Shi kɛya he ni ato saneyitsei lɛ anaa yɛ lɛ

SAJI NI OBLAHII KƐ OBLAYEI BIƆ

Mɛni Hewɔ Esa Akɛ Makpa Fai?

Mɛni Hewɔ Esa Akɛ Makpa Fai?

Mɛni obaafee yɛ shihilɛi ni nyiɛ sɛɛ nɛɛ amli?

  1. Otsɔɔlɔ lɛ wie ohiɛ ejaakɛ oje shi yɛ klas.

    Ani esa akɛ okpa otsɔɔlɔ lɛ fai​—kɛ́ onu he akɛ eetsere nɔ ko tsɔ po?

  2. Onaanyo ko ná ele akɛ owie ehe efɔŋ.

    Ani esa akɛ okpa onaanyo lɛ fai​—kɛ́ oheɔ oyeɔ akɛ nɔ ni owie lɛ yɛ mli po?

  3. Omli fu opapa ni okɛ lɛ wie bɔ ni esaaa.

    Ani esa akɛ okpa opapa fai​—kɛ́ onu he akɛ lɛ ewo omli la po?

Hetoo kɛhã sanebimɔi etɛ nɛɛ fɛɛ ji hɛɛ. Shi mɛni hewɔ esa akɛ okpa fai kɛ́ onu he akɛ otɔ̃ko po?

 Mɛni hewɔ esa akɛ okpa fai?

  • Kɛ́ okpaa fai lɛ, etsɔɔ akɛ oda. Kɛ́ owie nɔ ko loo ofee nɔ ko ni okpɛlɛ nɔ akɛ ofeee ni ahi lɛ, etsɔɔ akɛ ooná sui komɛi ni baaye abua bo kɛ́ oda.

    “Heshibaa kɛ tsuishitoo baaye abua bo ni okpa fai ni obo nɔ ni mɔ kroko lɛ baawie lɛ toi.”​—Rachel.

  • Kɛ́ okpaa fai lɛ, toiŋjɔlɛ hiɔ okɛ mɛi ateŋ. Mɛi ni kɛɔ akɛ “mifeee ni ahi lɛ” kɛ amɛnifeemɔ tsɔɔ akɛ, amɛmiisumɔ ni toiŋjɔlɛ ahi amɛ kɛ mɛi ateŋ moŋ fe ni amɛbaahã ana akɛ amɛsane ja fe mɔ kroko lɛ.

    “Kɛ́ onuɔ he po akɛ otɔ̃ko lɛ, ehi waa akɛ obaafee nɔ fɛɛ nɔ ni obaanyɛ koni toiŋjɔlɛ ahi nyɛteŋ. Kɛ́ okɛɛ ‘mifeee ni ahi lɛ,’ efiteŋ nɔ ko nɔ ko, moŋ lɛ ebaahã nyɛnaanyobɔɔ lɛ akã he ahi shi.”​—Miriam.

  • Kɛ́ okpaa fai lɛ, ohe jɔɔ bo. Kɛ́ owie nɔ ko loo ofee nɔ ko ni egba mɔ ko naa lɛ, ebaanyɛ etsɔ tamɔ jatsu kɛhã bo. Shi kɛ́ okpa fai lɛ, ohe jɔɔ bo. *

    “Bei komɛi lɛ, mikɛ mimami loo mipapa wieɔ bɔ ni esaaa. Kɛ́ eba lɛ nakai lɛ, edɔɔ mi, shi ewaa kɛhãa mi akɛ makpa fai. Shi kɛ́ mikpa fai lɛ, mihe jɔɔ mi ni toiŋjɔlɛ hiɔ weku lɛ mli.”​—Nia.

    Kɛ́ otɔ̃ lɛ, efeɔ tamɔ otere jatsu ko ni tsii; shi kɛ́ okpa fai lɛ, efeɔ tamɔ ato bo

Ani faikpamɔ wa? Hɛɛ! Oblayoo ko ni atsɛɔ lɛ Dena lɛ fɔɔ emami faikpamɔ ejaakɛ ekɛ emami ewieee jogbaŋŋ. Ewie akɛ: “Faikpamɔ bɛ mlɛo. Efeɔ tamɔ nɔ ko hɔ misɛŋ ni etsĩ nɔ ni mawie lɛ naa!”

 Bɔ ni obaafee okpa fai

  • Kɛ́ ebaahi lɛ, yaa mɔ lɛ ŋɔɔ ni oyakpa lɛ fai. Kɛ́ oyana mɔ lɛ hiɛ-kɛ-hiɛ ni okpa lɛ fai lɛ, enaa akɛ oshwa ohe lɛɛlɛŋ. Shi kɛ́ okpa lɛ fai kɛtsɔ tɛs mɛsej nɔ lɛ, ekolɛ, eheŋ eyeŋ akɛ oshwa ohe lɛɛlɛŋ. Kɛ́ osɛndi kolikoi ni nii yɔɔ mɔbɔ ahe mfonirii kɛfata he po lɛ, enaŋ lɛ nɔ ko.

    Ŋaawoo: Kɛ́ onyɛŋ oya eŋɔɔ ni oyakpa lɛ fai lɛ, obaanyɛ otswa lɛ loo oŋma lɛ lɛta. Gbɛ fɛɛ gbɛ ni obaatsɔ nɔ lɛ, bɔɔ mɔdɛŋ ni okɛ wiemɔi ni sa atsu nii.

    Biblia mli shishitoo mla: “Jalɔ tsui jwɛŋɔ sane nɔ dani ehãa hetoo.”​—Abɛi 15:28.

  • Kpa fai mra. Kɛ́ naagba ko ba ni otsuuu he nii oya lɛ, ebaatsɔ sane wulu ni naanyobɔɔ ni yɔɔ okɛ mɔ lɛ teŋ lɛ baafite.

    Ŋaawoo: Okɛ oti ko ama ohiɛ​—akɛ nɔkwɛmɔnɔ lɛ, kɛɛmɔ akɛ, ‘makpa fai ŋmɛnɛ.’ Kpɛɛ oyiŋ yɛ be ni obaayakpa fai lɛ he, ni obɔ mɔdɛŋ ni oye nɔ.

    Biblia mli shishitoo mla: “Okɛ mɔ ni kɛ bo yeɔ sane lɛ asaa mra.”​—Mateo 5:25.

  • Jɛɛ otsui mli okpa fai. Kɛ́ okɛɛ mɔ lɛ akɛ: “Edɔ mi akɛ onu he nakai lɛ,” okpako lɛ fai! Oblayoo ko ni atsɛɔ lɛ Janelle lɛ wie akɛ: “Kɛ́ otɔ̃ mɔ ko nɔ ni okpɛlɛ otɔmɔ lɛ nɔ ni okpa lɛ fai lɛ, bei pii lɛ ehãa bulɛ ni mɔ lɛ yɔɔ kɛhã bo lɛ faa.”

    Ŋaawoo: Kaakpa gbɛ akɛ mɔ lɛ afee nɔ ko dani okpa lɛ fai. Kaakɛɛ akɛ, “Ja ekpa mi fai dani mi hu makpa lɛ fai.”

    Biblia mli shishitoo mla: ‘Nyɛhãa wɔtiua nibii ni kɛ toiŋjɔlɛ baa lɛ asɛɛ.’​—Romabii 14:19.

^ kk. 19 Kɛ́ olaaje mɔ ko nɔ ko loo ofite mɔ ko nɔ ko lɛ, esaaa akɛ okpaa lɛ fai pɛ, esa akɛ obɔ mɔdɛŋ akɛ obaato lɛ najiaŋ hu.