Shi kɛya he ni ato saneyitsei lɛ anaa yɛ lɛ

KASEMƆ AMƐHEMƆKƐYELI LƐ | YONATAN

“Nɔ Ko Nɔ Ko Nyɛŋ Atsĩ Yehowa Naa”

“Nɔ Ko Nɔ Ko Nyɛŋ Atsĩ Yehowa Naa”

Feemɔ asraafoi a-nsara ko ni hiɛ miikwɛ shikpɔŋ ko ni egbi kɛ enɔ tɛitɛi ni yɔɔ jɔɔ mli lɛ he mfoniri okwɛ. Filistibii asraafoi ni yɔɔ nsara lɛ mli lɛ ena nɔ ko ni sa kadimɔ waa yɛ jɔɔ lɛ mli: Israel hii enyɔ komɛi damɔ jɔɔ lɛ mli, ni mɔ fɛɛ mɔ miina amɛ. Efee asraafoi lɛ ŋmɔlɔ ejaakɛ hii nɛɛ ahe bɛ gbeyei kwraa. Nakai beiaŋ lɛ, Filistibii lɛ eye Israelbii lɛ anɔ afii babaoo, ni ja Israelbii lɛ etee Filistibii lɛ, ni ji amɛhenyɛlɔi lɛ, aŋɔɔ dani amɛnyɛɔ amɛjɔɔ amɛŋmɔshi dadei anaa. No hewɔ lɛ, Israel asraafoi lɛ bɛ tawuu nibii tsɔ. Agbɛnɛ hu, Israel hii enyɔ pɛ anaa yɛ jɔɔ lɛ mli lɛ! Ni eji amɛji asraafoi ni ewula amɛhe kɛ tawuu nii po kulɛ, mɛɛ awui po amɛbaanyɛ amɛye? Filistibii lɛ ye amɛhe fɛo ni amɛbo amɛtsɛ amɛ akɛ: “Nyɛkwɔa kɛbaa, ni wɔbaatsɔɔ nyɛ nɔ ko!”​—1 Samuel 13:19-23; 14:11, 12.

Eji anɔkwale akɛ abaatsɔɔ mɔ ko nɔ ko, shi Filistibii lɛ moŋ abaatsɔɔ amɛ nɔ ko lɛ. Israel hii enyɔ lɛ kpeleke shi kɛtsɔ jɔɔ lɛ mli, ni amɛbɔi gɔŋ lɛ kwɔɔ kɛ Filistibii lɛ anɔ yaa. Gɔŋ lɛ kwɔɔ bɛ mlɛo, no hewɔ lɛ, ebi ni amɛkɛ amɛniji kɛ amɛnaji fɛɛ akwɔ, shi amɛnijiaŋ ejeee wui, moŋ lɛ amɛtee nɔ amɛkwɔ oyayaayai kɛbɛŋkɛ Filistibii lɛ! (1 Samuel 14:13) Agbɛnɛ lɛ, Filistibii lɛ na akɛ nuu ni nyiɛ hiɛ lɛ hiɛ tawuu nii; ni mɔ ni hiɛɔ etawuu nii lɛ nyiɛ esɛɛ. Shi ani amɛyi enyɔ lɛ pɛ amɛbaa amɛbatutua asraafoi babaoo nɛɛ fɛɛ? Mɛni, eye sɛkɛ?

Eyeko sɛkɛ; eji mɔ ko ni hemɔkɛyeli mli wa. Atsɛɔ lɛ Yonatan, ni anɔkwa Kristofoi fɛɛ ni yɔɔ ŋmɛnɛ lɛ baanyɛ akase nɔ ko kɛjɛ esane lɛ mli. Eyɛ mli akɛ wɔyaaa ta moŋ, shi wɔbaanyɛ wɔkase sui komɛi ni he hiaa waa yɛ Yonatan sane lɛ mli; nomɛi ji, ekãafeemɔ, anɔkwayeli, kɛ mɛi ahe susumɔ, ni esa akɛ wɔná sui nɛɛ koni wɔná hemɔkɛyeli ni mli wa.​—Yesaia 2:4; Mateo 26:51, 52.

