Shi kɛya he ni ato saneyitsei lɛ anaa yɛ lɛ

ANI MƆ KO NI FEE?

Abɛi Ni Atsɛɔ Lɛ Cabbage White Butterfly Lɛ Feɔ Efiji Tamɔ Alfabɛta V

Abɛi Ni Atsɛɔ Lɛ Cabbage White Butterfly Lɛ Feɔ Efiji Tamɔ Alfabɛta V

Dani abɛi ko baanyɛ afiliki lɛ, ja ekɛ efiji ehere hulu la dã. Shi gbii ni hulu etsooo lɛ, cabbage white butterfly lɛ filikiɔ dani abɛi krokomɛi fɛɛ filikiɔ. Mɛni hãa ebaa lɛ nakai?

Susumɔ he okwɛ: Dani abɛi henɔi srɔtoi fɛɛ baanyɛ afiliki lɛ, amɛmuaa amɛfiji anaa loo amɛgbɛɔ mli kɛhereɔ hulu la lɛ. Kɛ̃lɛ, cabbage white butterfly lɛ gbɛɔ efiji amli tamɔ alfabɛta V. Niiamlitaomɔ ehã ana akɛ bɔ ni afee ni abɛi nɛɛ anyɛ aná hulu la ni fa waa lɛ, esa akɛ egbɛ efiji amli tamɔ alfabɛta V. Enɛ yeɔ ebuaa ni hulu la lɛ boteɔ fãji ni yɔɔ ehe lɛ amli ni enyɛɔ efilikiɔ.

Niiamlitaolɔi ni yɔɔ University of Exeter, yɛ England lɛ tao nii amli amɛkwɛ kɛji amɛbaanyɛ amɛkwɛ bɔ ni abɛi nɛɛ feɔ efiji tamɔ alfabɛta V lɛ nɔ amɛfee solar panels ni tsuɔ nii waa. Be ni amɛfee nakai lɛ, amɛna akɛ amɛbaanyɛ amɛfee solar panels ni naa wala aaafee 100 mlijaa 50 fe nɔ ni amɛfeɔ lɛ.

Niiamlitaolɔi lɛ yɔse hu akɛ, kɛ́ hulu la bashwie abɛi nɛɛ fiji anɔ lɛ, efiji lɛ kpɛlɛɔ waa. Niiamlitaolɔi lɛ ekwɛ bɔ ni abɛi nɛɛ nyɛɔ efeɔ efiji tamɔ alfabɛta V lɛ, kɛ bɔ ni efiji lɛ kpɛlɛɔ waa kɛ́ hulu la bashwie nɔ lɛ nɔ amɛfee solar panels ni etsiii ni tsuɔ nii waa. Enɛ hã Nilelɔ Kpanaa ko, ni atsɛɔ lɛ Richard ffrench-Constant ni efata niiamlitaolɔi lɛ ahe lɛ, wie akɛ cabbage white butterfly lɛ “nyɛɔ egbalaa hulu la waa diɛŋtsɛ.”

Te osusuɔ tɛŋŋ? Ani bɔ ni cabbage white butterfly lɛ nyɛɔ efeɔ efiji tamɔ alfabɛta V lɛ ba kɛtsɔ sutsakemɔ nɔ? Aloo mɔ ko ni fee?