Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Mɛni Hewɔ Esa Akɛ Oya Kpeei Ni Afeɔ Yɛ Maŋtsɛyeli Asa Lɛ Nɔ Lɛ?

Mɛni Hewɔ Esa Akɛ Oya Kpeei Ni Afeɔ Yɛ Maŋtsɛyeli Asa Lɛ Nɔ Lɛ?

Daa otsi lɛ, Yehowa Odasefoi feɔ kpeei shii enyɔ yɛ amɛjamɔhei ni atsɛɔ lɛ Maŋtsɛyeli Asai anɔ lɛ mli. Mɛni yaa nɔ yɛ jɛmɛ, ni kɛ́ otee jɛmɛ lɛ, mɛɛ gbɛ nɔ obaaná he sɛɛ?

 Mɛni yaa nɔ yɛ Maŋtsɛyeli Asa lɛ nɔ?

Maŋtsɛyeli Asa lɛ nɔ ji he titri ni akaseɔ bɔ ni abaafee akɛ saji ni yɔɔ Biblia lɛ mli lɛ atsu nii yɛ. Kpeei ni afeɔ yɛ jɛmɛ lɛ baanyɛ aye abua bo koni:

  • okase anɔkwale ni kɔɔ Nyɔŋmɔ he.

  • onu nibii ni yaa nɔ yɛ wɔbei nɛɛ amli lɛ ashishi.

  • otsɔ gbɔmɔ kpakpa.

  •  oná nanemɛi kpakpai.

Ani ole? Atsɛɔ he ni Yehowa Odasefoi feɔ amɛkpeei yɛ lɛ akɛ Maŋtsɛyeli Asa, ejaakɛ Nyɔŋmɔ Maŋtsɛyeli lɛ ji nɔ titri ni asusuɔ he yɛ jɛmɛ.​—Mateo 6:​9, 10; 24:14; Luka 4:​43.

 Mɛni hewɔ esa akɛ oya kpeei yɛ jɛmɛ?

Nibii ni akaseɔ yɛ jɛmɛ lɛ baawa bo. Biblia mli shishitoo mlai ni asusuɔ he yɛ Yehowa Odasefoi akpeei lɛ ashishi lɛ baaye abua bo ni oná “hiɛshikamɔ.” (Abɛi 4:5) Enɛ tsɔɔ akɛ, Biblia lɛ baanyɛ aye abua bo ni okpɛ yiŋ kpakpai yɛ oshihilɛ mli. Ebaanyɛ eye ebua bo hu koni oná hetoo ohã shihilɛ mli sanebimɔi ni he hiaa waa lɛ, ekomɛi ji:

Wiemɔi ni ahãa yɛ kpeei ni wɔfeɔ yɛ otsi naagbee lɛ ashishi lɛ saneyitsei lɛ ekomɛi nyiɛ sɛɛ nɛɛ:

  • Mɛni Hewɔ Esa Akɛ Ohã Biblia Lɛ Atsɔɔ Bo Gbɛ?

  • Nɛgbɛ Abaanyɛ Aná Yelikɛbuamɔ Kɛjɛ Yɛ Haomɔ Beiaŋ?

  • Nɔ Ni Nyɔŋmɔ Maŋtsɛyeli Lɛ Tsuɔ Ehãa Wɔ Ŋmɛnɛ.

“Mɔ ko ni mikɛyɔɔ klas ba wɔkpeei lɛ eko. Eta wɔweku lɛ masɛi, ni ekwɛ wɔwoji lɛ amli. Sɛɛ mli lɛ, ekɛɛ mi akɛ, be ni abibiɔ saji ni toibolɔi lɛ hãa hetoo lɛ, emii shɛ hetoi ni mɛi lɛ hã lɛ he waa. Ewie kɛfata he hu akɛ, he ni eyaa sɔɔmɔ yɛ lɛ, amɛbɛ woji babaoo ni akɛkaseɔ nii tamɔ bɔ ni wɔyɔɔ lɛ.”​—Brenda.

Ani ole? Aheee shika dani aya Maŋtsɛyeli Asa lɛ nɔ, ni aheee kɔlɛshiŋ hu.

Mɛi ni okɛbaabɔ yɛ jɛmɛ lɛ baawo bo hewalɛ. Biblia lɛ kɛɔ akɛ yiŋtoo kome hewɔ ni esa akɛ Kristofoi akpe kutuu lɛ ji koni amɛteŋ “mɔ fɛɛ mɔ awo enyɛmi hewalɛ.” (Hebribii 10:24, 25) Kɛ́ okɛ mɛi ni susuɔ Nyɔŋmɔ kɛ mɛi krokomɛi ahe fe amɛ diɛŋtsɛ amɛhe lɛ bɔ lɛ otsui nyɔɔ omli waa yɛ jeŋ ni mɔ fɛɛ mɔ foɔ lɛ pɛ enɔ mli nɛɛ mli.

“Miskul nifeemɔi hãa etɔɔ mi ni mimiishɛɛ tãa, shi mɛi ni yɔɔ Maŋtsɛyeli Asa lɛ nɔ lɛ hãa mináa miishɛɛ be fɛɛ be. Kɛ́ akpa kpee ni minyiɛ gbɛ kɛmiiya shĩa lɛ, mináa miishɛɛ ni mifeɔ klalo kɛhã gbi kroko mli nitsumɔ.”​—Elisa.

Ani ole? Ayɛ Yehowa Odasefoi asafoi ni fa fe 120,000 yɛ jeŋ fɛɛ ni feɔ kpeei yɛ hei ni fa fe 60,000. Akɛni mɛi ni baa kpeei lɛ miiya nɔ amɛmiifa be fɛɛ be hewɔ lɛ, daa afi lɛ, ehe bahiaa ni amamɔ Maŋtsɛyeli Asai aaafee 1,500. *

^ kk. 27 Kɛ́ ootao ona hei ni afeɔ wɔsafoŋ kpeei lɛ eko yɛ lɛ, yaa wɛbsait nɛɛ nɔ fã ni ji “Asafoŋ Kpeei Srɔtoi Ni Yehowa Odasefoi Feɔ” lɛ koni okliki “Taomɔ He Ko Ni Bɛŋkɛ Bo.”