Bi Ni Yeɔ Anɔkwa Kɛ Asraafonyo Ni Yɔɔ Ekãa

Bɔ ni afee ni wɔle nɔ hewɔ ni Yonatan yaa ekɛ Filistibii lɛ ayawu lɛ, hã wɔkwɛ mɔ ni eji diɛŋtsɛ. Yonatan ji Saul, ni ji Israel klɛŋklɛŋ maŋtsɛ lɛ kromɔbi. Be ni afɔ Saul mu akɛ maŋtsɛ lɛ, no mli lɛ, Yonatan eda momo, eye aaafee afii 20 loo nɔ ni fe nakai. Etamɔ nɔ ni Yonatan kɛ epapa shãra waa, ejaakɛ epapa kɛ lɛ gbaa eyitsoŋ sane. Yonatan le akɛ epapa kwɔ, ehe yɛ fɛo, ni agbɛnɛ hu eji asraafonyo ni yɔɔ ekãa, shi ele epapa he nɔ ko hu ni he hiaa fe enɛɛmɛi​—eyɛ hemɔkɛyeli ni ebaa ehe shi waa. Ekolɛ enɛ hã Yonatan na nɔ hewɔ ni Yehowa hala Saul akɛ maŋtsɛ lɛ. Gbalɔ Samuel po wie akɛ mɔ ko mɔ ko bɛ Israel ni tamɔ Saul!​—1 Samuel 9:​1, 2, 21; 10:20-​24; 20:2.

Ekolɛ Yonatan nu he akɛ eji hegbɛ ni ená akɛ ebaawuu eshi Yehowa webii lɛ ahenyɛlɔi lɛ yɛ epapa famɔ naa. Tai ni awu yɛ nakai beiaŋ lɛ jeee majimaji ateŋ ta tamɔ eji ŋmɛnɛ lɛ. Nakai bei lɛ amli lɛ,Yehowa hala Israel akɛ emaŋ, ni be fɛɛ be lɛ maji ni jaa amale nyɔŋmɔi baa amɛbatutuaa amɛ. Bei pii lɛ, Filistibii lɛ ni nyɔŋmɔi tamɔ Dagon ni amɛjaa lɛ efite amɛjwɛŋmɔ lɛ bɔɔ mɔdɛŋ akɛ amɛbaawa Yehowa webii lɛ ayi loo amɛbaakpãtã amɛhiɛ po.

Yɛ hii tamɔ Yonatan gbɛfaŋ lɛ, ta ni akɛ henyɛlɔi nɛɛ wu lɛ bafee sɔɔmɔ ni akɛmiihã Nyɔŋmɔ. Ni Yehowa jɔɔ Yonatan mɔdɛŋbɔi lɛ anɔ. Be ni Saul batsɔ maŋtsɛ etsɛɛɛ nɔŋŋ lɛ, ehala ebinuu Yonatan akɛ asraafoi akpe anɔkwɛlɔ, ni enyiɛ amɛhiɛ kɛyatutua Filistibii asraafoi akuu ko yɛ Geba. Eyɛ mli lɛ akɛ Yonatan asraafoi lɛ, ehiɛɛɛ tawuu nibii kpakpa ko moŋ, shi Yehowa ye ebua amɛ ni amɛye amɛhenyɛlɔi lɛ anɔ. Enɛ hã Filistibii lɛ yabua asraafoi babaoo anaa. Saul asraafoi lɛ pii she gbeyei. Amɛteŋ mɛi komɛi jo foi amɛyatee, ni mɛi fioo hu yafata Filistibii lɛ ahe! Shi Yonatan ekãa lɛ naa baaa shi kɔkɔɔkɔ.​—1 Samuel 13:​2-7; 14:21.

