Shi kɛya he ni ato saneyitsei lɛ anaa yɛ lɛ

Te Fee Tɛŋŋ Ni Wala Je Shishi?

Te Fee Tɛŋŋ Ni Wala Je Shishi?

Mɛni okɛbaawo gbɛhe ni ashi lɛ?

WALA BA KƐTSƆ . . . NƆ

  1. SUTSAKEMƆ

  2. ADEBƆƆ

Mɛi komɛi baakɛɛ akɛ, mɔ ni sumɔɔ jeŋ shikpamɔ lɛ baakɔ “sutsakemɔ” ni mɔ ni sumɔɔ Nyɔŋmɔ jamɔ lɛ baakɔ “adebɔɔ.”

Shi jeee be fɛɛ be eyɔɔ nakai.

Anɔkwa sane ji akɛ, mɛi ni etee skul kɛshɛ shɔŋŋ, ni jeŋ shikpalɔi fata he lɛ, ateŋ mɛi pii ayiŋ etɛɛɛ amɛ yɛ sutsakemɔ tsɔɔmɔ lɛ he.

Susumɔ filikilɔi ahe nilelɔ kpanaa ni atsɛɔ lɛ Gerard, ni kase sutsakemɔ he nii yɛ kɔleji lɛ he okwɛ. Ewie akɛ: “Kɛ́ wɔmiifee kaa lɛ, miŋmaa nibii ni mitsɔɔlɔi lɛ kpaa gbɛ lɛ, shi yɛ mitsui mli lɛ, miheee nɔ ni amɛtsɔɔ mi lɛ miyeee.”

Mɛni hewɔ ewa kɛhã jeŋ shikpalɔi komɛi po akɛ amɛbaakpɛlɛ nɔ akɛ wala ba kɛtsɔ sutsakemɔ nɔ lɛ? Kɛhã sanebimɔ nɛɛ hetoo lɛ, hã wɔsusu sanebimɔi enyɔ komɛi ni hãa niiamlitaolɔi babaoo ayiŋ feɔ amɛ enyɔɔnyɔ lɛ ahe wɔkwɛ: (1) Te fee tɛŋŋ ni wala je shishi? kɛ (2) Te fee tɛŋŋ ni aná nibii ni wala yɔɔ amɛmli lɛ henɔi srɔtoi lɛ?

Te Fee Tɛŋŋ Ni Wala Je Shishi?

NƆ NI MƐI KOMƐI KƐƆ. Wala ba trukaa kɛjɛ nɔ ko ni wala bɛ mli lɛ mli.

NƆ HEWƆ NI MƐI KOMƐI NYAAA HETOO NƐƐ HE. Ŋmɛnɛ lɛ, jeŋ shikpalɔi ele wala he nibii babaoo fe bei fɛɛ ni eho, shi loloolo lɛ, amɛnyɛko amɛkɛ nɔmimaa atsɔɔ nɔ tuuntu ni wala ji. Esoro nibii ni wala bɛ amɛmli lɛ yɛ wala yibii bibii kwraa lɛ po ahe.

Kɛ́ jeŋ shikpalɔi miitsɔɔ bɔ ni shihilɛ ji yɛ afii akpekpe toi akpei abɔ ni eho lɛ amli lɛ, amɛyiŋ kɛkɛ amɛkaa. Amɛhiɛ susumɔi srɔtoi yɛ he ni wala je shishi kɛjɛ lɛ he, akɛ nɔkwɛmɔnɔ lɛ, mɛi komɛi susuɔ akɛ eje shishi kɛjɛ gɔŋ ko ni fɛ mli, ni mɛi komɛi hu kɛɛ eje shishi kɛjɛ ŋshɔ lɛ shishi. Mɛi komɛi hu susuɔ akɛ, nibii ni bua amɛhe naa kɛfee wala lɛ fee ekome yɛ je lɛŋ he ko dani no sɛɛ lɛ amɛbatsɔ wala yɛ shikpɔŋ lɛ nɔ. Shi enɛ hãaa wɔná hetoo wɔhã sanebimɔ ni ji, te fee tɛŋŋ ni wala je shishi lɛ? Moŋ lɛ, ehãa sane lɛ fee hwanyaŋŋ.

