Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Mɛni Hewɔ Esa Akɛ Masɔle?

Mɛni Hewɔ Esa Akɛ Masɔle?

Afee niiamlitaomɔ ko yɛ Amerika ni ana akɛ oblahii kɛ oblayei 100 mlijaa 80 sɔleɔ, shi ayɔse hu akɛ mɛi nɛɛ ateŋ mɛi fã pɛ sɔleɔ daa gbi. Ebɛ naakpɛɛ mɔ akɛ amɛteŋ mɛi komɛi biɔ akɛ: ‘Ani sɔlemɔ ji nɔ ko ni hãa mɔ he jɔɔ lɛ kɛkɛ loo efeɔ nɔ kroko hu ehãa mɔ?’

 Mɛni ji sɔlemɔ?

Sɔlemɔ ji sanegbaa diɛŋtsɛ ni yaa nɔ yɛ mɔ ko kɛ nibii fɛɛ a-Bɔlɔ lɛ teŋ. Susumɔ nɔ ni enɛ tsɔɔ lɛ he okwɛ! Yehowa nɔ kwɔ kwraa fe adesai yɛ gbɛ fɛɛ gbɛ nɔ, kɛ̃lɛ, “ekɛ wɔteŋ mɔ fɛɛ mɔ teŋ jekɛɛɛ.” (Bɔfoi 17:27) Anɔkwa, Biblia lɛ kɛ ninefɔ̃ɔ ni nɔ bɛ ehã akɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.”​—Yakobo 4:8.

Te obaafee tɛŋŋ otsi obɛŋkɛ Nyɔŋmɔ?

  • Gbɛ kome ji kɛtsɔ sɔlemɔ nɔ​—no ji gbɛ ni obaanyɛ otsɔ nɔ okɛ Nyɔŋmɔ awie.

  • Gbɛ kroko ji kɛtsɔ Biblia lɛ kasemɔ nɔ​—no ji gbɛ ni Nyɔŋmɔ tsɔɔ nɔ ekɛ bo “wieɔ.”

Sanegbaa ni tamɔ nɛkɛ ni yaa nɔ yɛ okɛ Nyɔŋmɔ teŋ, ni ji sɔlemɔ kɛ Biblia lɛ kasemɔ lɛ, baanyɛ aye abua bo ni wekukpaa ni kã okɛ Nyɔŋmɔ teŋ lɛ mli awa.

“Sane ni wɔkɛ Yehowa, Mɔ Ni Nɔ Kwɔ Fe Fɛɛ lɛ gbaa lɛ ji hegbɛ kpele ni adesai yɔɔ.”​—Jeremy.

“Kɛ́ mikɛɛ Yehowa bɔ ni minuɔ he mihãa diɛŋtsɛ lɛ, minuɔ he akɛ mibɛŋkɛ lɛ kpaakpa.”​—Miranda.

 Ani Nyɔŋmɔ boɔ sɔlemɔi atoi?

Kɛ́ oheɔ Nyɔŋmɔ nɔ oyeɔ po ni osɔleɔ ohãa lɛ po lɛ, ekolɛ, ebaawa kɛhã bo akɛ obaahe oye akɛ eboɔ sɔlemɔi atoi lɛɛlɛŋ. Kɛ̃lɛ, Biblia lɛ tsɛɔ Yehowa akɛ “sɔlemɔ Toibolɔ.” (Lala 65:2) Ekɛɔ hu akɛ ‘wɔshɛrɛ nibii ni hãa wɔyeɔ wɔtsui lɛ fɛɛ wɔshwie enɔ.’ Mɛni hewɔ? ‘Ejaakɛ ejwɛŋɔ wɔhe.’​1 Petro 5:7.

Kɛhã he susumɔ: Ani oheɔ be okɛ onanemɛi ni bɛŋkɛ bo kpaakpa lɛ gbaa sane be fɛɛ be? Obaanyɛ okɛ Nyɔŋmɔ hu agba sane be fɛɛ be. Sɔlemɔ ohã lɛ be fɛɛ be ni okɛ egbɛ́i ni ji Yehowa lɛ atsu nii. (Lala 86:​5-7; 88:9) Anɔkwa, Biblia lɛ kɛɔ wɔ ni ‘wɔsɔle daa ni wɔkakpa.’​—1 Tesalonikabii 5:​17.

“Sɔlemɔ ji sanegbaa ni yaa nɔ yɛ mi kɛ miŋwɛi Tsɛ lɛ teŋ, eji be ni minaa hegbɛ mifɔseɔ mitsui mli fɛɛ mishwieɔ ehiɛ.”​—Moises.

“Mikɛ Yehowa gbaa nibii ni yɔɔ mitsui mli tɔ̃ɔ lɛ he sane tamɔ bɔ ni mikɛ mimami loo minaanyo ko ni bɛŋkɛ mi kpaakpa gbaa sane lɛ.”​—Karen.

 Mɛni he manyɛ masɔle yɛ?

Biblia lɛ kɛɔ akɛ: “Yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ni akɛ hiɛdɔɔ kpaa, kɛ shidaa nɔ nyɛhãa Nyɔŋmɔ alea nyɛnibimɔi lɛ.”​—Filipibii 4:6.

Ani enɛ tsɔɔ akɛ obaanyɛ osɔle yɛ onaagbai lɛ ahe? Hɛɛ! Anɔkwa, Biblia lɛ kɛɔ akɛ: “Shɛ ojatsu lɛ ofɔ̃ Yehowa nɔ, ni ebaaye ebua bo.”​—Lala 55:22.

Kɛ́ oosɔle lɛ jeee onaagbai lɛ pɛ ahe obaanyɛ owie, obaanyɛ owie nibii krokomɛi hu ahe. Oblayoo ko ni atsɛɔ lɛ Chantelle lɛ wie akɛ: “Kɛ́ nibii ni he hiaa mi lɛ pɛ mibiɔ Yehowa lɛ, belɛ mijeee naanyo kpakpa. Minuɔ he akɛ kɛ́ miisɔle lɛ, esa akɛ mada Nyɔŋmɔ shi klɛŋklɛŋ ni matsĩ nibii ni esa akɛ mada lɛ shi yɛ he lɛ atã.”

Kɛhã he susumɔ: Mɛɛ nibii obaanyɛ oda Yehowa shi yɛ he? Ani obaanyɛ osusu nibii etɛ komɛi ni obaanyɛ oda Yehowa shi yɛ he ŋmɛnɛ?

“Nibii bibii tamɔ fɔfɔi fɛfɛo ko ni wɔna lɛ po baanyɛ atsirɛ wɔ ni wɔsɔle kɛda Yehowa shi.”​—Anita.

“Jwɛŋmɔ adebɔɔ nɔ ko ni oná he miishɛɛ loo Biblia mli sane ko ni eta otsuiŋ waa lɛ he, koni oda Yehowa shi yɛ he.”​—Brian.