Yɛ gbi ni awie he yɛ sane nɛɛ shishijee lɛ nɔ lɛ, Yonatan kpɛ mli akɛ ekɛ mɔ ni hiɛɔ etawuu nii lɛ baashi esraafoi lɛ ateŋ bɔ ni mɔ ko enaŋ amɛ. Be ni amɛbɛŋkɛɔ he ni Filistibii lɛ a-nsara lɛ yɔɔ yɛ Mikmash lɛ, Yonatan tsɔɔ mɔ ni hiɛɔ etawuu nii lɛ nɔ ni ekpɛ mli akɛ ebaafee. Amɛbaahã Filisti asraafoi ni yɔɔ gɔŋ lɛ nɔ lɛ ana amɛ faŋŋ. Kɛ́ Filistibii asraafoi lɛ bakɛɛ amɛ akɛ, kɛ́ amɛmiisumɔ lɛ amɛkwɔ kɛba lɛ, no baafee okadi ni tsɔɔ akɛ Yehowa baaye ebua ewebii lɛ. Mɔ ni fata Yonatan he lɛ kpɛlɛ nɔ oya nɔŋŋ, ekolɛ yɛ sane ni woɔ mɔ hewalɛ ni Yonatan wie lɛ hewɔ, ewie akɛ, “nɔ ko nɔ ko nyɛŋ atsĩ Yehowa naa akɛ ekɛ mɛi pii loo mɛi fioo ahere mɛi.” (1 Samuel 14:​6-​10) Mɛni etsɔɔ lɛ?

Eyɛ faŋŋ akɛ Yonatan le e-Nyɔŋmɔ lɛ jogbaŋŋ. Ŋwanejee ko bɛ he akɛ, ele bɔ ni Yehowa ye ebua ewebii yɛ blema ni amɛye amɛhenyɛlɔi ni yi fa kwraa fe amɛ lɛ anɔ kunim. Yɛ shihilɛi komɛi amli po lɛ, ekɛ aŋkroaŋkroi tsu nii kɛye mɛi pii anɔ kunim. (Kojolɔi 3:31; 4:1-23; 16:23-30) No hewɔ lɛ, Yonatan le akɛ kɛ́ Nyɔŋmɔ webii lɛ baaye kunim lɛ, jeee amɛyifalɛ loo amɛhewalɛ loo tawuu nii ni amɛyɔɔ lɛ ni baatsɔɔ, shi moŋ amɛhemɔkɛyeli. No hewɔ lɛ, Yonatan jɛ hemɔkɛyeli mli eshi sane lɛ ehã Yehowa koni etsɔɔ kɛji esa akɛ lɛ kɛ mɔ ni fata ehe lɛ atutua Filistibii lɛ nsara lɛ; etao okadi ko ni baahã ena akɛ Yehowa baahã amɛtutua Filistibii lɛ. Be ni Yonatan na okadi lɛ, ekɛ ekãa tee ni eyatutua amɛ.

Naa nibii enyɔ komɛi ni tsɔɔ akɛ Yonatan yɛ hemɔkɛyeli. Klɛŋklɛŋ lɛ, esheɔ Yehowa, e-Nyɔŋmɔ lɛ gbeyei waa. Ele akɛ jeee gbɔmɔ hewalɛ naa ni Nyɔŋmɔ Ofe lɛ nyɛɔ etsuɔ eyiŋtoi ahe nii, kɛ̃lɛ Yehowa jɔɔ mɛi ni sɔmɔɔ lɛ yɛ anɔkwale mli lɛ. (2 Kronika 16:9) Nɔ ni ji enyɔ lɛ, Yonatan tao okadi ni tsɔɔ akɛ Yehowa miisumɔ ni eyatutua Filistibii lɛ, dani eyatutua amɛ. Ŋmɛnɛ lɛ, kɛ́ wɔyaafee nɔ ko lɛ, wɔkpaaa Nyɔŋmɔ gbɛ akɛ ehã wɔ okadi ko dani wɔna akɛ ekpɛlɛɔ nɔ. Nibii fɛɛ ni baahã wɔyɔse nɔ ni Nyɔŋmɔ sumɔɔ akɛ wɔfee lɛ yɛ Biblia lɛ mli. (2 Timoteo 3:16, 17) Kɛ́ wɔyaakpɛ yiŋ ko ni yɔɔ hiɛdɔɔ lɛ, ani wɔkwɛɔ nɔ ni Biblia lɛ kɛɔ yɛ he dã? Kɛ́ wɔfeɔ nakai lɛ, etsɔɔ akɛ wɔsumɔɔ ni wɔfee Nyɔŋmɔ suɔmɔnaa nii moŋ fe wɔ diɛŋtsɛ wɔnɔ​— Nakai pɛpɛɛpɛ Yonatan fee.

