni nɔ kwɔ kwraa fe adesai ŋɔɔ.—2 Petro 1:21.

  •   Jeŋ shikpámɔ mli nilee srɔtoi ni Biblia ŋmalɔi ná kɛtsu nii lɛ yaa shɔŋŋ kwraa fe amɛbeiaŋ bii lɛ anɔ. Ákɛ nɔkwɛmɔnɔ lɛ, yɛ blema lɛ, mɛi babaoo hé amɛye akɛ, shikpɔŋ lɛ ma kooloo ko tamɔ shuɔ, batafo, loo tsina nuu ko nɔ. Nɔ ni tamɔɔɔ nakai lɛ, Biblia lɛ kɛɛ akɛ, Nyɔŋmɔ ŋɔɔ “shikpɔŋ lɛ etsotsoroɔ shi ni jeee nɔ ko nɔ.” (Hiob 26:7) Kɛfata he lɛ, Biblia etsɔɔ yɛ gbɛ ni ja nɔ akɛ shikpɔŋ lɛ yɛ “kokoroo.” (Yesaia 40:22) Mɛi babaoo nuɔ he akɛ, niiamlitsɔɔmɔ ni ja ni abaanyɛ akɛhã yɛ nilee ni Biblia ŋmalɔi lɛ kɛtsu nii lɛ he ji akɛ, Nyɔŋmɔ ji mɔ ni kɛ nilee ni tamɔ nɛkɛ lɛ duro amɛ.

  •   Biblia lɛ kɛ sanebimɔi ni shishinumɔ wala lɛ ahetoo hãa, ni eji sanebimɔi ní kɛ́ ahãa hetoo lɛ afee faŋŋ lɛ, ebaahã amu sane naa akɛ Nyɔŋmɔ ko bɛ. Ákɛ nɔkwɛmɔnɔ lɛ: Kɛ́ Nyɔŋmɔ yɛ suɔmɔ, ni eyɛ hewalɛ fe mɔ fɛɛ mɔ lɛ, mɛni hewɔ nɔnaa kɛ efɔŋfeemɔ eyi je lɛŋ obɔ nɛkɛ? Mɛni hewɔ jámɔ hãa mɛi feɔ nibii gbohii moŋ fe nibii kpakpai lɛ?—Tito 1:16.

a Ákɛ nɔkwɛmɔnɔ lɛ, be ko lɛ, ŋulamii ahe nikaselɔ Allan Sandage wie je lɛ he akɛ: “Minyɛɛɛ mahé maye akɛ gbɛjianɔtoo nɛɛ fɛɛ ba kɛkɛ. Mɔ ko kɛ̃ to he gbɛjianɔ. Migbɛfaŋ lɛ, minuuu shishi akɛ Nyɔŋmɔ yɛ, shi ja nakai dani wɔbaanyɛ wɔnu bɔ ni fee ni wala ba shihilɛ mli lɛ shishi.”