Shi kɛya he ni ato saneyitsei lɛ anaa yɛ lɛ

ANI MƆ KO NI FEE?

Nɔ Ni Jieɔ Muji Kɛjeɔ Gbese Niji Ni Yɔɔ Eyitso He Lɛ He Lɛ

Nɔ Ni Jieɔ Muji Kɛjeɔ Gbese Niji Ni Yɔɔ Eyitso He Lɛ He Lɛ

Kɛ́ filikilɔ ko baanyɛ afiliki, ekwɔ nɔ ko, loo ele nibii ni yaa nɔ yɛ ehewɔŋ lɛ, ebaabi ni ehe atse. Akɛ nɔkwɛmɔnɔ lɛ, kɛ́ niji legelegei enyɔ ni yɔɔ eyitso he lɛ ahe ewo muji lɛ, nyiɛmɔ waa kɛhãa lɛ, enyɛɛɛ ekɛ filikilɔi krokomɛi ashãra, ni enyɛɛɛ enu nii ahe fu. Kooloi ahe nikaselɔ ko ni atsɛɔ lɛ Alexander Hackmann lɛ wie akɛ, “onaŋ filikilɔ ko ni he tseee kɔkɔɔkɔ. Amɛna nɔ ni amɛbaanyɛ amɛfee koni kɛ́ amɛnyiɛ he ko ni tseee po lɛ, amɛhe akawo muji.”

Susumɔ he okwɛ: Hackmann kɛ ewebii lɛ kwɛ gbese henɔ ko (Camponotus rufifemur ) jogbaŋŋ, ni amɛna bɔ ni efeɔ ni ejieɔ muji yɛ eniji ni yɔɔ eyitso he lɛ he. Amɛna akɛ, gbese lɛ dɔrɔɔ enaji lɛ kɛmɔmɔɔ eniji ni yɔɔ eyitso he lɛ, ni egbalaa eniji lɛ kɛtsɔɔ enaji ni edɔrɔ lɛ amli, ni muji ni yɔɔ he lɛ jieɔ fiofio yɛ bɔ ni amɛdaramɔ yɔɔ lɛ anaa. Nibii komɛi yɛ enaji ni edɔrɔ lɛ ahe tamɔ brɔshi; brɔshi ni naa wa lɛ jieɔ muji ni dara waa lɛ. Ni nɔ ni naa waaa lɛ jieɔ muji ni daraaa ni yɔɔ eniji ni yɔɔ eyitso he lɛ, ni gbɛi ni kamɔ mli lɛ adaramɔ lɛ tamɔ tsɔi ni yɔɔ eniji ni yɔɔ eyitso he lɛ nɔŋŋ. Ni brɔshi lɛ ni naa waaa kwraa lɛ jieɔ muji ni daraaa kwraa ni ekome tilɛ tamɔ gbɔmɔ tsɔi kome mlijaa 80 lɛ.

Kwɛmɔ gbese ni miijie muji kɛmiije eniji ni yɔɔ eyitso he lɛ he

Hackmann kɛ ewebii lɛ heɔ amɛyeɔ akɛ, nitsumɔhei ni feɔ nibii baanyɛ amɛkwɛ gbɛ ni gbese tsɔɔ nɔ ejieɔ muji kɛjeɔ eniji ni yɔɔ eyitso he lɛ nɔ amɛfee nibii ni akɛjieɔ muji yɛ nibii ahe. Akɛ nɔkwɛmɔnɔ lɛ, kɛ́ aafee nibii bibii ni akɛwoɔ elɛtrɔnik tsɔji amli lɛ, abaanyɛ atsɔ gbɛ ni tamɔ nɛkɛ nɔ ajie muji kɛje amɛhe, ejaakɛ bei komɛi lɛ muji bibii lɛ po hãaa tsɔji komɛi anyɛ atsu nii jogbaŋŋ.

Te osusuɔ tɛŋŋ: Ani nɔ ni jieɔ muji yɛ gbese niji ni yɔɔ eyitso he lɛ he lɛ ba kɛtsɔ sutsakemɔ nɔ? Aloo mɔ ko ni fee?