Shi kɛya he ni ato saneyitsei lɛ anaa yɛ lɛ

Mɛni Loo Namɔ Ji “Alfa Lɛ Kɛ Omega Lɛ”?

Mɛni Loo Namɔ Ji “Alfa Lɛ Kɛ Omega Lɛ”?

Hetoo ni Biblia lɛ kɛhãa

“Alfa lɛ kɛ Omega lɛ” damɔ shi kɛhã Yehowa Nyɔŋmɔ, ni ji Ofe lɛ. Wiemɔ nɛɛ jeɔ kpo shii etɛ yɛ Biblia lɛ mli.​—Kpojiemɔ 1:8; 21:6; 22:13. *

Mɛni hewɔ Nyɔŋmɔ tsɛ ehe akɛ “Alfa lɛ kɛ Omega lɛ”?

Alfa jeɔ Greek alfabɛta lɛ shishi, ni omega gbeɔ naa. Greek ji wiemɔ ni akɛŋma Biblia lɛ fã ni afɔɔ lɛ tsɛmɔ akɛ Kpaŋmɔ Hee lɛ, ni Kpojiemɔ wolo lɛ fata he lɛ. Akɛ gbɛhei ni alfa kɛ omega lɛ yɔɔ yɛ Greek alfabɛta lɛ mli lɛ feɔ nɔkwɛmɔnɔ kɛtsɔɔ akɛ Yehowa pɛ ji shishijee lɛ kɛ naagbee lɛ. (Kpojiemɔ 21:6) Eji Nyɔŋmɔ Ofe kɛjɛ teteete, ni ebaahi shi akɛ Nyɔŋmɔ Ofe kɛya naanɔ. Lɛ pɛ eyɔɔ “kɛjɛ naanɔ kɛmiiya naanɔ.”​—Lala 90:2.

Namɔ ji ‘klɛŋklɛŋ mɔ lɛ kɛ naagbee mɔ lɛ’?

Biblia lɛ kɛ wiemɔ nɛɛ tsuɔ nii kɛhãa Yehowa Nyɔŋmɔ kɛ e-Bi Yesu fɛɛ yɛ shishinumɔ srɔtoi amli. Naa nɔkwɛmɔnii enyɔ.

  • Yehowa wie yɛ Yesaia 44:6 lɛ akɛ: “Miji klɛŋklɛŋ mɔ lɛ, ni miji naagbee mɔ lɛ. Nyɔŋmɔ ko bɛ, ja mi.” Yehowa fee lɛ faŋŋ yɛ ŋmalɛ nɛɛ mli akɛ, lɛ ji anɔkwa Nyɔŋmɔ ni yɔɔ kɛjɛ naanɔ kɛyaa naanɔ lɛ; esɛɛ lɛ, nyɔŋmɔ ko bɛ. (5 Mose 4:35, 39) ‘Klɛŋklɛŋ mɔ lɛ kɛ naagbee mɔ lɛ’ ni akɛtsu nii yɛ biɛ lɛ kɛ wiemɔ ni ji “Alfa lɛ kɛ Omega lɛ” hiɛ shishinumɔ kome.

  • Kɛfata he lɛ, wiemɔ ni ji, ‘Klɛŋklɛŋ mɔ lɛ [pro’tos, jeee alfa] kɛ Naagbee mɔ lɛ’ [e’skha·tos, jeee omega]” jeɔ kpo yɛ Kpojiemɔ 1:​17, 18 kɛ 2:8. Yɛ kukuji nɛɛ amli lɛ, sane ni awieɔ he lɛ hãa wɔnaa akɛ mɔ ni awieɔ ehe lɛ gbo ni sɛɛ mli lɛ eba wala mli ekoŋŋ. No hewɔ lɛ, jeee Nyɔŋmɔ he awieɔ yɛ kukuji nɛɛ amli lɛ ejaakɛ Nyɔŋmɔ gboko dã. (Habakuk 1:​12) Shi Yesu gbo ni atee lɛ shi. (Bɔfoi 3:​13-​15) Lɛ ji klɛŋklɛŋ gbɔmɔ ni atee lɛ shi kɛtee ŋwɛi ní ahã lɛ wala ni sɛɛ nyɛŋ afo, ni amrɔ nɛɛ ehiɛ “kã kɛmiiya naanɔi anaanɔ” yɛ jɛmɛ. (Kpojiemɔ 1:18; Kolosebii 1:18) Kɛjɛ no sɛɛ kɛbaa lɛ, Yesu ji mɔ ni teɔ mɛi fɛɛ ashi. (Yohane 6:​40, 44) Lɛ ji naagbee mɔ ni Yehowa diɛŋtsɛ tee lɛ shi. (Bɔfoi 10:40) Enɛ hewɔ lɛ, abaanyɛ atsɛ Yesu yɛ gbɛ ni ja nɔ akɛ, ‘Klɛŋklɛŋ mɔ lɛ kɛ Naagbee mɔ lɛ.’

Ani Kpojiemɔ 22:13 lɛ tsɔɔ akɛ Yesu ji “Alfa Lɛ Kɛ Omega Lɛ”?

Dabi. Atsɔɔɔ mɔ tuuntu ni wieɔ yɛ Kpojiemɔ 22:13 lɛ, ni mɛi srɔtoi ji mɛi ni wieɔ yɛ yitso nɛɛ mli. Woloŋlelɔ ko ni atsɛɔ lɛ William Barclay wie Kpojiemɔ wolo lɛ fã nɛɛ he akɛ: “Atoko saji nɛɛ anaa yɛ gbɛ pɔtɛɛ ko nɔ; . . . ni bei pii lɛ ewa waa akɛ obaana mɔ tuuntu ni wieɔ lɛ.” (The Revelation of John, Kpo 2, Revised Edition, baafa 223) No hewɔ lɛ, abaanyɛ akɛɛ akɛ Mɔ Ni atsɛ lɛ “Alfa Lɛ Kɛ Omega Lɛ” yɛ Kpojiemɔ 22:13 lɛ, lɛ nɔŋŋ ji mɔ ni awie ehe yɛ Kpojiemɔ wolo lɛ mli hei krokomɛi lɛ​—lɛ ji Yehowa Nyɔŋmɔ.

^ kk. 3 Nɔ ni ejwɛ nɔ lɛ jeɔ kpo yɛ Kpojiemɔ 1:​11Ga Biblia momo lɛ mli. Shi ŋmɛnɛ beiaŋ Biblia shishitsɔɔlɔi pii ejie wiemɔ nɛɛ kɛje amɛ-Bibliai amli ejaakɛ ebɛ Greek Biblia wolokpo ni etsɛ fe fɛɛ lɛ mli. Shi ekã shi faŋŋ akɛ mɛi ni kwɛ Biblia lɛ nɔ ni amɛŋmala eko amɛshwie shi lɛ ji mɛi ni kɛwo mli.