Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Mɛɛ Gbɛ Nɔ Biblia Lɛ Baanyɛ Aye Abua Mi?​—Fã 1:​—Kanemɔ O-Biblia Lɛ

Mɛɛ Gbɛ Nɔ Biblia Lɛ Baanyɛ Aye Abua Mi?​—Fã 1:​—Kanemɔ O-Biblia Lɛ

“Mika akɛ makane Biblia lɛ, shi mina akɛ efa tsɔ ni no wo mihe gbeyei!”​—Briana, eye afii 15.

Ani bo hu onuɔ he nakai? Sane nɛɛ baanyɛ aye abua bo!

 Mɛni hewɔ esa akɛ okane Biblia lɛ?

Ani onyaaa Biblia lɛ kanemɔ he? Kɛ́ nakai lɛ, wɔnuɔ bo shishi yɛ gbɛ ko nɔ. Ekolɛ, obaana Biblia lɛ akɛ eji wolo ko ni hiɛ baafai akpe kɛ sɛɛ, emli niŋmai lɛ yɛ bibii ni mfonirii hu bɛ mli​—ni etamɔ nɔ ni TV kɛ vidio kwɛmɔ baaŋɔɔ fe Biblia lɛ kanemɔ!

Shi susumɔ he yɛ nɛkɛ gbɛ nɔ: Kɛ́ oyana blema jwetri adeka agbo ko lɛ, ani osumɔŋ ni ole nɔ ni yɔɔ mli?

Biblia lɛ tamɔ adeka ko ni akɛ jwetri eto mli. Nilee babaoo yɛ mli ni baaye abua bo koni

  • Okpɛ yiŋ kpakpai

  • Okɛ ofɔlɔi ahi shi jogbaŋŋ

  • Oná nanemɛi kpakpai

  • Onyɛ okpee haomɔi anaa

Mɛɛ gbɛ nɔ blema wolo nɛɛ baanyɛ aye abua wɔ ŋmɛnɛ? Ebaanyɛ eye ebua wɔ ejaakɛ “Ŋmalɛ muu lɛ fɛɛ jɛ Nyɔŋmɔ mumɔ lɛŋ.” (2 Timoteo 3:​16) Enɛ tsɔɔ akɛ ŋaawoo ni yɔɔ Biblia lɛ mli lɛ jɛ Mɔ Ni Fe Mɔ Fɛɛ Mɔ lɛ ŋɔɔ.

Biblia lɛ tamɔ adeka ni akɛ jwetri toɔ mli ni nilee babaoo eyi mli

 Te esa akɛ makane Biblia lɛ mahã tɛŋŋ?

Gbɛ kome ji ni obaakane kɛjɛ shishijee kɛyashi naagbee. Enɛ baahã onu sane ni yɔɔ Biblia lɛ mli lɛ shishi. Gbɛi babaoo yɛ ni obaanyɛ otsɔ nɔ okane Biblia lɛ. Hã wɔsusu amɛteŋ enyɔ he:

  •  Obaanyɛ okane Biblia lɛ mli woji 66 lɛ kɛjɛ Mose klɛŋklɛŋ wolo lɛ kɛyashi Kpojiemɔ.

  •  Obaanyɛ okane Biblia lɛ yɛ bɔ ni saji ni abɔ he amaniɛ yɛ mli lɛ ba lɛ ehã lɛ naa.

Ŋaawoo: Saji Krokomɛi A7 ni yɔɔ Jeŋ Hee Shishitsɔɔmɔ lɛ mli lɛ tsɔɔ wɔ Yesu shihilɛ yɛ shikpɔŋ lɛ nɔ lɛ he saji titrii.

Gbɛ ni ji enyɔ nɔ ni obaanyɛ otsɔ nɔ okane Biblia lɛ ji, ni obaahala sane ko ni kɔɔ naagba ko ni okɛmiikpe he. Akɛ nɔkwɛmɔnɔ lɛ:

  • Ani obaasumɔ ni oná nanemɛi kpakpai? Kanemɔ Yonatan kɛ David naanyobɔɔ lɛ he sane. (1 Samuel, yitso 18-​20) Taomɔ sui kpakpai ni David yɔɔ ni ekolɛ ehã Yonatan kɛ lɛ bɔ naanyo lɛ.

  • Ani obaasumɔ ni onyɛ oye kaa nɔ be fɛɛ be? Kanemɔ bɔ ni fee ni Yosef nyɛ eye kaa nɔ lɛ he sane. (1 Mose, yitso 39) Taomɔ nɔ ni ye ebua Yosef ni enyɛ eye kaa nɔ lɛ.

  • Ani obaasumɔ ni ole bɔ ni sɔlemɔ baanyɛ aye abua bo? Kanemɔ Nehemia niiashikpamɔ lɛ. (Nehemia, yitso 2) Taomɔ odaseyeli ni tsɔɔ akɛ Nyɔŋmɔ hã esɔlemɔ lɛ hetoo.

Ŋaawoo: Kɛ́ obaakane Biblia lɛ, taomɔ he ko ni yɔɔ dioo koni ojwɛŋmɔ anyɛ ahi nikanemɔ lɛ nɔ.

Gbɛ ni ji etɛ nɔ ni obaanyɛ otsɔ nɔ okane Biblia lɛ ji ni obaahala sane ko loo Biblia mli wolo ni ji Lala lɛ mli sane ko, ni no sɛɛ lɛ, osusu bɔ ni obaanyɛ okɛtsu nii ohã lɛ he. Kɛ́ okane ogbe naa lɛ, bi ohe saji ni nyiɛ sɛɛ nɛɛ:

  •  Mɛni hewɔ Yehowa hã aŋma sane nɛɛ yɛ Biblia lɛ mli?

  •  Mɛni etsɔɔ mi yɛ Yehowa he loo bɔ ni efeɔ enii ehãa lɛ he?

  •  Te mafee tɛŋŋ mikɛ sane nɛɛ atsu nii yɛ mishihilɛ mli?

Ŋaawoo: Okɛ oti ko ama ohiɛ! Ŋmaa be ni obaasumɔ ni okɛ Biblia kanemɔ he gbɛjianɔtoo ni yɔɔ wɔwɛbsait lɛ nɔ lɛ atsu nii kɛje o-Biblia kanemɔ lɛ shishi.