No hewɔ lɛ, hii enyɔ lɛ, tatsɛ lɛ, kɛ mɔ ni fata ehe lɛ, bɔi gɔŋ lɛ kwɔɔ oyayaayai koni amɛyatutua Filistibii lɛ a-nsara lɛ. Be ni Filistibii lɛ yɔse akɛ aaba abatutua amɛ lɛ, amɛtsu asraafoi kɛtee koni amɛkɛ mɛi ni baa nsara lɛ mli lɛ ayawu. Filistibii lɛ ayi fa kwraa fe mɛi ni baa amɛnɔ lɛ, ni agbɛnɛ hu, he ni amɛyɔɔ lɛ yɛ ŋwɛigbɛ, no hewɔ lɛ, kulɛ ewaŋ kwraa akɛ amɛbaaye hii enyɔ lɛ anɔ kunim. Shi Yonatan tswia asraafoi lɛ fɛɛ nii ekomekomei. Ni mɔ ni hiɛɔ etawuu nii lɛ gbegbee amɛ yɛ esɛɛ. Hii enyɔ lɛ gbe henyɛlɔi lɛ asraafoi 20 yɛ shikpɔŋ bibioo ko nɔ! Jeee no pɛ Yehowa fee. Biblia lɛ kɛɛ: “Kɛkɛ ni ŋmiŋmi mɔmɔ mɛi ni yɔɔ nsara lɛ mli yɛ ŋa lɛ nɔ lɛ, kɛ agbɛnɛ hu asraafoi lɛ fɛɛ, ni ŋmiŋmi mɔmɔ asraafoi ni loɔ Israelbii lɛ anibii lɛ po. Shikpɔŋ lɛ bɔi hosomɔ, ni Nyɔŋmɔ hã ŋmiŋmi mɔmɔ amɛ.”​—1 Samuel 14:15.

Yonatan led a two-man attack against an entire outpost of armed enemies

Saul kɛ hii ni fata ehe lɛ damɔ sɛɛ flɛŋŋ amɛkwɛ bɔ ni Filistibii lɛ ayiŋ futu amɛ ni amɛteŋ mɔ fɛɛ mɔ dɔ eklante eto enaanyo nɔ lɛ! (1 Samuel 14:16, 20) Israelbii lɛ ná ekãa ni amɛtutua Filistibii lɛ, ekolɛ, amɛkɔlɔ Filistibii lɛ asraafoi ni egboi lɛ aklante lɛ po kɛwu ta. Yehowa hã ewebii lɛ ye kunim kpele ko nakai gbi lɛ. Ni kɛjɛ nakai beiaŋ kɛbaa nɛɛ fɛɛ etsakeko. Ŋmɛnɛ lɛ kɛ́ wɔ hu wɔná hemɔkɛyeli yɛ emli taakɛ Yonatan kɛ mɔ ni hiɛɔ etawuu nii ni fata ehe ni atsĩii egbɛ́i tã lɛ fee lɛ, wɔshwaŋ wɔhe kɔkɔɔkɔ.​—Maleaki 3:6; Romabii 10:11.

