Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Kɛ́ Mɔ Ni Mikɛnyiɛ Kɛhã Gbalashihilɛ Lɛ Kɛ Mi Kpa Lɛ, Te Mafee Tɛŋŋ Makpee Dɔlɛ Lɛ Naa?

Kɛ́ Mɔ Ni Mikɛnyiɛ Kɛhã Gbalashihilɛ Lɛ Kɛ Mi Kpa Lɛ, Te Mafee Tɛŋŋ Makpee Dɔlɛ Lɛ Naa?

Oblanyo ko ni atsɛɔ lɛ Steven lɛ wie akɛ: “Be ni oblayoo ni kulɛ mikɛ lɛ baabote gbalashihilɛ mli lɛ kɛ mi kpa lɛ, mitsui kumɔ. Nɔ ko edɔko mi nakai pɛŋ yɛ mishihilɛ mli.”

Ani okɛ shihilɛ ni tamɔ nakai ekpe pɛŋ? Kɛ́ nakai lɛ, sane nɛɛ baanyɛ aye abua bo.

 Bɔ ni ehãa mɔ nuɔ he ehãa

Kɛ́ sane ni tamɔ nɛkɛ ba lɛ, edɔɔ mɛi enyɔ lɛ fɛɛ.

  • Kɛ́ bo ji mɔ ni okɛ mɔ lɛ kpa po lɛ, obaanu he tamɔ bɔ ni Jasmine nu he lɛ, ewie akɛ, “Le ni mile akɛ miye mɔ ko ni misusuɔ ehe lɛ awui lɛ batsɔ nɔ ko ni miigba mihenilee naa waa, ni eji nɔ ko ni misumɔŋ ni eba lɛ nakai dɔŋŋ.”

  • Kɛ́ jeee bo ji mɔ ni okɛ mɔ lɛ kpa lɛ, ekolɛ, obaanu he tamɔ nɔ ni agbo yɛ onɔ. Oblayoo ko ni atsɛɔ lɛ Janet lɛ wie akɛ, “Miye ŋkɔmɔ aaafee afi sɔŋŋ, miyeee nii, mimli fuɔ, mikɛ mɛi taa sane naa, ni mifee basaa be kɛ beiaŋ.”

Sane lɛ nɔŋŋ ji akɛ: Kɛ́ mɔ ko ni okɛbaabote gbalashihilɛ mli kɛ bo kpa lɛ, otsui kumɔɔ ni onyɛɛɛ nɔ ko ofee. Biblia ŋmalɔ ko kɛɛ akɛ: “Tsui ni ekumɔ lɛ, egbɔjɔɔ mɔ.”​—Abɛi 17:22.

 Nɔ ni obaanyɛ ofee

  • Okɛ mɔ ko ni eda yɛ mumɔŋ ni oyɛ hekɛnɔfɔɔ yɛ emli agba sane. Biblia lɛ kɛɔ akɛ: “Naanyo kpakpa sumɔɔ mɔ yɛ bei fɛɛ mli, ni ebatsɔɔ nyɛmi yɛ haomɔ beiaŋ.” (Abɛi 17:17) Kɛ́ ojɛ otsuiŋ ogba omami loo opapa loo onaanyo ko ni eda yɛ mumɔŋ lɛ bɔ ni onuɔ he ohãa lɛ, ebaaye ebua bo ni oná jwɛŋmɔ ni ja yɛ oshihilɛ lɛ he.

    “Miye nyɔji abɔ ni mibɛŋkɛɛɛ mɛi, ni mikɛ mɔ ko hu egbaaa minaagbai lɛ ahe sane. Shi minanemɛi lɛ baanyɛ aye abua mi ni dɔlɛ lɛ sɛɛ afo. Be ni mikɛ amɛ gba he sane lɛ, mihejɔ mi fioo.”​—Janet.

  • Kasemɔ nii kɛjɛ nɔ ni eba lɛ mli. Biblia abɛ kroko kɛɔ akɛ: “Taomɔ hiɛshikamɔ, taomɔ niiashishinumɔ.” (Abɛi 4:5) Kɛ́ wɔkɛ shihilɛi ni dɔɔ mɔ kpe lɛ, ehãa wɔnaa bɔ ni wɔji diɛŋtsɛ kɛ bɔ ni esa akɛ wɔkpee shihilɛi ni jeɔ mɔ nijiaŋ wui naa wɔhã.

    “Be ni wɔkpa lɛ, minaanyo ko bi mi akɛ, ‘Mɛni okase yɛ nyɛnyiɛmɔ lɛ mli, ni mɛɛ gbɛ nɔ obaanyɛ okɛ nɔ ni okase yɛ mli lɛ atsu nii kɛ́ okɛ mɔ kroko bɔi nyiɛmɔ wɔsɛɛ?’”​—Steven.

  • Sɔlemɔ. Biblia lɛ kɛɔ akɛ: “Shɛ ojatsu lɛ ofɔ̃ Yehowa nɔ, ni ebaaye ebua bo.” (Lala 55:22) Sɔlemɔ baanyɛ awa bo koni onyɛ oye awerɛhoyeli lɛ nɔ, ni ebaanyɛ eye ebua bo hu ni oná jwɛŋmɔ ni ja yɛ mligbalamɔ lɛ he.

    “Sɔlemɔ daa. Yehowa le opiŋmɔ lɛ, ni ele shihilɛ mli ni otsɔɔ lɛ fe bo.”​—Marcia.

  • Ye obua mɛi krokomɛi. Biblia lɛ kɛɔ akɛ: “Nyɛtaoɔ nibii ni hi hã mɛi krokomɛi, shi jeee nibii ni hi hã nyɛ pɛ.” (Filipibii 2:4) Kɛ́ otee nɔ oye obua mɛi lɛ, etsɛŋ ni obaaná jwɛŋmɔ ni ja yɛ mligbalamɔ lɛ he.

    “Kɛ́ okɛ mɔ ko miinyiɛ kɛhã gbalashihilɛ ni ekɛ bo kpa lɛ, onuɔ he tamɔ nɔ ni oje lɛ eba naagbee, ni eshãa bo fe nɔ ni mɔ ko kɛ nɔ ko epila bo. Shi minu he akɛ eehi fiofio. Esa akɛ mahã be ashwie mli ejaakɛ tsɛlɛ gbeɔ dɔlɛ.”​—Evelyn.