Jeŋ shikpalɔi tsɔɔ akɛ ekolɛ nibii bibii komɛi yɛ ni batsɔmɔ DNA loo nɔ ni hãa wɔnaa adebɔɔ nibii bɔ ni amɛyɔɔ lɛ. Eeenyɛ efee akɛ nibii bibii nɛɛ ba trukaa kɛjɛ nibii ni wala bɛ amɛmli lɛ amli, ni amɛ diɛŋtsɛ amɛjara amɛmli yɛ amɛhenɔi anaa. Kɛ̃lɛ jeŋ shikpalɔi enako odaseyeli ko ni tsɔɔ akɛ nibii bibii nɛɛ eko ehi shi pɛŋ, ni amɛnyɛko amɛfee eko tamɔ nakai.

Bɔ ni adebɔɔ nibii ni wala yɔɔ amɛmli lɛ kɛ saji toɔ ni amɛkɛtsuɔ nii lɛ hãa esoroɔ amɛ kwraa yɛ nibii krokomɛi ahe. Wala yibii lɛ nyɛɔ amɛnuɔ saji ni yɔɔ nɔ ni Blɔfo tsɛɔ lɛ genetic code lɛ mli lɛ shishi, ni amɛkɛtsuɔ nii. Jeŋ shikpalɔi komɛi kɛ genetic code lɛ toɔ kɔmpiuta sɔftwɛɛ he, ni amɛkɛ bɔ ni wala yibii lɛ yɔɔ lɛ toɔ kɔmpiuta lɛ diɛŋtsɛ he. Shi mɛi ni tsɔɔ sutsakemɔ tsɔɔmɔ lɛ nyɛɛɛ atsɔɔ he ni genetic code lɛ je shishi kɛjɛ lɛ mli.

Niyenii mli hewalɛ ni atsɛɔ lɛ protein lɛ yeɔ ebuaa ni wala yibii nyɛɔ etsuɔ nii jogbaŋŋ. Amino acids ohai abɔ ni etsara yɛ gbɛ pɔtɛɛ ko nɔ lɛ ji nɔ ni feɔ protein. Kɛfata he lɛ, dani protein lɛ baanyɛ etsu nii jogbaŋŋ lɛ, esa akɛ edrɔ emli bɔ ni baahã enyɛ ená koji etɛ. Jeŋ shikpalɔi komɛi emu sane naa akɛ ewa waa akɛ abaanyɛ aná protein bibioo kome po ni jeee mɔ ko fee. Datrɛfonyo ko ni atsɛɔ lɛ Paul Davies lɛ ŋma akɛ: “Akɛni protein srɔtoi akpei abɔ ji nɔ ni feɔ wala yibii kome hewɔ lɛ, nilee bɛ mli akɛ abaakɛɛ akɛ amɛba yɛ heniianaa.”

BƆ NI AMU SANE NAA AHÃ. Be ni atsɔ jeŋ shikpamɔ gbɛi srɔtoi fɛɛ anɔ atao nii amli afii nyɔŋmai abɔ sɛɛ lɛ, anɔkwa sane ni ana nɔŋŋ ji akɛ wala jɛ wala ko ni yɔɔ momo mli kɛba.

Te Fee Tɛŋŋ Ni Aná Nibii Ni Wala Yɔɔ Amɛmli Lɛ Henɔi Srɔtoi Lɛ?

NƆ NI MƐI KOMƐI KƐƆ. Klɛŋklɛŋ nii ni wala yɔɔ mli lɛ mli jara fiofio kɛbatsɔ nibii srɔtoi ni wala yɔɔ amɛmli, eko ji gbɔmɛi. Amɛkɛɛ gbɔmɛi ba shihilɛ mli kɛkɛ shi jeee yɛ gbɛjianɔtoo pɔtɛɛ ko naa.

NƆ HEWƆ NI MƐI KOMƐI KƐ HETOO NƐƐ KPÃAA GBEE. Wala yibii komɛi yɛ ŋwanyaŋŋ fe ekrokomɛi. Niiamlitaomɔ wolo ko tsɔɔ mli akɛ, bɔ ni feɔ ni wala yibii ni bɛ ŋwanyaŋŋ lɛ batsɔmɔɔ wala yibii ni yɔɔ ŋwanyaŋŋ lɛ ji sane ni ji enyɔ nɔ, yɛ bɔ ni fee ni wala je shishi lɛ sɛɛ, ni sutsakemɔ tsɔɔlɔi nyɛko ana naa.”