“Nyɔŋmɔ Kɛ Lɛ Tsu Nii”

Saul eyanáaa kunim ni aye lɛ he sɛɛ kɛmɔɔɔ shi taakɛ Yonatan ná he sɛɛ lɛ. No mli lɛ, Saul efee eshai komɛi ni yɔɔ hiɛdɔɔ. Egbo Yehowa gbalɔ Samuel nɔ toi, be ni eshã afɔle ni kulɛ esa akɛ gbalɔ ni ji Levinyo hu lɛ ashã lɛ. Be ni Samuel bashɛ shi lɛ, ekɛɛ Saul akɛ yɛ nakai toigbele lɛ hewɔ lɛ, emaŋtsɛyeli lɛ damɔŋ shi. No sɛɛ be ni Saul tsuɔ esraafoi koni amɛya ta lɛ, ekã amɛ kitã ko ni nilee bɛ mli, ewie akɛ: “Mɔ fɛɛ mɔ ni baaye nii dani je baana loo dani matɔ mihenyɛlɔi lɛ anɔ owele magbe naa lɛ, alomɔ lɛ!”​—1 Samuel 13:10-​14; 14:24.

Saul wiemɔi nɛɛ hãa wɔnaa akɛ ejeŋba ebɔi tsakemɔ. Ani nuu ni kulɛ ebaa ehe shi waa, ni esumɔɔ Nyɔŋmɔ lɛ ebɔi ehenɔwomɔ? Ejaakɛ Yehowa fãaa lɛ akɛ, ekɛ naatsii ni nilee bɛ mli nɛɛ afɔ̃ nakai asraafoi kãkãlɔi, ni tsuɔ nii waa lɛ anɔ. Ani Saul wiemɔi ni ji “dani matɔ mihenyɛlɔi lɛ anɔ owele magbe naa lɛ” etsɔɔɔ akɛ Saul susuɔ akɛ lɛ ehewɔ awuɔ ta lɛ? Ani ehiɛ miikpa nɔ akɛ, jalɛsane ni Yehowa taoɔ eye lɛ hewɔ awuɔ ta nɛɛ, shi jeee owele ni lɛ Saul lɛ etaoɔ etɔ, anunyam ni etaoɔ, loo kunim ni ebaaye lɛ hewɔ?

Yonatan leee kitã ni nilee bɛ mli ni epapa ekã lɛ he nɔ ko kwraa. Be ni ejɛ ta lɛ eba lɛ, akɛni etɔ lɛ hewɔ lɛ, ekɛ edɛhiɛmɔtso lɛ tsɔ wo agbaku ko mli, ni ekɛsa enaa; amrɔ nɔŋŋ lɛ, enu he akɛ ená hewalɛ ekoŋŋ. Kɛkɛ ni hii lɛ ateŋ mɔ kome kɛɛ lɛ kitã ni epapa ekã akɛ mɔ ko kɛ nɔ ko akasa enaa lɛ. Yonatan hã hetoo akɛ: “Mitsɛ ehao mɛi lɛ waa. Kwɛ bɔ ni miná hewalɛ ekoŋŋ be ni mikɛ wo fioo nɛɛ sa minaa lɛ. Eji ŋmɛnɛ lɛ, mɛi lɛ ye nii bɔ ni amɛsumɔɔ kɛjɛ nibii ni amɛha yɛ amɛhenyɛlɔi lɛ adɛŋ lɛ mli kulɛ, abaagbe Filistibii lɛ babaoo fe nɛkɛ po.” (1 Samuel 14:25-30) Esane ja. Yonatan yeɔ etsɛ anɔkwa, shi enɔkwayeli lɛ husu yɛ he. Jeee nɔ fɛɛ nɔ kɛkɛ ni epapa feɔ loo ewieɔ lɛ ni ekɛ lɛ kpãa gbee, ni pɛpɛɛpɛ ni eŋmɛ nɛɛ hã mɛi bu lɛ waa.

