Nɔ ni esa akɛ ole yɛ bulɛ kpo ni ajieɔ lɛ he

 Bulɛ ni obaajie lɛ kpo lɛ baanyɛ awa bo yɛ nibii etɛ komɛi amli yɛ oshihilɛ mli:

1.   Ojeŋba. Bɔ ni okɛ mɛi yeɔ ohãa lɛ baanyɛ aná amɛnɔ hewalɛ kpakpa aloo hewalɛ gbonyo. Kɛ́ ojieɔ bulɛ kpo otsɔɔ mɛi lɛ, amɛbaana bo akɛ ohiɛ kã shi ni abaanyɛ akɛ hiɛ afɔ̃ onɔ​—ni amɛkɛ bo baaye yɛ nakai gbɛ nɔŋŋ nɔ! Shi kɛ́ ojieee bulɛ kpo otsɔɔɔ mɛi lɛ, amɛbaamu sane naa akɛ bo pɛ ohe osusuɔ, ebaawa akɛ obaaná nitsumɔ, ni hegbɛi komɛi hu baaŋmɛɛ bo. Tamɔ Biblia lɛ kɛɛ lɛ, “mɔ ni yitsoŋ wa lɛ, ekɛ haomɔ baa lɛ diɛŋtsɛ enɔ.”​—Abɛi 11:17; shishigbɛ niŋmaa.

2.   Naanyobɔɔ. Biblia lɛ kɛɔ akɛ: “Nyɛwoa suɔmɔ tamɔ atade, ejaakɛ eji kpãa ni feɔ mɛi ekome yɛ gbɛ ni eye emuu nɔ.” (Kolosebii 3:14) Enɛ ji anɔkwale kɛ́ eba lɛ naanyobɔɔ gbɛfaŋ. Mɛi ni buɔ mɔ ni amɛkɛ mɛi yeɔ jogbaŋŋ lɛ, anyɛɔ abɛŋkɛɔ amɛ. Ejaakɛ, namɔ baasumɔ ni ekɛ mɔ ko ni ebuuu mɔ ni ekɛ mɔ wieɔ bɔ ni esaaa abɔ?

3.   Bɔ ni mɛi kɛ bo yeɔ amɛhãa. Oblayoo ko ni atsɛɔ lɛ Jennifer lɛ wie akɛ, “Kɛ́ okɛ mɛi yeɔ yɛ bulɛ mli be fɛɛ be lɛ, be ni be baashwie mli lɛ, obaana akɛ mɛi ni ale amɛ akɛ amɛkɛ mɛi wieɔ bɔ ni esaaa lɛ po baaná bulɛ amɛhã bo.” Anɔkwa sane ji, kɛ́ okɛ mɛi wieɔ bɔ ni esaaa lɛ, amɛkɛ bo baawie bɔ ni esaaa. Biblia lɛ kɛɛ: “Susumɔnɔ ni nyɛkɛsusuɔ nyɛhãa mɛi lɛ, amɛkɛbaasusu amɛhã nyɛ.”​—Mateo 7:2.

 Sane lɛ nɔŋŋ ji akɛ: Gbi fɛɛ gbi ni atsɛɔ lɛ ŋmɛnɛ lɛ, wɔkɛ mɛi krokomɛi baashãra kɛ̃. Bɔ ni okɛ mɛi baashãra ohã lɛ baahã amɛna nɔ gbɔmɔ ni oji kɛ bɔ ni amɛkɛ bo baaye ahã. Oti lɛ ji akɛ, esa akɛ ojie bulɛ kpo otsɔɔ mɛi!

 Bɔ ni obaafee oya ohiɛ

1.   Pɛimɔ omli okwɛ akɛ okɛ mɛi yeɔ yɛ bulɛ mli lo. Bi ohe saji nɛɛ: ‘Ani mikɛ mɛi ni ye mi onukpa wieɔ kɛ bulɛ? Shii enyiɛ mikɛ wiemɔi tamɔ “ofainɛ,” “oyiwaladɔŋŋ,” loo “mijeee gbɛ” tsuɔ nii? Ani kɛ́ mikɛ mɛi miigba sane lɛ, mihãa nibii krokomɛi tamɔ nikanemɔ, tɛs mɛseji kɛ amɛhenɔi lɛ gbalaa mijwɛŋmɔ? Ani mijieɔ bulɛ kpo mitsɔɔ mifɔlɔi kɛ minyɛmimɛi lɛ, loo mikɛ amɛ yeɔ bɔ ni misumɔɔ akɛni “miwekumɛi ji amɛ lɛ hewɔ”?’

