Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Mɛni Baawo Mi Hewalɛ Ni Magbɔle Mikpɔiaŋ?

Mɛni Baawo Mi Hewalɛ Ni Magbɔle Mikpɔiaŋ?

 Mɛni hewɔ esa akɛ magbɔle mikpɔiaŋ?

Yɛ maji komɛi anɔ lɛ, oblahii kɛ oblayei kɛ be fioo pɛ feɔ nibii ni baahã amɛgbɔle amɛkpɔiaŋ, ni no hewɔ lɛ, hela fɔɔ amɛ mɔmɔ. No hewɔ lɛ, nilee yɛ mli akɛ Biblia lɛ wie akɛ “kpɔiaŋgbɔlemɔ he yɛ sɛɛnamɔ.” (1 Timoteo 4:8, shn.) Susumɔ yiŋtoi ni nyiɛ sɛɛ nɛɛ ahe okwɛ:

  • Kpɔiaŋgbɔlemɔ baanyɛ ahã omii ashɛ ohe. Kpɔiaŋgbɔlemɔ hãa nɔ ko ŋaa ewoɔ jwɛŋmɔ lɛ mli ni no hãa ohe jɔɔ bo ni omii shɛɔ ohe. Mɛi komɛi tsɛɔ kpɔiaŋgbɔlemɔ akɛ tsofa ni hãaa mɔ ahao.

    “Kɛ́ miyajo foi leebi lɛ, minyɛɔ mitsuɔ nii waa yɛ gbi lɛ mli ni mináa miishɛɛ hu. Foijee hãa mimii shɛɔ mihe waa.”​—Regina.

  • Kpɔiaŋgbɔlemɔ baanyɛ ahã oná gbɔmɔtsoŋ hewalɛ kpakpa. Kɛ́ ogbɔle okpɔiaŋ bɔ ni sa lɛ, obaaná hewalɛ kɛ hekɛnɔfɔɔ ni sa yɛ omli.

    “Eŋɔɔ minaa waa akɛ bianɛ lɛ minyɛɔ mifeɔ kpɔiaŋgbɔlemɔ ko ni atsɛɔ lɛ chin-up lɛ shii nyɔŋma, shi afi ni ho lɛ, minyɛɛɛ mafee shi kome po! Nɔ ni fe fɛɛ lɛ, eŋɔɔ minaa akɛ miikwɛ migbɔmɔtso lɛ jogbaŋŋ.”​—Olivia.

  • Kpɔiaŋgbɔlemɔ baanyɛ ahã owala sɛɛ atsɛ. Kpɔiaŋgbɔlemɔ baanyɛ ahã otsui kɛ ofãji atsu nii jogbaŋŋ. Ebaanyɛ ewa bo hu koni okaná tsui hela​—tsui hela gbeɔ hii kɛ yei fɛɛ.

    “Kɛ́ wɔto be ni wɔkɛgbɔleɔ wɔkpɔiaŋ daa lɛ, wɔ-Bɔlɔ lɛ naa akɛ wɔhiɛ sɔɔ gbɔmɔtso ni ehã wɔ lɛ.”​—Jessica.

Sane lɛ nɔŋŋ ji akɛ: Kpɔiaŋgbɔlemɔ baanyɛ aye abua wɔ waa wɔsɛɛ, ni bianɛ po ebaanyɛ ehã wɔmii ashɛ wɔhe. Oblayoo ko ni atsɛɔ lɛ Tonyako lɛ wie akɛ “Owieŋ akɛ, mishwa mihe waa akɛ miyakwɔ nakai gɔŋ lɛ loo miyajo foi. “Kɛ́ mikɛ nɔ ko ejieee minaa ni miyagbɔle mikpɔiaŋ lɛ mishwaaa mihe kɔkɔɔkɔ.”

Kɛ́ ashi lɔle ama shi ni adraiviii lɛ, be baashɛ ni ebaafite; nakai nɔŋŋ ebaanyɛ eba lɛ yɛ ogbɔmɔtso lɛ gbɛfaŋ kɛ́ ogbɔleee okpɔiaŋ

 Mɛni hãaa manyɛ magbɔle mikpɔiaŋ?

Nibii babaoo yɛ ni baanyɛ atsĩ mɔ naa:

  • Nɔ ko bɛ ni baawo bo hewalɛ. “Kɛ́ mɛi darako lɛ, amɛsusuɔ akɛ nɔ ko nyɛŋ afee amɛ. Ewa akɛ obaasusu akɛ hela baamɔ bo. Osusuɔ akɛ onukpai pɛ hela mɔɔ.”​—Sophia.

  • Obɛ dekã. “Akɛni mibɛ dekã hewɔ lɛ, mitoɔ be kɛhã niyenii kpakpa kɛ be ni mikɛbaawɔ, shi ewaa kɛhãa mi akɛ mato be ni mikɛbaagbɔle mikpɔiaŋ.”​—Clarissa.