Be ni Saul ná le akɛ Yonatan eku ekitã lɛ mli lɛ fɛɛ sɛɛ lɛ, ekpɛlɛɛɛ nɔ akɛ nilee bɛ kitã ni ekã lɛ mli. Moŋ lɛ, enu he akɛ esa akɛ agbe ebinuu lɛ! Yonatan kɛ lɛ etaaa sane naa, ni ekpaaa lɛ fai koni ena lɛ mɔbɔ. Kadimɔ hetoo ni sa kadimɔ ni ekɛhã. Ejɛ etsuiŋ ewie akɛ: “Naa mi! Abaanyɛ agbe mi!” Shi Israelbii lɛ jie naa akɛ: “Ani esa akɛ Yonatan, mɔ ni ye kunim kpele nɛɛ ehã Israel lɛ, agbo? Ebaŋ lɛ nakai kɔkɔɔkɔ! Gbii abɔ ni Yehowa hiɛ kã nɛɛ, eyiteŋ tsɔi kome ganee po esaŋ shikpɔŋ, ejaakɛ Nyɔŋmɔ kɛ lɛ tsu nii ŋmɛnɛ gbi nɛɛ.” Mɛni jɛ mli kɛba? Saul bo amɛ toi. Amaniɛbɔɔ lɛ kɛɛ: “No hewɔ lɛ, mɛi lɛ here Yonatan, ni egbooo.”​—1 Samuel 14:43-​45.

“Here I am! I am ready to die!”

Yonatan tsɔ ekãa ni eyɔɔ, bɔ ni etsuɔ nii waa, kɛ ehe ni ekɛshãa afɔle lɛ nɔ efee gbɛ́i kpakpa. Be ni ewala yaje oshãra mli lɛ, gbɛ́i kpakpa ni efee lɛ ye ebua lɛ. Esa akɛ daa gbi lɛ, wɔ hu wɔbi wɔhe akɛ: Mɛɛ gbɛ́i nɛkɛ mifeɔ mihãa mihe? Biblia lɛ tsɔɔ akɛ, gbɛ́i kpakpa he yɛ sɛɛnamɔ waa. (Jajelɔ 7:1) Kɛ́ wɔ hu wɔmia wɔhiɛ wɔfee gbɛ́i kpakpa yɛ Yehowa hiɛ taakɛ Yonatan fee lɛ, nakai gbɛ́i kpakpa lɛ baaye abua wɔ waa.

Saul Kɔ Gbɛ Gbonyo Ko

Saul tɔmɔi lɛ fɛɛ sɛɛ lɛ, Yonatan tee nɔ eye lɛ anɔkwa, ni ekɛ lɛ fee ekome kɛwu tai srɔtoi afii babaoo. Be ni Saul gboɔ Nyɔŋmɔ nɔ toi ni ewoɔ ehe nɔ lɛ, kwɛmɔ bɔ ni enɛ baanyɛ adɔ Yonatan waa ehã. Epapa miikɔ gbɛ gbonyo ko, shi Yonatan nyɛŋ etsĩ enaa.

Nu bafe ma agbɛnɛ be ni Yehowa kɛɛ Saul ni ekɛ Amalekbii lɛ ayawu ta lɛ; Amalekbii nɛɛ feɔ yiwalɛ nibii aahu akɛ yɛ Mose gbii lɛ amli lɛ, Yehowa gba akɛ abaakpãtã amɛmaŋ lɛ hiɛ kwraa. (2 Mose 17:14) Yehowa kɛɛ Saul akɛ, ekpãtã amɛkooloi lɛ fɛɛ ahiɛ ni egbe amɛmaŋtsɛ lɛ, ni ji Agag. Saul ye kunim yɛ ta lɛ mli, ni ŋwanejee ko bɛ he akɛ, no mli lɛ, Yonatan kɛ ekãa wu ta lɛ yɛ epapa famɔ shishi taakɛ efɔɔ feemɔ lɛ. Shi Saul kɛ kuɛŋtimɔ gbo Yehowa nɔ toi, ebaa Agag, kooloi lɛ, kɛ nibii kpakpai lɛ fɛɛ yi. Gbalɔ Samuel yajaje Yehowa naagbee kojomɔi nɛɛ eshwie Saul nɔ, ewie akɛ: “Akɛni okwa Yehowa wiemɔ lɛ hewɔ lɛ, lɛ hu ekwa bo maŋtsɛ lɛ yeli.”​—1 Samuel 15:​2, 3, 9, 10, 23.

