Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Te Mafee Tɛŋŋ Maná Be Pii Kɛwɔ?

Te Mafee Tɛŋŋ Maná Be Pii Kɛwɔ?

Kɛ́ obɔɔɔ mɔdɛŋ yɛ maths loo akɔntaa mli lɛ, ekolɛ, obaasusu akɛ esa akɛ okase nii waa. Kɛ́ obɔɔɔ mɔdɛŋ yɛ kpɔiaŋgbɔlemɔ nifeemɔ ko mli lɛ, ekolɛ obaasusu akɛ esa akɛ ofee treeniŋ waa. Shi nɔ ni he hiaa bo yɛ shihilɛi enyɔ nɛɛ fɛɛ mli ji, ni obaaná be pii kɛwɔ. Naa nɔ hewɔ ni wɔkɛɔ nakai lɛ.

 Mɛni hewɔ esa akɛ owɔ jogbaŋŋ?

Mɛi komɛi ni le wɔɔ he sane lɛ kɛɛ esa akɛ oblahii kɛ oblayei awɔ ŋmɛlɛtswai kpaanyɔ kɛmiimɔ ŋmɛlɛtswai 10 daa gbɛkɛ. Mɛni hewɔ esa akɛ oná be ni fa kɛwɔ?

  • Kɛ́ owɔɔ jogbaŋŋ lɛ eyeɔ ebuaa bo ni onyɛɔ ojwɛŋɔ jogbaŋŋ. Mɛi komɛi kɛɔ akɛ wɔ ni awɔɔ lɛ, “etamɔ niyenii kɛhã jwɛŋmɔ lɛ.” Ebaanyɛ eye ebua bo ni obɔ mɔdɛŋ yɛ skul, kɛ kpɔiaŋgbɔlemɔ nifeemɔi amli, ni ebaawa bo koni ole bɔ ni atsuɔ naagbai ahe nii jogbaŋŋ hu.

  • Kɛ́ owɔɔ jogbaŋŋ lɛ, ebaanyɛ eye ebua bo ni okɛ mɛi aye jogbaŋŋ, ni oná miishɛɛ hu. Mɛi ni náaa bei pii kɛwɔ lɛ, etsɛɛɛ kɛkɛ lɛ amɛmli efu loo amɛhao, ni daa nɛɛ lɛ, bei yɛ amɛ kɛ mɛi ateŋ.

  • Kɛ́ oji draiva ni onáa be pii kɛwɔɔ lɛ, ebaawa akɛ obaaná oshãra. Niiamlitaomɔ ko ni afee yɛ United States lɛ hã ana akɛ draivafoi ni eye kɛjɛ afii 16 kɛmiimɔ afii 24 ni “wɔdɔiwɔɔ hãa amɛnáa oshãra lɛ fa kwraa fe” mɛi ni eye kɛjɛ afii 40 kɛmiimɔ afii 59 ni wɔdɔiwɔɔ hãa amɛnáa oshãra.

  • Kɛ́ oná be pii okɛwɔ lɛ, obaaná gbɔmɔtsoŋ hewalɛ kpakpa. Kɛ́ owɔɔ jogbaŋŋ lɛ, ehãa owala yibii lɛ, olá faji lɛ, kɛ ofãji krokomɛi lɛ tsuɔ nii jogbaŋŋ. Ebaaye ebua bo ni okashwi fe nine, okaná sikli hela loo diabetes, stroke hu.

Bɔ ni ja atsaaji foŋ dani ebaaya nɔ etsu nii lɛ, nakai nɔŋŋ ebaabi ni bo hu oná be pii kɛwɔ koni onyɛ otsu nii jogbaŋŋ

 Mɛni hãaa onyɛ oná be pii kɛwɔ lɛ?