Jeŋ shikpalɔi eyɔse akɛ, protein bibii komɛi tsaraa kɛfeɔ nɔ ko tamɔ mashiŋ bibii yɛ wala yibii lɛ eko fɛɛ eko mli, ni nomɛi feɔ ekome kɛtsuɔ nibii komɛi ni yɔɔ ŋwanyaŋŋ lɛ ahe nii. Nitsumɔi nɛɛ ekomɛi ji, amɛkɛ niyenii mli hewalɛi lɛ yaa gbɔmɔtso lɛ hei srɔtoi ni amɛhãa gbɔmɔtso lɛ náa hewalɛ, amɛsaa wala yibii lɛ hei ni efite lɛ, ni amɛhãa wala yibii lɛ kɛ amɛhe shãraa. Ani nɔ ko ni ba kɛkɛ ni jeee mɔ ko to he gbɛjianɔ lɛ baanyɛ ato nɔ ko ni yɔɔ ŋwanyaŋŋ tamɔ nɛkɛ he gbɛjianɔ ni enyɛ etsu nii jogbaŋŋ nɛkɛ? Ewa kɛhã mɛi babaoo akɛ amɛbaakpɛlɛ tsɔɔmɔ nɛɛ nɔ.

Kɛ́ nuu he nu kɛ yoo wɔlɔ kpe lɛ, ejeɔ shishi etsɔɔ gbɔmɔ, ni nakai eji yɛ kooloi hu agbɛfaŋ. Wala yibii ni yɔɔ nɔ ni jɛɔ sharamɔ nɛɛ mli kɛbaa lɛ faa, ni fiofio lɛ etsɔɔ bi, kɛkɛ lɛ gbɔmɔtso lɛ he nibii ebɔi he baa. Sutsakemɔ tsɔɔlɔi lɛ nyɛko amɛtsɔɔ bɔ ni feɔ ni wala yibii lɛ nyɛɔ eleɔ nɔ ni sa akɛ etsɔ, kɛ he ni esa akɛ eya yɛ bi lɛ mli.

Amrɔ nɛɛ jeŋ shikpalɔi eyɔse akɛ dani kooloo ko baanyɛ atsɔ kooloo henɔ kroko lɛ, ebaabi ni tsakemɔ lɛ aje shishi yɛ ewala yibii bibii kwraa lɛ amli. Shi akɛni jeŋ shikpalɔi lɛ nyɛɛɛ atsɔɔ bɔ ni baafee ni atsɔ sutsakemɔ nɔ afee wala yibii ni bɛ haŋtsii kwraa lɛ po lɛ, ani nilee yɛ mli akɛ abaakɛɛ akɛ kooloi henɔi srɔtoi ni yɔɔ shikpɔŋ lɛ nɔ lɛ ba kɛkɛ ni gbɛjianɔtoo kpakpa ko kwraa bɛ he? Nibii ni wala yɔɔ amɛmli ahe nilelɔ kpanaa ko ni atsɛɔ lɛ Michael Behe lɛ wie yɛ bɔ ni kooloi yɔɔ lɛ ahe akɛ: “Niiamlitaomɔ ehã ana nibii ni akpaaa gbɛ ni yɔɔ ŋwanyaŋŋ kɛ naakpɛɛ moŋ, shi anyɛko atsɔɔ bɔ ni abaanyɛ atsɔ sutsakemɔ nɔ ahã nibii ni yɔɔ ŋwanyaŋŋ nɛɛ atsɔmɔ nibii krokomɛi ni yɔɔ ŋwanyaŋŋ ni jeee mɔ ko to he gbɛjianɔ.”

Gbɔmɛi adesai ahiɛ yɛ amɛhe nɔ, ni amɛle nibii ni yaa nɔ yɛ amɛhewɔŋ, amɛnyɛɔ amɛsusuɔ nii ahe ni amɛjwɛŋɔ, amɛnyɛɔ amɛjieɔ sui kpakpai tamɔ ejurɔfeemɔ kɛ hekɛafɔleshãa kpo, ni amɛle nɔ ni ja kɛ nɔ ni ejaaa, amɛle nɔ ni hi kɛ nɔ ni ehiii. Sutsakemɔ tsɔɔmɔ tsɔɔ akɛ nii ni wala yɔɔ mli lɛ mli jara fiofio kɛbatsɔ nibii srɔtoi ni wala yɔɔ amɛmli. Shi anyɛŋ adamɔ enɛ nɔ atsɔɔ bɔ ni fee ni adesa jwɛŋmɔ lɛ nyɛɔ ehãa gbɔmɔ nyɛɔ ejieɔ sui nɛɛ akpo lɛ mli..