No sɛɛ etsɛɛɛ lɛ, Yehowa jie emumɔ krɔŋkrɔŋ lɛ yɛ Saul nɔ. Akɛni Yehowa mumɔ lɛ bɛ Saul nɔ dɔŋŋ hewɔ lɛ, bei pii lɛ, emiishɛɛ tãa, emli fũɔ waa, ni gbeyei mɔɔ lɛ. Ebafee tamɔ nɔ ni Nyɔŋmɔ ehã mumɔ gbonyo ko ebaye mumɔ krɔŋkrɔŋ ni kulɛ eyɔɔ Saul nɔ lɛ najiaŋ. (1 Samuel 16:14; 18:10-​12) Kwɛ bɔ ni shihilɛ nɛɛ baagba Yonatan naa akɛ epapa ni kulɛ ebaa ejeŋ jogbaŋŋ lɛ subaŋ etsake kwraa agbɛnɛ! Fɛɛ sɛɛ lɛ, Yonatan tee nɔ ekɛ anɔkwayeli sɔmɔ Yehowa. Eye ebua epapa bɔ ni ebaanyɛ, ni bei komɛi po lɛ, ekɛɔ lɛ nɔ ni sa akɛ ekɛɛ lɛ, shi fɛɛ sɛɛ lɛ, etee nɔ ekɛ ehiɛ fɔ̃ Yehowa, ni ji e-Nyɔŋmɔ kɛ e-Tsɛ ni tsakeee lɛ nɔ.​—1 Samuel 19:​4, 5.

Ani oyɛ mɔ ko ni osumɔɔ esane waa, ekolɛ owekunyo ko, ni tsutsu ko lɛ ebaa ejeŋ jogbaŋŋ shi bianɛ lɛ ejeŋba efite kwraa? Kɛ́ eba lɛ nakai lɛ, ebaadɔ bo waa. Nɔ ni ba Yonatan nɔ lɛ hãa wɔkaiɔ nɔ ko ni sɛɛ mli lɛ lalatsɛ lɛ wie, ewie akɛ: “Kɛ́ mi diɛŋtsɛ mipapa kɛ mimami shi mi po lɛ, Yehowa diɛŋtsɛ baahere mi.” (Lala 27:10) Yehowa yeɔ anɔkwa. Ebaahere bo hu, ni ebaatsɔ Tsɛ ni nɔ bɛ ehã bo, ekɔɔɔ he eko nɔ ni adesai ni yeee emuu lɛ baafee kɛje onijiaŋ wui lɛ.

Ekolɛ, Yonatan ná ele akɛ Yehowa ekpɛ eyiŋ akɛ ebaashɔ̃ maŋtsɛyeli lɛ kɛje Saul dɛŋ. Te Yonatan fee enii tɛŋŋ yɛ sane nɛɛ he lɛ? Ani ebi ehe akɛ, ‘Mɛɛ maŋtsɛ nɛkɛ matsɔ?’ Ani eshwe akɛ, kɛ́ ebaye maŋtsɛ lɛ, ebaajaje epapa tɔ̃mɔi lɛ ekomɛi koni ekɛfee nɔkwɛmɔnɔ kpakpa akɛ maŋtsɛ anɔkwafo ni boɔ gbɛtsɔɔmɔ toi? Wɔleee nɔ ni no mli lɛ eyɔɔ ejwɛŋmɔŋ; nɔ ni wɔle pɛ ji akɛ, nibii nɛɛ ateŋ eko kwraa baaa mli. Ani no tsɔɔ akɛ Yehowa kwa nuu anɔkwafo nɛɛ? Dabi kwraa, ekɛ Yonatan fee anɔkwa naanyobɔɔ he nɔkwɛmɔnɔ ko ni nɔ bɛ kwraa yɛ Biblia lɛ mli! Wɔbaasusu naanyobɔɔ nɛɛ he yɛ Yonatan he sane kroko ni abaaŋma lɛ mli.