Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Mɛni Obaafee Kɛ́ Omiishɛɛ Tã Ni Ohe Fee Shoo?

Mɛni Obaafee Kɛ́ Omiishɛɛ Tã Ni Ohe Fee Shoo?

Mɛi komɛi kɛɛ nɔ ko ni gbaa amɛnaa waa ji, ni nugbɔ baatsĩ amɛnaa yɛ shĩa shwane ni amɛnyɛɛɛ amɛfee nɔ ko, ni amɛnyɛɛɛ amɛya he ko hu. Oblanyo ko ni atsɛɔ lɛ Robert lɛ wie akɛ: “Kɛ́ eba lɛ nakai lɛ, mitaa shi ni mileee nɔ ni mifeɔ mihe.”

Ani onu he nakai pɛŋ? Kɛ́ nakai lɛ, sane nɛɛ baanyɛ aye abua bo!

 Nɔ ni esa akɛ ole

  • Intanɛt lɛ nyɛŋ aye abua bo.

    Intanɛt lɛ nɔ ni obaaya lɛ nyɛŋ aye abua bo kɛtsu onaagba lɛ he nii, ehãŋ ofee nɔ ko ni baahã oná miishɛɛ, ebaahã shihilɛ aje otsine moŋ. Oblanyo ko ni atsɛɔ lɛ Jeremy ni eye afii 21 lɛ wie akɛ: “Obaana akɛ, ohiɛ ma skrin lɛ nɔ shi ojwɛŋmɔ yɛ he kroko kwraa.

    Oblayoo ko ni atsɛɔ lɛ Elena lɛ hu nu he nakai nɔŋŋ, ewie akɛ. “Onyɛŋ okɛ intanɛt lɛ afee nɔ fɛɛ nɔ ni otaoɔ ofee. Ehãa ojieɔ ojwɛŋmɔ kɛjeɔ nibii krokomɛi ni miiya nɔ yɛ shihilɛ mli lɛ anɔ, ni kɛ́ okɛ ofoŋ loo otablɛt lɛ fɔ shi lɛ, shihilɛ lɛ baaje ohiɛ kwraa fe tsutsu lɛ po!”

  • Bɔ ni ofeɔ onii ohãa lɛ baanyɛ aye abua.

    Ani nibii babaoo kɛkɛ ni obaafee lɛ baahã oná miishɛɛ? Bei pii lɛ, ebaadamɔ miishɛɛ ni oyɔɔ yɛ nibii ni ofeɔ lɛ amli lɛ nɔ. Akɛ nɔkwɛmɔnɔ lɛ, oblayoo ko ni atsɛɔ lɛ Karen lɛ wie akɛ: “Eyɛ mli akɛ kɛ́ mitee skul lɛ mifeɔ nibii babaoo moŋ, shi no mli lɛ mináaa miishɛɛ yɛ jɛmɛ. Ja okɛ ohe ewo nibii ni ofeɔ lɛ amli dani obaaná miishɛɛ.”

Ani ole? Kɛ́ “obɛ nɔ ko feemɔ lɛ,” no etsɔɔɔ akɛ onyɛŋ oná miishɛɛ, eji hegbɛ moŋ ni oná ni obaanyɛ okɛfee nɔ ko ni baahã oná miishɛɛ.

Be ni onáa lɛ bafeɔ hegbɛ ni oná ni obaanyɛ okɛfee nɔ ko ni baahã oná miishɛɛ

 Nɔ ni obaanyɛ ofee

Taomɔ nibii hei ni ofee. Okɛ mɛi hei abɔ naanyo. Taomɔ nɔ ko hee ni obaanyɛ ofee ni baahã oná miishɛɛ. Pɛimɔ saji hei amli. Mɛi ni nyaa nibii srɔtoi afeemɔ he lɛ, kɛ́ amɛ pɛ amɛyɛ he ko po lɛ ewa dani amɛhe feɔ shoo​—ni kɛ́ amɛyɛ mɛi ateŋ hu lɛ ewa akɛ amɛmiishɛɛ baatã!

Biblia mli shishitoo mla: “Nɔ fɛɛ nɔ ni onine baashɛ nɔ akɛ otsu lɛ, okɛ ohewalɛ fɛɛ atsu.”​—Jajelɔ 9:​10.

“Nyɛsɛɛ nɛɛ mibɔi Mandarin Chinese kasemɔ, ni bɔ ni mikaseɔ lɛ daa gbi lɛ hã minu he akɛ mile kulɛ mije shishi mra. Misumɔɔ ni daa gbi lɛ, nɔ ko kã mihiɛ ni esa akɛ matsu he nii. Eheɔ mijwɛŋmɔ fɛɛ ni eyeɔ ebuaa mi ni mikɛ mibe tsuɔ nii jogbaŋŋ.”​—Melinda.

Okɛ ojwɛŋmɔ ama yiŋtoo ni yɔɔ sɛɛ lɛ nɔ. Kɛ́ ona yiŋtoo hewɔ ni ofeɔ nɔ ko lɛ, obaanya efeemɔ he waa. Skul nifeemɔi po baanyɛ afee miishɛɛ kɛ́ ona yiŋtoo ni yɔɔ sɛɛ.

Biblia mli shishitoo mla: “Nɔ kpakpa ko bɛ kɛhã gbɔmɔ fe enɛ, akɛ . . . ená nii ni etsuɔ waa lɛ mli ŋɔɔmɔ.”​—Jajelɔ 2:​24.

“Be ni eshwɛ fioo ni magbe skul naa lɛ, daa gbi lɛ mikaseɔ nii ŋmɛlɛtswai kpaanyɔ, ejaakɛ no mli lɛ nibii pii yɛ ni mikaseko. Ani nikasemɔ je mihiɛ? Dabi, ejaakɛ no mli lɛ, mitswa mifai shi akɛ mashɛ oti ni mikɛma mihiɛ lɛ he. Mikɛ mijwɛŋmɔ ma nɔ ni maná yɛ mli lɛ nɔ, ni no wo mi hewalɛ ni mikpaaa nikasemɔ lɛ.”​—Hannah.

Kpɛlɛmɔ nɔ akɛ jeee nɔ fɛɛ nɔ obaanyɛ ofee. Kɛ́ onyaa nifeemɔ ko he jogbaŋŋ po lɛ, ekolɛ, jeee nibii ni yɔɔ he lɛ fɛɛ he onyaa. Bei komɛi lɛ, onanemɛi ni osumɔɔ waa lɛ po yeŋ amɛshiwoi anɔ, ni no baanyɛ ahã ofee shwɛm. Nɔ najiaŋ ni obaaŋmɛ gbɛ ni shihilɛi tamɔ nɛkɛ ahã omiishɛɛ atã lɛ, bɔɔ mɔdɛŋ ni oná jwɛŋmɔ ni ja be fɛɛ be.

Biblia mli shishitoo mla: “Mɔ ni yɔɔ miishɛɛ tsui lɛ, eyeɔ gbi jurɔ daa.”​—Abɛi 15:15.

“Minaanyo ko kɛɛ mi akɛ esa akɛ makase bɔ ni mafee maná miishɛɛ kɛ́ mɔ ko bɛ mimasɛi. Ewie akɛ, ehi waa akɛ obaakase bɔ ni ahiɔ mɛi ateŋ kɛ bɔ ni okome too hu obaanyɛ ohi shi, eji ŋaa loo hesaa ko ni esa akɛ mɔ fɛɛ mɔ akase.”​—Ivy.