  • Onyɛɛɛ oya hei ni agbɔleɔ kpɔiaŋ yɛ. “Kɛ́ ootao oná gbɔmɔtsoŋ hewalɛ lɛ, esa akɛ opee shika pii yɛ hei ni agbɔleɔ kpɔiaŋ yɛ!”​—Gina.

Kɛhã he susumɔ:

Mɛni ji nɔ titri ni hãaa onyɛ ogbɔle okpɔiaŋ? Ebaabi ni omia ohiɛ dani obaanyɛ oye nakai gbɛtsĩi nii lɛ nɔ, shi kɛ́ onyɛ oye nɔ lɛ, obaaná he sɛɛ babaoo.

 Te mafee tɛŋŋ magbɔle mikpɔiaŋ bɔ ni sa?

Naa nibii fioo komɛi ni baawa bo:

  • Eji bo diɛŋtsɛ osɔ̃ akɛ obaafee nibii ni baahã oná hewalɛ.​—Galatiabii 6:5.

  • Okɛ nibii akajie onaa. (Jajelɔ 11:4) Akɛ nɔkwɛmɔnɔ lɛ, ehe ehiaaa ni oya hei ni agbɔleɔ kpɔiaŋ yɛ dani obɔi okpɔiaŋ gbɔlemɔ. Taomɔ nɔ ko ni onyaa efeemɔ he ni okɛgbɔle okpɔiaŋ.

  • Bi ŋaawoo kɛjɛ mɛi krokomɛi adɛŋ koni ona nibii ni obaanyɛ ofee kɛgbɔle okpɔiaŋ.​—Abɛi 20:18.

  • Too gbɛjianɔ. Ŋmalamɔ he ni otee hiɛ yɛ ogbɛjianɔtoo lɛ mli kɛshɛ lɛ he saji oshwie shi koni no awo bo hewalɛ.​—Abɛi 21:5.

  • Okɛ mɔ ko afee ekome kɛgbɔle okpɔiaŋ. Enɛ baawo bo hewalɛ ni oye gbɛjianɔ ni oto kɛhã kpɔiaŋgbɔlemɔ lɛ nɔ.​—Jajelɔ 4:9, 10.

  • Hã ehi ojwɛŋmɔ mli akɛ nibii komɛi baawo onajiaŋ bei komɛi, shi kaahã onijiaŋ je wui.​—Abɛi 24:10.

 Ŋmɛɛ pɛpɛɛpɛ

Biblia lɛ kɛɔ hii kɛ yei fɛɛ ni ‘amɛŋmɛ pɛpɛɛpɛ yɛ amɛnifeemɔi amli.’ (1 Timoteo 3:2, 11) No hewɔ lɛ, ŋmɛɛ pɛpɛɛpɛ yɛ kpɔiaŋgbɔlemɔ he. Bei pii lɛ, kɛ́ mɛi gbɔle amɛkpɔiaŋ fe nine lɛ eyeɔ amɛ awui. Oblayoo ko ni atsɛɔ lɛ Julia lɛ wie akɛ: “Kɛ́ nuu ko kɛ ejwɛŋmɔ ma bɔ ni ebaasumɔ ni egbɔmɔtso afee lɛ nɔ, fe ejwɛŋmɔ nɔ lɛ, mináaa ehe miishɛɛ.”

Agbɛnɛ hu, kwɛmɔ jogbaŋŋ yɛ saji ni mɛi fɔɔ wiemɔ lɛ ahe, eko ji, “kɛ́ onu he akɛ onyɛɛɛ dɔŋŋ lɛ, miamɔ ohiɛ ni ofee babaoo kɛfata he.” Wiemɔ ni tamɔ nɛkɛ lɛ baanyɛ aye bo awui ni ebaahã ohiɛ aje “nibii ni he hiaa waa” yɛ shihilɛ mli lɛ nɔ.​—Filipibii 1:10.

Kɛfata he lɛ, wiemɔ tamɔ nɛkɛ ni akɛwoɔ mɔ hewalɛ koni egbɔle ekpɔiaŋ lɛ baanyɛ aje onijiaŋ wui moŋ. Oblayoo ko ni atsɛɔ lɛ Vera lɛ wie akɛ: “Oblayei babaoo kɛ mɛi ni amɛmiitao amɛtsɔmɔ tamɔ amɛ lɛ ahe mfonirii toɔ, ni amɛkwɛɔ kɛ́ amɛnijiaŋ je wui. Shi no moŋ hãa amɛkɛ amɛhe toɔ nɛkɛ mɛi nɛɛ ahe, ni amɛnijiaŋ jeɔ wui kwraa moŋ. Nilee yɛ mli akɛ obaabɔ mɔdɛŋ ni oná gbɔmɔtsoŋ hewalɛ kpakpa fe ni okɛ ojwɛŋmɔ baama bɔ ni obaasumɔ ni ana bo yɛ kponɔgbɛ lɛ nɔ.”