Yɛ sɛɛnamɔi ni wɔtsĩ tã nɛɛ fɛɛ sɛɛ lɛ, oblahii kɛ oblayei babaoo náaa be pii kɛwɔ. Akɛ nɔkwɛmɔnɔ lɛ, oblayoo ko ni atsɛɔ lɛ Elaine ni eye afii 16 lɛ wie akɛ:

“Wɔtsɔɔlɔ lɛ bi klasbii lɛ fɛɛ ni amɛtsɔɔ be ni nyɛ lɛ amɛwɔ. Mɛi babaoo kɛɛ amɛwɔ aaafee maŋkɛ̃ 2:00. Mɛi krokomɛi hu kɛɛ amɛwɔ aaafee leebi 5:00. Mɔ kome pɛ kɛɛ akɛ ewɔ gbɛkɛ 9:30.”

Mɛɛ nibii komɛi hãaa oná be pii kɛwɔ?

Kpojee. “Efɔɔ kaa akɛ kɛ́ mije kpo gbɛkɛ lɛ, je naa mi tsɔ ni no fiteɔ mibe, ni ebaa lɛ nakai titri lɛ, kɛ́ mikɛ minanemɛi je kpo gbɛkɛ.”​—Pamela.

Nitsumɔi. “Misumɔɔ wɔɔ waa, shi akɛni nibii babaoo jwere minɔ ni matsu hewɔ lɛ, mináaa be pii kɛwɔ.”​—Ana.

Foŋ kɛ ehenɔi. “Mifoŋ lɛ ji minaagba wulu hewɔ ni mináaa be kɛwɔ lɛ. Kɛ́ miyakã shi ni mitaaa he lɛ, mihe ejɔɔɔ mi.”​—Anisa.

 Te ooofee tɛŋŋ oná be pii kɛwɔ?

  • Bi ohe akɛ, ‘Kɛ́ miná be pii kɛwɔ lɛ mɛɛ gbɛ nɔ maná he sɛɛ?’ Biblia lɛ kɛɔ akɛ: “Hejɔɔmɔ dɛ̃ kɔkɔ obɔ lɛ, ehi fe nii ni atsuɔ waa dɛ̃ kɔkɔi obɔbɔ enyɔ kɛ kɔɔyɔɔ sɛɛtiumɔ.” (Jajelɔ 4:6) Wɔ ni awɔɔ lɛ he miihia waa, ejeee hiɛtserɛjiemɔ nɔ ko. Kɛ́ owɔɔɔ jogbaŋŋ lɛ, onyɛŋ otsu onitsumɔ jogbaŋŋ ni kɛ́ oyajie ohiɛtserɛ hu omii shɛŋ ohe bɔ ni otaoɔ!

  • Yɔsemɔ nɔ titri ni hãaa oná be pii kɛwɔ lɛ. Akɛ nɔkwɛmɔnɔ lɛ, kɛ́ okɛ onanemɛi je kpo lɛ, ani nyɛtsɛɔ? Ani onuɔ he akɛ homwɛk kɛ shĩa nifeemɔi lɛ fa tsɔ kɛhã bo? Ani ofoŋ lɛ hãaa onyɛ owɔ mra, loo kɛ́ oyawɔ lɛ, etsɛ̃ɔ ohiɛ?

Kɛhã he susumɔ: Ebaabi ni omia ohiɛ koni onyɛ oye nɔ ni hãaa onyɛ oná be pii kɛwɔ lɛ nɔ, shi kɛ́ obɔ mɔdɛŋ otsu he nii lɛ, obaaná he sɛɛ babaoo. Abɛi 21:5 lɛ kɛɔ akɛ: “Mɔdɛŋbɔlɔ gbɛjianɔtoi baaye omanye kɛ̃.”

Eji anɔkwale akɛ, mɔ fɛɛ mɔ yɛ nɔ ni yeɔ ebuaa lɛ ni ewɔɔ jogbaŋŋ. Akɛ nɔkwɛmɔnɔ lɛ, mɛi komɛi kɛɔ akɛ kɛ́ amɛnyɛ amɛwɔ fioo yɛ gbi lɛ mli lɛ, kɛ́ je na lɛ amɛnyɛɔ amɛwɔɔ jogbaŋŋ. Mɛi komɛi hu kɛɛ kɛ́ amɛwɔ fioo yɛ gbi lɛ mli lɛ, kɛ́ je na lɛ, etɔɔ amɛ kɛwɔɔ. Kwɛmɔ emli nɔ ni baahi kɛhã bo. Ŋaawoi ni nyiɛ sɛɛ nɛɛ baanyɛ aye abua bo:

  • Jɔɔmɔ ohe. Kɛ́ ojɔɔ ohe fioo dani be ni obaayakã shi lɛ shɛ lɛ, etsɛŋ ni obaawɔ.

