Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Ani Esa Akɛ Mikɛ Mɛi Krokomɛi Hu Abɔ Naanyo?

Ani Esa Akɛ Mikɛ Mɛi Krokomɛi Hu Abɔ Naanyo?

“Minanemɛi lɛ hãa mináa miishɛɛ, ni ewa waa kɛhã mi akɛ mikɛ mɛi krokomɛi hu baabɔ yɛ amɛ sɛɛ.”​—Alan.

“Mɛi fioo pɛ ji minanemɛi, ni misumɔɔ lɛ nakai. Ewa kɛhã mi akɛ mikɛ mɛi ni mileee lɛ baagba sane.”​—Sara.

Ani onuɔ he tamɔ bɔ ni Alan kɛ Sara nuɔ he lɛ? Ani osumɔɔ onanemɛi lɛ asane aahu akɛ osumɔɔɔ ni oná nanemɛi hei ofata amɛhe?

Kɛ́ nakai, no lɛ, sane nɛɛ baaye abua bo!

 Naagbai ni okɛbaakpe kɛ́ oyɛ mɛi pɔtɛɛ komɛi ni okɛbɔɔ

Naagba bɛ he akɛ obaahã naanyobɔɔ ni mli wa ahi okɛ mɛi pɔtɛɛ komɛi pɛ ateŋ. Kɛ́ oyɛ mɛi pɔtɛɛ komɛi ni okɛbɔɔ lɛ, onáa miishɛɛ ejaakɛ amɛnuɔ bo shishi yɛ ofãtɔi lɛ fɛɛ asɛɛ.

“Kɛ́ oyɛ nanemɛi ni sumɔɔ osane lɛ onaa miishɛɛ waa. Kɛ́ odako lɛ, osumɔɔ ni mɔ fɛɛ mɔ asumɔ osane.”​—Karen, eye afii 19.

Ani ole? Yesu yɛ nanemɛi krokomɛi yɛ kaselɔi 12 lɛ sɛɛ, shi esumɔɔ kaselɔi 12 lɛ ateŋ mɛi etɛ komɛi asane waa, amɛji, Petro, Yakobo, kɛ Yohane.​—Marko 9:2; Luka 8:51.

Shi kɛ́ okɛ mɛi fioo komɛi bɔ naanyo lɛ, ebaanyɛ ekɛ naagbai aba. Akɛ nɔkwɛmɔnɔ lɛ:

  • Ehãŋ oná nanemɛi kpakpai krokomɛi.

    “Kɛ́ okɛ mɛi ni tamɔ bo pɛ bɔ naanyo lɛ, ehãŋ oná niiashikpamɔi pii loo okɛ mɛi ni hiɛ kã shi abɔ.”​—Evan, eye afii 21.

  • Ebaanyɛ ehã mɛi asusu akɛ owoɔ ohe nɔ.

    “Kɛ́ oyɛ mɛi pɔtɛɛ ni okɛbɔɔ naanyo lɛ, obaahã mɛi asusu akɛ osumɔɔɔ ni okɛ mɛi krokomɛi wieɔ.”​—Sara, eye afii 17.

  • Ebaanyɛ ehã ofata mɛi ahe kɛwa mɛi ayi.

    “Ekolɛ, owaŋ mɔ ko yi, shi kɛ́ mɛi ni ji onanemɛi lɛ fee lɛ, onaŋ akɛ naagba yɛ he loo ebaaŋɔɔ onaa po.”​—James, eye afii 17.

  • Ebaanyɛ ehã oná naagba, titri lɛ kɛ́ osumɔɔ ni ofee nɔ fɛɛ nɔ ni obaanyɛ koni onanemɛi lɛ asumɔ osane.

    “Kɛ́ onanemɛi lɛ ateŋ mɔ kome pɛ po feɔ efɔŋ lɛ, ewaaa akɛ nyɛ fɛɛ nyɛbaakase.”​—Martina, eye afii 17.

 Nɔ ni obaanyɛ ofee

  • Pɛimɔ jeŋba he mlai ni ohiɔ shi yɛ naa lɛ amli.

    Bi ohe akɛ: ‘Mɛɛ jeŋba he mlai mibɔɔ mɔdɛŋ akɛ mahi shi yɛ naa? Ani minanemɛi lɛ hãa efeɔ mlɛo kɛhãa mi akɛ mahi shi yɛ nakai mlai lɛ anaa loo amɛhãa ewaa kɛhãa mi? Ani masumɔ ni mafee nɔ fɛɛ nɔ ni manyɛ koni mikɛ amɛ teŋ akafite?’

    Biblia mli shishitoo mlai: “Naanyobɔɔ gbonyo fiteɔ jeŋba kpakpa.”​—1 Korintobii 15:33, shishigbɛ niŋmaa.

    “Kɛ́ onanemɛi lɛ ehiii shi yɛ jeŋba he mlai ni ohiɔ shi yɛ naa lɛ anaa lɛ, ewaŋ akɛ obaabɔi nibii ni kulɛ osumɔŋ akɛ ofee lɛ afeemɔ.”​—Ellen, eye afii 14.

  • Pɛimɔ nɔ ni okɛbaaye klɛŋklɛŋ gbɛhe lɛ mli.

    Bi ohe akɛ: ‘Ani naanyobɔɔ ni yɔɔ mi kɛ minanemɛi lɛ ateŋ lɛ he hiaa mi aahu akɛ mikuɔ mihiɛ mishwieɔ nɔ ni ja nɔ? Mɛni mafee kɛ́ minaanyo ko fee efɔŋ?’

    Biblia mli shishitoo mlai: “Mɛi fɛɛ ni misumɔɔ amɛ lɛ, mijajeɔ amɛ.”​—Kpojiemɔ 3:​19.

    “Kɛ́ onanemɛi lɛ eko fee efɔŋ ni oyawie lɛ, amɛbaanu he tamɔ nɔ ni ojie lɛ ohã.”​—Melanie, eye afii 22.

  • Okɛ mɛi srɔtoisrɔtoi abɔ naanyo.

    Bi ohe akɛ: ‘Ani manyɛ mikɛ mɛi krokomɛi ni mileee lɛ hu abɔ naanyo?’

    Biblia mli shishitoo mlai: “Nyɛtaoɔ nibii ni hi hã mɛi krokomɛi, shi jeee nibii ni hi hã nyɛ pɛ lɛ.”​—Filipibii 2:4.

    “Gbekɛbii ni mɛi bɛŋkɛɛɛ amɛ lɛ ji gbekɛbii ni ekolɛ akɛ amɛ yeee jogbaŋŋ yɛ shĩa. Kɛ́ obɛŋkɛ amɛ ni okɛ amɛ bɔ naanyo lɛ, obaana akɛ amɛyɛ sui kpakpai ni obaanyɛ okase.”​—Brian, eye afii 19.

Sane lɛ nɔŋŋ ji akɛ: Naagba bɛ he akɛ okɛ mɛi pɔtɛɛ komɛi baabɔ naanyo. Shi kɛ́ okɛ mɛi krokomɛi hu bɔ naanyo lɛ obaaná he sɛɛ. Biblia lɛ kɛɛ akɛ: “Mɔ ni hãa mɛi ahe jɔɔ amɛ lɛ, lɛ diɛŋtsɛ hu ehe baajɔ lɛ.”​—Abɛi 11:25.