    Biblia lɛ kɛɔ akɛ: “Mɔ fɛɛ mɔ kɛ woo ahã enaanyo klɛŋklɛŋ.”​—Romabii 12:10.

2.   Okɛ otii amamɔ ohiɛ. Ŋmalamɔ nibii etɛ komɛi yɛ oshihilɛ mli ni obaasumɔ ni oya ohiɛ yɛ mli. Akɛ nɔkwɛmɔnɔ lɛ, gbekɛ yoo ko ni atsɛɔ lɛ Allison ni eye afii 15 lɛ wie akɛ, esa akɛ “mafee mihe mɔ ni boɔ sane toi jogbaŋŋ moŋ fe mɔ ni wieɔ pii.” David, ni eye afii 19 lɛ wie akɛ, esa akɛ ebɔ mɔdɛŋ ni ekpa mɛi tɛsimɔ be ni ekɛ ewekumɛi loo enanemɛi miigba sane. Ewie akɛ, “Enɛ etsɔɔɔ bulɛ. Kɛ́ mifee nakai lɛ, etamɔ nɔ ni miikɛɛ amɛ akɛ, nɔ najiaŋ ni mikɛ amɛ baawie lɛ, mikɛ mɛi krokomɛi moŋ baawie.” Edward, ni eye afii 17 lɛ hu yɔse akɛ kɛ́ mɛi miiwie lɛ, esa akɛ eŋmɛ amɛ gbɛ ni amɛwie, esaaa akɛ efolɔɔ mli. Ni Jennifer ni wɔtsĩ etã kɛtsɔ hiɛ lɛ etswa efai shi akɛ, ebaajie bulɛ kpo etsɔɔ mɛi ni edara yɛ afii amli. Ewie akɛ: “Nɔ ni mifɔɔ amɛ kɛɛmɔ kɛkɛ ji ‘hɛloo!’ Kɛkɛ lɛ miwie nɔ ko ni baahã mashi amɛ ni mikɛ mitipɛŋfoi lɛ ayagba sane. Shi bianɛ lɛ miifee nɔ fɛɛ nɔ ni manyɛ koni male amɛ jogbaŋŋ. Enɛ ewa mi koni maya nɔ majie bulɛ kpo matsɔɔ amɛ!”

    Biblia lɛ kɛɔ akɛ: “Nyɛtaoɔ nibii ni hi hã mɛi krokomɛi, shi jeee nibii ni hi hã nyɛ pɛ.”​—Filipibii 2:4.

3.   Kwɛmɔ akɛ ooya ohiɛ lo. Hã ohe nyɔɔŋ kome kɛkwɛ bɔ ni owiemɔ loo onifeemɔ etee hiɛ ehã yɛ hei ni no mli lɛ obɔɔɔ mɔdɛŋ lɛ. Yɛ nakai nyɔɔŋ lɛ naagbee lɛ, bi ohe akɛ: ‘Mɛɛ gbɛ nɔ bulɛ kpo ni mijieɔ mitsɔɔ mɛi lɛ ehã mitsɔ mɔ ko ni asumɔɔ esane? Mɛɛ hei komɛi yɔɔ lolo ni esa akɛ maya mihiɛ yɛ?’ Kɛ́ ona lɛ, bɔɔ mɔdɛŋ ni okɛ otii komɛi amamɔ ohiɛ kɛtsu he nii.

    Biblia lɛ kɛɛ: “Agbɛnɛ hu, bɔ pɛ ni nyɛtaoɔ akɛ mɛi afee ahã nyɛ lɛ, nyɛfea nakai nɔŋŋ nyɛhãa amɛ.”​—Luka 6:31.