Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Mɛni Mafee Koni Ekatɔ Mi Bliboo?

Ani oji mɔ ko ni baanyɛ ayaje shihilɛ nɛɛ mli? Kɛ́ nakai lɛ, sane nɛɛ baanyɛ aye abua bo!

 Nɔ hewɔ ni ebaa lɛ nakai

  • Nitsumɔi babaoo ni atsuɔ. Oblayoo ko ni atsɛɔ lɛ Julie lɛ wie akɛ: “Yɛ wɔshihilɛ mli fɛɛ lɛ, awoɔ wɔ hewalɛ ni wɔbɔ mɔdɛŋ wɔtsu babaoo, wɔbɔ mɔdɛŋ wɔya wɔhiɛ, wɔkɛ otii wuji amamɔ wɔhiɛ, ni wɔye omanye pii. Ebɛ mlɛo kwraa akɛ abaadamɔ nɔnyɛi nɛɛ anaa gbi fɛɛ gbi!”

  • Ilɛtrɔniki tsɔji. Amrɔ nɛɛ smartphone, tablɛts, kɛ amɛhenɔi lɛ ahewɔ lɛ, wɔnyɛɔ wɔkɛ mɛi sharaa gbi muu lɛ fɛɛ​—anɔkwa, enɛ baanyɛ afee naagba ehã wɔ, ni kɛ wɔkwɛɛɛ ni ahi lɛ, ebaatɔ wɔ bliboo.

  • Kɛ́ anáaa be saŋŋ kɛwɔ. Oblayoo ko ni atsɛɔ lɛ Miranda lɛ wie akɛ: “Skul, nitsumɔ, kɛ hiɛtserɛjiemɔ hewɔ lɛ, oblahii kɛ oblayei babaoo teɔ shi mra, shi amɛwɔɔɔ mra.” Kɛ́ shihilɛ nɛɛ fɔ kaa lɛ, etɔɔ amɛ bliboo ni ehiii hãaa amɛ kwraa.

 Nɔ hewɔ ni ehe hiaa

Biblia lɛ jieɔ yi akɛ atsu nii. (Abɛi 6:6-8; Romabii 12:11) Shi ejieee yi akɛ wɔtsu nii gbee mi magbe bo koni esa wɔshihilɛ mli nibii ni he hiaa waa tamɔ wɔhewalɛnamɔ he.

“Gbi ko ni mitsu nii gbi muu fɛɛ ni je miihe ana lɛ, mihɛle shi ni miyɔse akɛ miyeko nii gbi muu lɛ fɛɛ, akɛni miloo nitsumɔ babaoo mishwie minɔ miitsu lɛ hewɔ. Mibayɔse akɛ, kɛ́ mikpɛlɛ nitsumɔ lɛ eko fɛɛ eko nɔ lɛ, be ni yi aawula shi lɛ, ebaasa migbɔmɔtsoŋ hewalɛnamɔ kɛ mimumɔŋ shidaamɔ he.”​—Ashley.

Yiŋtoo kpakpa ko hewɔ ni Biblia lɛ wie akɛ: “Gbee ni hiɛ kã lɛ, ehi fe jata ni egbo” lɛ. (Jajelɔ 9:4) Kɛ́ ootsu nii gbee mi magbe bo lɛ, ekolɛ obaanu he tamɔ ohe wa ookɛɛ jata. Shi kɛ́ ebɔi bo tɔɔ bliboo lɛ, ebaaye ogbɔmɔtsoŋ hewalɛnamɔ awui.

 Nɔ ni obaanyɛ ofee

  • Le he ni onyɛmɔ yawaa. Biblia lɛ kɛɔ akɛ: “Mɔ ni yeee etsuinaa sane [loo ebaa ehe shi] lɛ, ehiɛ kã shi.” (Abɛi 11:2) Mɔ ni baa ehe shi lɛ le he ni enyɛmɔ yawaa, ni eheee nitsumɔi babaoo eshwieee enɔ be ni ele akɛ enyɛŋ etsu.

    “Mɔ ni ebaanyɛ etɔ lɛ bliboo waa ji mɔ ni enyɛɛɛ ekɛɛ dabi, mɔ ni nitsumɔ fɛɛ nitsumɔ ni abaahã lɛ lɛ, kɛ́ enyɛɛɛ etsu po lɛ, ekpɛlɛɔ nɔ akɛ ebaatsu. No etsɔɔɔ heshibaa. Etsɛɛɛ kɛkɛ lɛ, etɔ lɛ bliboo.”​—Jordan.

  • Ná be saŋŋ kɛjɔɔ ohe. Biblia lɛ kɛɔ akɛ: “Hejɔɔmɔ dɛ̃ kɔkɔ obɔ lɛ, ehi fe nii ni atsuɔ waa dɛ̃ kɔkɔi obɔbɔ enyɔ kɛ kɔɔyɔɔ sɛɛtiumɔ.” (Jajelɔ 4:6) Akɛɔ akɛ wɔ ji “niyenii kɛhã jwɛŋmɔ lɛ,” shi oblahii kɛ oblayei pii yɛ ni amɛnáaa ŋmɛlɛtswaa kpaanyɔ kɛmiimɔ nyɔŋma ni esa akɛ amɛná kɛwɔ gbɛkɛ lɛ.

    “Kɛ́ nitsumɔ babaoo jwere minɔ lɛ, minaaa be saŋŋ kɛwɔ. Shi bei pii lɛ, nakai wɔ ni kulɛ esa akɛ manyɛ mawɔ jogbaŋŋ lɛ ji nɔ ni baanyɛ aye abua mi koni kɛ́ je tsɛre lɛ, manyɛ matsu nii jogbaŋŋ ni mimii ashɛ mihe.”​—Brooklyn.

  • Too nibii ahe gbɛjianɔ jogbaŋŋ. Biblia lɛ kɛɔ akɛ: “Mɔdɛŋbɔlɔ gbɛjianɔtoi baaye omanye kɛ̃.” (Abɛi 21:5) Kasemɔ bɔ ni obaato obe kɛ onitsumɔ he gbɛjianɔ jogbaŋŋ, ni enɛ baaye abua bo owala gbii abɔ fɛɛ.

    “Obaanyɛ ogbɔ tɔlɛ ni etɔɔ bo babaoo lɛ nɔ kɛji akɛ oto onibii ahe gbɛjianɔ. Kɛ́ oŋmala nibii ni esa akɛ otsu lɛ oshwie shi lɛ, ewaaa kɛhãaa bo akɛ kɛ́ ehe bahia akɛ ofee tsakemɔi lɛ, obaafee tsakemɔi, ni no baaye abua bo koni ekatɔ bo bliboo.”​—Vanessa.