BƆ NI AMU SANE NAA AHÃ. Mɛi komɛi maa nɔ mi doo akɛ, wala tsɔ sutsakemɔ nɔ kɛba, shi mɛi komɛi heee enɛ amɛyeee. Ni mɛi komɛi hu kɛ sutsakemɔ tsɔɔmɔ ni kɔɔ bɔ ni fee ni nibii ni wala yɔɔ amɛmli lɛ shwere ni aná henɔi srɔtoi lɛ he lɛ kpãaa gbee.

Hetoo Ni Esa Akɛ Asusu He Waa

Be ni asusu odaseyelii ni kɔɔ sane nɛɛ he jogbaŋŋ lɛ, mɛi babaoo mu sane naa akɛ mɔ ko ni bɔ wala. Hã wɔsusu nilelɔ kpanaa ko ni atsɛɔ lɛ Antony Flew, ni be ko ni eho lɛ, eheɔ eyeɔ waa akɛ Nyɔŋmɔ bɛ lɛ niiashikpamɔ lɛ he wɔkwɛ. Be ni ená ele bɔ ni wala yɔɔ ŋwanyaŋŋ hã kɛ mlai ni kudɔɔ adebɔɔ nibii ni yɔɔ je lɛ mli lɛ, etsake ejwɛŋmɔ. Etsɛ wiemɔ ko ni kɛ́ blema jeŋ nilelɔi susu sane ko he amɛgbe naa lɛ, amɛkɛɔ lɛ yisɛɛ ekɛɛ: “Esa akɛ wɔkpɛlɛ nɔ ni odaseyeli lɛ maa nɔ mi lɛ nɔ, kɛ́ jeee no wɔkpaa gbɛ po.” Nilelɔ Kpanaa Flew na akɛ odaseyeli lɛ tsɔɔ akɛ Bɔlɔ ko yɛ.

Gerard, ni atsĩ etã yɛ sane nɛɛ shishijee lɛ hu mu sane naa nakai nɔŋŋ. Yɛ skul babaoo ni etee kɛ enitsumɔ akɛ filikilɔi ahe nilelɔ kpanaa lɛ fɛɛ sɛɛ lɛ, ekɛɛ akɛ: “Minaaa odaseyeli ko ni tsɔɔ akɛ wala ba trukaa kɛjɛ nɔ ko ni wala bɛ mli lɛ mli. Bɔ ni ato nibii ni wala yɔɔ amɛmli lɛ ahe gbɛjianɔ jogbaŋŋ kɛ bɔ ni amɛyɔɔ ŋwanyaŋŋ lɛ hãa minaa akɛ bɔ fɛɛ bɔ ni fee lɛ mɔ ko kɛ̃ fee, ni eto amɛhe gbɛjianɔ.”

Bɔ ni mɔ ko baanyɛ ale nitɛŋlɔ ko jogbaŋŋ kɛtsɔ nibii ni etɛŋ lɛ amli ni ebaapɛi lɛ nɔ lɛ, nakai nɔŋŋ Gerard kase adebɔɔ nibii ahe nii ni eyɔse Bɔlɔ lɛ sui lɛ. Kɛfata he lɛ, Gerard ŋɔ be kɛkase wolo ko ni jɛ Bɔlɔ lɛ ŋɔɔ, ni ji Biblia lɛ. (2 Timoteo 3:​16) Ená hetoi ni hãa mɔ tsui nyɔɔ emli kɛhã sanebimɔi ni kɔɔ adesai ayinɔsane he, kɛ naagbai ni mɛi kɛkpeɔ ŋmɛnɛ lɛ anaa tsabaa yɛ mli. Enɛ hã ená nɔmimaa akɛ, Biblia lɛ ji wolo ni jɛ mɔ ko ni le nii fe mɔ fɛɛ mɔ ŋɔɔ.

Gerard na akɛ hetoi ni Biblia lɛ kɛhãa lɛ ji nɔ ko ni sa akɛ asusu he waa. Wɔmiiwo bo hewalɛ ni bo hu okane okwɛ.