Shi kɛya he ni ato saneyitsei lɛ anaa yɛ lɛ

Ani Nyɔŋmɔ Tsɔ Sutsakemɔ Nɔ Ebɔ Nibii Srɔtoi Ni Wala Yɔɔ Amɛmli Lɛ?

Ani Nyɔŋmɔ Tsɔ Sutsakemɔ Nɔ Ebɔ Nibii Srɔtoi Ni Wala Yɔɔ Amɛmli Lɛ?

Hetoo ni Biblia lɛ kɛhãa

Dabi. Biblia lɛ wieɔ akɛ Nyɔŋmɔ bɔ adesai, kooloi, kɛ tsei “henɔi” srɔtoi ni wala yɔɔ amɛmli lɛ. * (1 Mose 1:12, 21, 25, 27; Kpojiemɔ 4:11) Ekɛɔ akɛ adesai fɛɛ jɛ Adam kɛ Hawa, ni ji wɔklɛŋklɛŋ fɔlɔi lɛ amli. (1 Mose 3:20; 4:1) Biblia lɛ fĩii susumɔ ni ahiɛ akɛ Nyɔŋmɔ tsɔ sutsakemɔ nɔ ebɔ nibii srɔtoi ni wala yɔɔ amɛmli lɛ sɛɛ. Shi, nɔ ko kwraa bɛ Biblia lɛ mli ni teɔ shi ewoɔ jeŋ shikpalɔi ni kɛɔ akɛ adebɔɔ nibii lɛ eko fɛɛ eko yɛ henɔi lɛ.

 Ani Nyɔŋmɔ tsɔ sutsakemɔ nɔ ebɔ nibii?

Mɛi ni heɔ amɛyeɔ akɛ Nyɔŋmɔ tsɔ sutsakemɔ nɔ ebɔ nibii ni wala yɔɔ amɛmli lɛ hiɛ susumɔi srɔtoi yɛ gbɛ nɔ ni etsɔ ebɔ nii ehã lɛ he. Encyclopædia Britannica lɛ tsɔɔ mli akɛ, mɛi komɛi heɔ amɛyeɔ akɛ “nyɛmɔ ni kooloi kɛ tsei komɛi yɔɔ ni amɛkɛshwereɔ yɛ he ko pɔtɛɛ lɛ ji gbɛ kome ni Nyɔŋmɔ tsɔɔ nɔ ekudɔɔ nibii ni yɔɔ je lɛ mli lɛ.”

Mɛi ni heɔ sutsakemɔ amɛyeɔ lɛ kɛɔ akɛ:

  • Nibii fɛɛ ni wala yɔɔ amɛmli lɛ jɛ amɛblematsɛmɛi ni hi shi afii ni eho jeeŋmɔ lɛ amli kɛba.

  • Nɔ ko ni wala yɔɔ mli lɛ baanyɛ atsake ni etsɔ nɔ kroko kwraa ni wala yɔɔ mli.

  • Yɛ gbɛ ko nɔ lɛ, wɔbaanyɛ wɔwie akɛ Nyɔŋmɔ ji mɔ ni hãa tsakemɔi nɛɛ baa.

 Ani sutsakemɔ kɛ Biblia lɛ kpãa gbee?

Mɛi ni heɔ sutsakemɔ amɛyeɔ lɛ tsɔɔ akɛ nɔ ni Biblia lɛ wieɔ yɛ adebɔɔ he ni abɔ he amaniɛ yɛ Mose klɛŋklɛŋ wolo lɛ mli lɛ ejaaa. Kɛ̃lɛ, Yesu tsɔɔ akɛ amaniɛbɔɔ ni yɔɔ Mose klɛŋklɛŋ wolo lɛ mli lɛ ja. (1 Mose 1:26, 27; 2:18-24; Mateo 19:4-6) Biblia lɛ kɛɔ akɛ dani Yesu baaba shikpɔŋ lɛ nɔ lɛ, no mli lɛ, ekɛ Nyɔŋmɔ yɛ ŋwɛi ni eye ebua Nyɔŋmɔ kɛbɔ “nibii fɛɛ” ni yɔɔ shihilɛ mli lɛ. (Yohane 1:3) No hewɔ lɛ, susumɔ ni mɛi hiɛ akɛ Nyɔŋmɔ tsɔ sutsakemɔ nɔ ebɔ nibii fɛɛ ni wala yɔɔ amɛmli lɛ kɛ tsɔɔmɔi ni yɔɔ Biblia lɛ mli lɛ kpãaa gbee.

 Ani nyɛmɔ ni kooloi kɛ tsei yɔɔ ni amɛkɛtsakeɔ amɛhe koni amɛhi wala mli lɛ ji sutsakemɔ?

Biblia lɛ etsɔɔɔ tsakemɔ ni yaa nɔ yɛ nibii ni wala yɔɔ amɛmli lɛ mli fitsofitso. Kɛfata he lɛ, ewieee hu akɛ kooloi kɛ tsei srɔtoi ni Nyɔŋmɔ bɔ lɛ nyɛŋ atsake, be ni amɛshwereɔ loo be ni amɛyahi he kroko ni baahã amɛya nɔ amɛhi wala mli lɛ. Eyɛ mli akɛ mɛi komɛi kɛɔ akɛ hei srɔtoi ni nibii ni wala yɔɔ amɛmli lɛ yahiɔ koni amɛya nɔ amɛhi wala mli lɛ ji sutsakemɔ henɔ ko moŋ, shi yɛ anɔkwale mli lɛ, nɔ ko hee ni wala yɔɔ mli jɛɛɛ tsakemɔi nɛɛ amli kɛbaaa.

^ kk. 1 Biblia lɛ kɛ wiemɔ ni ji “henɔ” tsuɔ nii, ni enɛ sa jogbaŋŋ. Bei pii lɛ, nɔ ni jeŋ shikpalɔi naa ni amɛkɛɔ akɛ eji sutsakemɔ lɛ ji adebɔɔ nii ni wala yɔɔ mli lɛ henɔ kɛkɛ, tamɔ abɔ he amaniɛ yɛ Mose klɛŋklɛŋ wolo lɛ mli lɛ.