Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

SAJI NI OBLAHII KƐ OBLAYEI BIƆ

Ani Eji Hefatalɔ Ni Sa Mi?

Ani Eji Hefatalɔ Ni Sa Mi?

Ani ona mɔ ko ni osusuɔ akɛ ebaafee hefatalɔ ni sa kɛhã gbalashihilɛ? Kɛ́ nakai lɛ, te obaafee tɛŋŋ ole akɛ eji hefatalɔ ni sa kɛhã bo lɛ?

Esa akɛ okwɛ koni mɔ lɛ he fɛo loo enifeemɔi komɛi akalaka bo. Ebaanyɛ eba lɛ akɛ yoo ni ehe fɛo emɔ otsui nɛɛ jeee mɔ ko ni anyɛɔ amuɔ afɔ̃ɔ enɔ, aloo ekolɛ nuu ni mɛi fɛɛ sumɔɔ esane nɛɛ jeee mɔ ko ni baa ejeŋ jogbaŋŋ. Ekã shi faŋŋ akɛ, ootao mɔ ko ni obaanyɛ okɛ lɛ ahi shi daa—mɔ ko ni esu kɛ otii ni mamɔ ehiɛ lɛ tamɔ onɔ lɛ nɔŋŋ.1 Mose 2:18; Mateo 19:4-6.

Kwɛmɔ Nii Kɛya Shɔŋŋ

Susumɔ mɔ ni oná ehe suɔmɔ lɛ he jogbaŋŋ. Kɛ̃lɛ, kwɛmɔ jogbaŋŋ! Ejaakɛ, kɛ́ okwɛɛɛ ni ahi lɛ, okɛ ojwɛŋmɔ baama esui ni osumɔɔ ni ona lɛ pɛ anɔ. No hewɔ lɛ, too otsui shi. Bɔɔ mɔdɛŋ ole nɔ gbɔmɔ ni eji diɛŋtsɛ.

Mɛi pii yɛ ni kɛ́ amɛkɛ mɔ ko miinyiɛ kɛhã gbãla lɛ, amɛkwɛɛɛ nii kɛyaaa shɔŋŋ. Moŋ lɛ, oya nɔŋŋ lɛ amɛkɛ amɛjwɛŋmɔ maa nibii ni amɛyi enyɔ lɛ fɛɛ amɛsumɔɔ lɛ anɔ; amɛkɛɔ akɛ: “Lala ni misumɔɔ lɛ, no nɔŋŋ esumɔɔ.” “Shwɛmɔ ni misumɔɔ lɛ, no nɔŋŋ esumɔɔ.” “Wɔkɛ wɔhe kpãa gbee yɛ nɔ fɛɛ nɔ he!” Shi esaaa akɛ ohãa enɛɛmɛi lakaa bo. Esa akɛ oyoo ‘etsuiŋ gbɔmɔ ní aŋɔtee’ lɛ. (1 Petro 3:4; Efesobii 3:16) Nɔ najiaŋ ni okɛ ojwɛŋmɔ baama nibii ni osusuɔ akɛ nyɛkpãa gbee yɛ he lɛ anɔ lɛ, ebaahi jogbaŋŋ akɛ obaakwɛ bɔ ni efeɔ nii kɛ́ nyɛkpaaa gbee yɛ nɔ ko he.

Akɛ nɔkwɛmɔnɔ lɛ, susumɔ saji nɛɛ ahe okwɛ:

  • Kɛ́ gbeekpamɔ eyabaaa yɛ nyɛteŋ lɛ, ani eyeɔ etsui naa sane, ‘emli fuɔ,’ loo ewieɔ wiemɔi ni esaaa? (Galatiabii 5:19, 20; Kolosebii 3:8) Loo kɛ́ eba lɛ nakai lɛ, eŋmɛɔ sane lɛ he, kɛ́ nakai feemɔ fiteŋ nɔ ko?Yakobo 3:17.

  • Ani esumɔɔ ni etsɔ ŋaa gbɛ nɔ koni afee nɔ ni esumɔɔ, loo enine ashɛ nɔ ni etaoɔ nɔ? Ani eyeɔ awuŋa? Ani esumɔɔ akɛ ená onɔ fɛɛ nɔ mli? Oblayoo ko ni atsɛɔ lɛ Nicole lɛ wie akɛ: “Bei komɛi lɛ, minuɔ ni mɛi komɛi ni nyiɛ kɛhã gbãla lɛ kɛ amɛhe miibé, akɛni mɔ kome etswaaa mɔ kroko lɛ loo ehãaa ele he ni etee lɛ hewɔ. Enɛ tsɔɔ akɛ amɛyɛ naagba.”1 Korintobii 13:4.

  • Te mɛi naa nakai mɔ lɛ amɛhãa tɛŋŋ? Ebaahi akɛ okɛ mɛi ni le mɔ lɛ jogbaŋŋ, tamɔ asafoŋ onukpai loo mɛi ni edara ni sumɔɔ Yehowa waa ni yɔɔ asafo lɛ mli lɛ agba mɔ lɛ he sane. Kɛ́ ofee nakai lɛ, obaale kɛji mɛi “wieɔ ehe ekpakpa” loo awieee ehe ekpakpa.Bɔfoi 16:1, 2.