    “Ehi akɛ obaagbe nibii fɛɛ ni oyɔɔ tsumɔ lɛ naa mra bɔ ni afee ni kɛ́ oyakã shi lɛ, okajwɛŋ he.”​—Maria.

  • Feemɔ tsakemɔi. Nɔ najiaŋ ni obaaŋmɛ gbɛ ni shihilɛ ni oyɔɔ mli lɛ akudɔ bo lɛ, too onibii ahe gbɛjianɔ jogbaŋŋ bɔ ni afee ni oná be pii kɛwɔ.

    “Daa gbɛkɛ lɛ, esa akɛ kɛhooo kwraa lɛ, mawɔ ŋmɛlɛtswai kpaanyɔ. No hewɔ lɛ, kɛ́ mina akɛ esa akɛ mate shi mra lɛ, mibuɔ akɔntaa koni mana be ni esa akɛ mawɔ.”​—Vincent.

  • Too be ni okɛbaawɔ kɛ be ni okɛbaate shi ni oye nɔ. Kɛ́ otsɔse ohe yɛ be ni obaasumɔ ni okɛwɔ lɛ he lɛ, ogbɔmɔtso lɛ baale. Mɛi ni le wɔɔ he sane lɛ woɔ ŋaa akɛ esa akɛ be ni okɛwɔɔ kɛ be ni okɛteɔ shi lɛ afee nakai nɔŋŋ daa gbi. Kaa enɛ okwɛ nyɔɔŋ kome ni obaana bɔ ni ebaaye ebua bo.

    “Kɛ́ oyeɔ be ni oto ni okɛwɔɔ daa gbɛkɛ lɛ nɔ lɛ, kɛ́ je tsɛre lɛ, ojwɛŋmɔ baatsu nii jogbaŋŋ. Enɛ baaye abua bo ni onyɛ ofee nɔ fɛɛ nɔ ni obaafee lɛ jogbaŋŋ.”​—Jared.

  • Ŋmɛɛ pɛpɛɛpɛ yɛ bei abɔ ni okɛjeɔ kpo lɛ he. Biblia lɛ kɛɔ akɛ ‘aŋmɛ pɛpɛɛpɛ yɛ nifeemɔi amli,’ ni nibii ni wɔkɛjieɔ wɔhiɛtserɛ lɛ hu fata he.​—1 Timoteo 3:2, 11.

    “Ehe bahia ni matse be ni mikɛjeɔ kpo gbɛkɛgbɛkɛ lɛ nɔ. Kɛ́ mitseee be ni mikɛjieɔ mihiɛtserɛ lɛ nɔ lɛ, nɔ ko eyaŋ lɛ jogbaŋŋ, ni no ji, mináŋ be pii kɛwɔ!”​—Rebecca.

  • Hã ofoŋ lɛ hu “awɔ”! Kɛ́ eshwɛ aaafee ŋmɛlɛtswaa kome dani be ni okɛbaawɔ lɛ baashɛ lɛ, bɔɔ mɔdɛŋ akɛ oyaŋ intanɛt lɛ nɔ, ni osɛndiŋ onanemɛi tɛs mɛseji hu. Anɔkwa, mɛi ni le wɔɔ he sane lɛ bɔɔ kɔkɔ akɛ, kane ni jɛɔ foŋ, TV, loo tablɛt mli lɛ baanyɛ ahã owɔ ajara.

    “Mɛi komɛi sumɔɔɔ ni owɔɔ kwraa. Shi dani obaanyɛ ojɔɔ ohe jogbaŋŋ lɛ, esa akɛ oŋmɛɛ ofoŋ lɛ he ofɔ̃ shi.”​—Julissa.