Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Ani Jámɔi Fɛɛ lɛ Ekome Ni? Ani Fɛɛ Yaa Nyɔŋmɔ Ŋɔɔ?

Ani Jámɔi Fɛɛ lɛ Ekome Ni? Ani Fɛɛ Yaa Nyɔŋmɔ Ŋɔɔ?

Hetoo ni Biblia lɛ kɛhãa

Dabi, jeee jámɔi fɛɛ kɛ mɔ yaa Nyɔŋmɔ ŋɔɔ. Jámɔi ni esaaa Nyɔŋmɔ hiɛ lɛ ahe nɔkwɛmɔnii babaoo yɛ Biblia lɛ mli. Abaanyɛ ajara mli awo fãi enyɔ mli.

Fã 1: Mɛi ni jáa nyɔŋmɔi krokomɛi

Biblia lɛ wie amale nyɔŋmɔi nɛɛ ajamɔ he akɛ, ‘amale kɛkɛ ni, kɛ yakayaka nii ní he bɛ sɛɛnamɔ.’ (Yeremia 10:3-5; 16:19, 20) Yehowa * Nyɔŋmɔ fã blema Israel maŋ lɛ akɛ: “Kaaná nyɔŋmɔi krokomɛi yɛ misɛɛ.” (2 Mose 20:3, 23; 23:24) Be fɛɛ be ni Israelbii lɛ baajá nyɔŋmɔi krokomɛi lɛ, ‘Yehowa mli woɔ la waa.’4 Mose 25:3; 3 Mose 20:2; Kojolɔi 2:13, 14.

Nakai nɔŋŋ ŋmɛnɛ lɛ, Nyɔŋmɔ mli woɔ la yɛ jámɔ ni akɛhãa nibii ni atsɛɔ amɛ nyɔŋmɔi lɛ ahe. (1 Korintobii 8:5, 6; Galatiabii 4:8) Efãa mɛi ni sumɔɔ akɛ amɛjá lɛ, ní amɛtsi amɛhe kɛje amale jámɔ he lɛ akɛ: “Nyɛjea amɛteŋ, ni nyɛtsea nyɛhe.” (2 Korintobii 6:14-17) Eji jámɔi fɛɛ ekome ni, ni amɛhãa abɛŋkɛɔ Nyɔŋmɔ kulɛ, mɛni hewɔ mɔ ni Nyɔŋmɔ kɛ fãmɔ ni tamɔ nɛkɛ baahã?

Fã 2: Anɔkwa Nyɔŋmɔ lɛ ni ajáa yɛ gbɛ ni ekpɛlɛɛɛ nɔ

Biblia beiaŋ lɛ, bei komɛi lɛ, Israelbii lɛ sumɔɔ koni amɛkɛ hemɔkɛyelii kɛ nibii ni amɛkase kɛjɛ amale nyɔŋmɔi lɛ ajamɔ mli lɛ atsu nii yɛ Yehowa jamɔ mli, shi Yehowa ekpɛlɛɛɛ ní akɛ amale jámɔ futuɔ anɔkwa jámɔ. (2 Mose 32:8; 5 Mose 12:2-4) Yesu kpoo jamɔŋ hiɛnyiɛlɔi ni hi shi yɛ ebeiaŋ lɛ yɛ gbɛ ni amɛtsɔɔ nɔ amɛjáa Nyɔŋmɔ lɛ hewɔ; amɛhãa mɛi naa amɛ yɛ kponɔgbɛ akɛ amɛsumɔɔ Nyɔŋmɔ, shi amɛkɛ osatofeemɔ ‘kuɔ amɛhiɛ amɛshwieɔ Mla lɛ mli nibii ni he hiaa titri ni ji, jalɛsaneyeli kɛ mɔbɔnalɛ kɛ anɔkwayeli lɛ anɔ.’Mateo 23:23.

Nakai nɔŋŋ ŋmɛnɛ lɛ, jámɔ ni tsɔɔ mɛi anɔkwalei lɛ pɛ ji nɔ ni kɛ mɛi yaa Nyɔŋmɔ ŋɔɔ pɛ. Anaa anɔkwale nɛɛ yɛ Biblia lɛ mli. (Yohane 4:24; 17:17; 2 Timoteo 3:16, 17) Jámɔi ni tsɔɔmɔi teɔ shi woɔ Biblia lɛ tsiɔ mɛi kɛjeɔ Nyɔŋmɔ he. Aná tsɔɔmɔi babaoo tamɔ—Triniti, susuma ni gbooo, kɛ naanɔ piŋmɔ—ni mɛi susuɔ akɛ ejɛ Biblia lɛ mli lɛ kɛjɛ mɛi ni jáa amale nyɔŋmɔi lɛ aŋɔɔ. Jámɔ ni tsɔɔ tsɔɔmɔi nɛɛ ji ‘yakatswaa nɔ̃’ loo ehe bɛ sɛɛnamɔ, ejaakɛ ekɛ gbɔmɛi akusumii yeɔ Nyɔŋmɔ kitãi lɛ anajiaŋ.Marko 7:7, 8.

Nyɔŋmɔ sumɔɔɔ jámɔŋ osatofeemɔ kwraa. (Tito 1:16) Kɛ́ jámɔ ko baanyɛ aye abua mɛi koni amɛbɛŋkɛ Nyɔŋmɔ lɛ, esa akɛ jámɔ lɛ aná amɛdaa gbi shihilɛ nɔ hewalɛ, jeee kusumii kɛ ehenɔi kɛkɛ amɛbaaye nɔ. Ákɛ nɔkwɛmɔnɔ lɛ, Biblia lɛ kɛɔ akɛ: “Kɛ́ gbɔmɔ ko susuɔ akɛ eji Nyɔŋmɔ jálɔ, shi ewooo elilɛi manyoflɛ lɛ, eelaka lɛ diɛŋtsɛ etsui, ni ejámɔ lɛ, yaka ni. Jamɔ ni he tse ní abuleko yɛ wɔ-Nyɔŋmɔ kɛ wɔ-Tsɛ lɛ hiɛ ji enɛ: akɛ mɔ akwɛ awusãi kɛ yei okulafoi yɛ amɛmanehulu lɛ mli, ní ekwɛ ehe nɔ jogbaŋŋ ní je lɛ akawo ehe muji.” (Yakobo 1:26, 27; shishigbɛ niŋmaa) King James Version lɛ kɛ wiemɔ ni ji “jámɔ krɔŋŋ” tsu nii kɛhã jámɔ ni he tse, ni osatofeemɔ ko bɛ mli.

Ekrokomɛi Hu Nɛ

SANEKPAKPA NI JƐ NYƆŊMƆ ŊƆƆ!

Mɛni Ji Sanekpakpa ni Kɔɔ Jamɔ He?

Ani be ko baashɛ ni mɛi fɛɛ bafee ekome kɛja anɔkwa Nyɔŋmɔ koome lɛ?

BUU-MƆƆ

Ani Jamɔ Ko yɛ ni Abaanyɛ akɛ He Afɔ̃ Nɔ?

Ani jamɔ ko eha onine enyɛ shi pɛŋ? Kɛ́ nakai lɛ, ekolɛ ebaawa kɛha bo akɛ okɛ ohe baafɔ̃ jamɔ ko nɔ. Mɛɛ gbɛ nɔ Biblia lɛ ni obaakase lɛ baaye abua bo?